فك ماتور و عمل طقم شنبر متابعه يوم بيوم
 

بسم الله الرحمن الرحيم

الموضوع باختصار اني ان شاء الله تعالي داخل علي فك الماتور وعمل طقم شنبر له وذلك لاول مره

فقولت اعمل موضوع فيه اكتب تساؤلاتي و كل يوم بيحصل ايه



حاله السياره :

فيات 131 الماني موديل 1979 موتور 1600 سي سي اتنين كامه

الزيت بينقص( تقريبا نص لتر او ثلاث ارباع لتر كل 1000 كيلو ) وفيه بخر من الفايظ وبس مفيش دخان من الشكمان





الميكانيكي قال لي ان مصنعيه طقم الشنبر 400 جنيه فهل لو وصلتهم ل 300 معاه او 350 المصنعيه كده كويسة ( الميكانيكي مشهود له )



فيه مهندس شغال فى الشركه ماسك سيارات الشركه معايا قال لى قبل ما تفك الماتور بالكامل راجع على جلد الصبابات الاول لانه ممكن يكون السبب فى حالتك فهل كلامه يؤخذ به؟



عاوز اغير الشكمان فهل اروح اغيرة دلوقت ولا بعد ما الموتور يركب اروح اغيره؟



عاوز اغير الكاوتش فهل يتغير دلوقتي ولا بعد الميكانيكي ؟



هل طقم الشنبر يلزم ان الماتور كله يطلع بره ولا بيتعمل والماتور فى العربية ؟



سمعت كلام ان بعمل طقم الشنبر اننا كده بنحكم الماتور من فوق ولازم بيقي محكوم من تحت برضه فاذاي بيتحكم من تحت وهل يجوز انه يكون اصلا محكوم من تحت ؟





وبالنسبة للاعضاء اللى من الشرقية عاوز اعرف انهي ميكانيكي احسن



عادل الفلاح

سمير رسلان



انا اتعاملت مع ده واتعاملت مع ده بس اكتر واحد متعامل معاه عادل الفلاح لان ابويا كان بيتعامل معاه ومصنعيه عادل الفلاح زي ما قولت 400 جنيه

رد: متابعه يوم بيوم ل فك ماتور و عمل طقم شنبر
 

الموتور حيطلع بره سواء شنبر او عمره كامله
بالنسبه لحكايه جلد الصباب اعتقد ان طالما الزيت بينقص بالطريقه الجامده دي
فجلد الصباب برئ من هذه الفعله الشنعاء
و لما تفك خلي الميكانيكي يعمل روديه لوش السلندر و حيبان لو جلد الصباب بايظ ولا لاء
كمان لو فيه صباب لادع حيبان معاه و يغيره

رد: متابعه يوم بيوم ل فك ماتور و عمل طقم شنبر
 

احمد الابيض في اخر وادي النيل
وفيه واحد تاني خلف نادي عبد العزيز حجازي مش فاكر اسمه
وفيه عم عليه في اول طريق العصلوجي

رد: متابعه يوم بيوم ل فك ماتور و عمل طقم شنبر
 

امبارح روحت للميكانيكي اللى استقريت عليه ( سمير رسلان ) علشان اربط معاه علشان صابحين الشغل بكره

فطلع يجرب العربية معايا علشان يشوف هنعمل ايه وهنكون محتاجين ايه

فقال لي ان اول حاجه لازم تتعمل هيا تغيير الكرونه لان العربية خطر انها تمشي والكارونه بايظه وخصوصا وان اللى عندي جايبة اخرها وان الماتور لو حتي مفوت تقدر تمشي بيه ولكن الكارونه لو عطلت منك وان ماشي لا قدر الله هتكون اضرارها وحشه وخصوصا لو انت ماشي على سرعه



فحسيت من كلامه بالمنطقية وخصوصا واني كنت نويت اعمل الكارونه قبل ما يحصل موضوع الثورة وكنت نزلت للحاج حمدي علشان اصلح الكارونه



فلما سئلت على الكارونه لقيت ان سعرها نزل شوية بقى فى رينج 1800 وده لسه من غير فصال فقولت اشوف احوال السوق

وكانت النتيجه كالاتي:



1 - تغيير الكارونه بكارونه استيراد مماثله لها العقبة الوحيده امامي كيفيه معرفه مدي جوده الكارونه الاستيراد و هل توجد معايير للحكم عليها ولا انها ممكن تمشي اسبوع و بعدها تعمل صوت تاني وكمان متشكك من ان السوق بقي فيه كاورنات التاكسيات اللى دخلت مشروع احلال التاكسي وكانت الاسعار كالتالي الكارونه فقط ( البطيخه ) 700 جنيه الكارونه الكامله 1200 جنيه والاسعار دي من مصر و بضمان شهر علي حسب كلام التاجر اما الاسعار فى الشرقية كانت 1800 للكارونه الكامله



2- اصلاح الكارونه القديمه ودي عن طريق انى هنزل مصر للحاج حمدي اللى عرفت انه متخصص فى الاصلاح وكان عمل اصلاح كارونه احد الزملاء وذلك بتكلفة 1420 في شهر اغسطس 2010 وذلك بتغيير التروس والبنيون بطقم روسي خاص بلادا



3- تعديل الكارونه بكارونه تويوتا (فقط البطيخه ) و هتكون تكلفتها حوالي 1000 جنيه



انا مشوش شوية مش عارف اسلك انهي اتجاه

رد: متابعه يوم بيوم ل فك ماتور و عمل طقم شنبر
 

ربنا يعينك على فتحة بق العربية وربنا يقدرك وتقدر تسدها
موضوع الكارونة لو حد جربها وعمل التعديل لتويوتا وطلع كويس يبقى اعمله لو محدش عمله يبقى بلاش احسن الا ان كنت ناوي تجرب وتغامر

وممكن تسأل شوية اكثر قبل ما تلف لفتك
فيه تجار على طريق هرية الجديد عندهم استيراد كتير
وفيه في فاقوس
وممكن تقول لاي حد من اخواتنا في بورسعيد يفيدك عن الموجود هناك وتنزل يوم تجيبها وترجع او ممكن تعملها هناك يكون افضل

رد: متابعه يوم بيوم ل فك ماتور و عمل طقم شنبر
 

السلام عليكم ورحمة الله وبركاتة
اخى الكريم مصننعية عامرة كاملة 300 جنية لو اعتبرنا ان طقم الشنبر هو نفس العمرة يبقى 300 جنية
الموتور ممكن يتعمل وهو راكب عادى جدا بيفك البيلات من تحت ويطلع بالبستم كامل بالبيل ودى هاتكون اسهل لة واسرع ليك
الشكمان تغيرة بعد اما تعمل عمرة عشان ما يغرقش زيت من الموتور القديم
نفس الكلام للكاوتش مش فارق بس يستحسن بعد العمرة
نيجى بقى لاهم نقطة وهى السؤال لو حكمت فوق لازم تحكم تحت ولا لا واجيز الرد فى الكلام التالى
موتور عربيتك وحدة واحدة وعمر تشغيلى واحد يعنى الموتور كولة كومباتبول مع بعض تعالى نسال نفسنا سؤال لية طقم الشنبر تاكل مع جدار الشميز وسبيكة الكرنك زى ما هى وكويسة ومحكومة والكلام دة لية؟ مع ان عدد ساعات التشغيل واحدة فاكيد ان طالما الشنبر تاكل يبقى الموتور كولة حالة واحدة مع بعض والحل من وجهه نظرى لو مش عاوز تفتح على نفسك تجيب طقم سبيكة نوع مصانع حربية لانها الافضل فى السوق وتقريبا الطقم عامل لعربيتك 120 جنية بدون خرط كرنك
بالنسبة لطقم الشنبر هات البرازيلى
بالنسبة لموضوع الكارونا سيبك خالص من الاصلاح واعتقد ان افضل حل ليك هو كارونا التويوتا وانا عارف ان فى ناس جربتها وشغالة زى الفل

رد: متابعه يوم بيوم ل فك ماتور و عمل طقم شنبر
 

من واقع التجربة الشخصية فإن عمل شمبر فقط بدون تغيير طقم السبايك عمل فاشل بكل المقاييسوانا جربتة ورجعت حليت الموتور تانى وعملت عمرة كاملة ، ولكن وصف حضرتك لكمية الزيت المفقودة يؤكد ان المشكلة الاساسية فى حاجة اسمها دليل الصباب ودة عامل كدة زى السكس بلف دة بيحصل زى ما كان عندى انة بيتشرخ فبينقص الزيت من الموتور بكمية كبيرة جدا ، بدليل ان الموتور كلة بيبقى مفوت وجايب اخرة وبينقص بالكتير نص كيلو كل 3000او 4000كم، ولما نحسبها نلاقيك هتصرف حوالى 4000،5000 ج فى الموضوع دة ومش هتلاقيهم لو فكرت تبيع فى نفس الشهر اللى عمرتها فية مابالك بعد سنة او اتنين ، نصيحتى من واقع تجربتى الشخصية اخلع من الموديلات القديمة واضف تكلفة الصيانة الى ثمن السيارة واشترى عربية تانية تكون حالتحا احسن او لو غاوى نفس النوع اشترى واحدة لسة مشدودة هتاخدها صدقنى بتمن عربيتك من غير اى صيانة وتبقى وفرت فلوسك وقرف الصنايعية