مصر موتورز مجتمع السيارات - تجربة تغيير كاوتشة الكوبلن لـ 128

العدة المطلوبة

مفتاح 17 – لقمة 30 – يد (تركب فى اللقمة) – ماسورة 1/2 بوصة او اكثر (تركب فى اليد لتطويلها وزيادة عزمها) – كوريك – مفتاح العجل – شاكوش او مطرقة – حجر كبير او مسند لرفع العربية – مفتاح 19 – بنزين للنظافة – شحم – كاوتشة الكوبلن الخارجى (اللى كنت هاغيرها) – 2 افيز بلاستيك كبير

نبدا باسم الله اولا، ونفك صامولة السرة ، وديه كانت المشكلة لانها تسببت فى كسر يد كنت شاريها من التوفيقية بـ 17 جنيه (كروم فاناديوم) ، وبعدين جبت واحدة تانى من الرويعى بـ 30 جنيه (شكلها استانلس).

بعد تهوية صامولة السرة (باستخدام اللقمة 30 واليد والماسورة وشد فرامل اليد وتحجير العربية والفردة اللى بنفك فيها بالذات) ، نهوى صواميل العجلة نفسها.

نرفع العربية باستخدام الكوريك ونحط الحجر الكبير او المسند لتحميل العربية عليه بدون الكوريك.

نفك صامولة السرة خالص وصواميل العجلة.

نكسر عجل العربية على الناحية العكسية للعجلة (لو بنغير للعجلة الشمال يبقى نلف الدركسيون على ناحية اليمين للاخر)

نبدا بفك صامولة البارة (مفتاح 17) ونضرب بالشاكوش او المطرقة على مسمار البار من اسفل الى اعلى حتى يخرج من مكانه ، وهناك صامولتين اخريين بتوع المساعد (مفتاح 17).

انا فكيت صامولة المقص (مفتاح 19) بس بعد كده حسيت انى مش محتاج فكها خالص ولكن تهويتها فقط تكفى.

الان نستطيع شد السرة كلها على بعض لناحية مقدمة العربية وبالتالى نكسر الكوبلن على الاخر
باستخدام الشاكوش او المطرقة نضرب على راس الكوبلن (مكان ربط الصامولة 30) حتى نستطيع اخراج الكوبلن من السرة

بعد اخراج الكوبلن من السرة ، نفك الكاوتشة القديمة (اذا كانت موجودة اصلا او نقطعها) ، نمسك بالكوبلن من ناحية الفتيس ثم نقوم بثنى الكوبلن الخارجى حتى تظهر صليبة الكوبلن ثم نقوم بالطرق عليها للخارج حتى تخرج من عمود الكوبلن (هناك تيلة تكون بايتة فى مكانها فتحتاج الى بعض الطرق حتى تخرج).

بعد اما تخرج (كانت عنيا طلعت لانى كنت شغال من الساعة 12 بالليل الى الساعة 2.30) تطلع بيها على على حتة نظيفة (انا طلعت بيها الشقة) ومعاك زجاجة البنزين وطبق وتكب شوية بنزين فى الكوبلن لاو لقيته بيحشرج يبقى فيه تراب (زى حالتى كان فيه طينة مش تراب) يبقى شوية كده وهيفرط منك (وحاول لو مفيش تراب متغسلش فيه كتير لو خايف يفرط منك ومتعرفش ترجعه بس لو فيه تراب يبقى خليه يفرط احسن وبعد كده ترجعه سهل مش صعب بياخد وقت شويه بس بيرجع تانى)، وبعد الغسيل الكويس وتجميعه تحط فيه الشحم (انا كنت جايب علبة بيضغط عليها تطلع الشحم فضيتها كلها داخل تجويف الكوبلن والصليبة) , وفجاة تلاقى الساعة بقت 3.30 الفجر !!!

وتنزل على العربية (بس ده كان الصبح الساعة 7) تركب الكاوتشة الاول فى عمود الكوبلن وبعد كده تركب الكوبلن وتدق عليها بالراحة لغاية لما التيلة تخش تانى فى مكانها وبعد كده تركب الكاوتشة فى الكوبلن وتركب الافيزين وتتنى الكوبلن على الاخر ناحية السرة وتدخله فى السره وبعد كده تدخل المساعد فى السره وتشبط المسمارين وبعد كده تركب مسمار البارة وتقرط كويس على صواميل البارة والمساعدين والمقص وتركب صامولة السره (30) وبعد كده تركب العجلة وتنزل العربية من على الحجر الكبير وتقفل على صامولة السرة كويس باستخدام اليد والماسورة.

واطلع جرب وقم بالدعاء لنا ولصالح المؤمنين