تعبت جدا ومش عارف أختار ولا اشترى ايه ؟؟
 

بسم الله الرحمن الرحيم
للأسف هتكلم كتير بس عشان محتاج اختيار صح مش محتاج مشاكل وحاجة تتعبنى اكتر ..

انا حاليا مجمع 25000 تقريبا وممكن يكملو الى 45 بس دة هكون مضطر اعمل قرض ب 20 الف تبع شغلى . يجيبو ايه مانوال أو اتوماتيك ويكون حاجة عالية عن الارض عشان اعرف اقوم وأقعد .

وهل ممكن أعمل حاجة فى كرسى السيارة بحيث أقدر ان اخليه أعلى حوالى 10 او 15 سم علما بأن جسمى صغير الدركسيون مش هيضايقنى فى حاجة .

انا عندى مشكلة ضعف عضلات وقدمت على سيارة مجهزة والنتيجة لا ينطبق عليه شروط الحصول على سيارة مجهزة طبقا للائحة مش عارف رقم كام لسنة 1977 ههههههههههه من 40 سنة اللائحة ..

مفيش مشكلة قلت اشترى على حسابى .
رحت المرور وقلت ان عاوز اعمل رخصة .
حولون قمسيون تابع للمرور عشان ملاحظ ان فى مشكلة فى رجلى . رغم ان بعرف أسوق سيارة سوزوكى فان مانوال بدون أى مشاكل "
رحت القمسيون الدكتور بيقولى لازم تشترى سيارة مجهزة عرفته ان انا لا استحق قالى مش هينفع اعملك رخصة الا لما تشترى سيارة ومجهزة "
المهم فكرت اشترى سيارة وأجهزها " فكرت فى الماروتى وأجهزها وأريح دماغى "
قابلتنى مشكلة ان انا ازاى همتحن فى المرور ب 3 دراعات فى ايدى ودركسيون وفتيس دة انا كدة عاوز كمان ايدين "
غير كدة الماروتى واطية اوى زهتعب وانا بخرج او بدخل لان عاوز حاجة تكون مرتفعة شوية "

المهم غيرت تفكيرى الى الاتوماتيك لكن مش عارف اجيب ايه ..
عمال ادور على كونتكت وعلى النت . بلاقى أسعار غريبة .

يعنى لانوس 1999 اتوماتيك مطلوب فيها 45 الف
النترا 2000 اتوماتيك مطلوب فيها 50 الف
وفى بقى سيارات قديمة أوى زى الهوندا سيفيك موديل 1982 الى 1990 .


من الاخر محتاج عربية متزيدش عن 40 عشان يتبقى معايا 5 للتظبيط والترخيص والحوارات الفاشلة بتاع الحكومة .. وتكون زى ما قلت فى الاول عالية أو على الاقل ينفع اعملها اى تعديل أرفع الكرسى بتاعى بيه .
ولو زادت ل اكتر من ال 40000 شوية بس مش كتير يعنى الف ولا اتنين مفيش مشكلة ..

المهم عربية تشيلنى مش انا اللى اشيلها ..
مش هتفرق بشنطة ولا لأ لو احتجت أشيل حاجة بتكون كتب او ورق أو كشاكيل وكراريس وممكن احكها فى الكرسى اللى ورا عادى أنا شاب ومعظم الاوقات لوحدى ويوميا المسافة المقطوعة مش هتزيد عن 20 كيلو او 25 كيلو بالكتير .. ومفيش مانع ان اروح من بنها للقاهرة مرة كل شهر ولا شهرين مثلا..