مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)
-   سوق قطع الغيار (https://www.masrmotors.com/vb/forumdisplay.php?f=203)
-   -   تجربتي مع الشيخ طارق أبو زيد (https://www.masrmotors.com/vb/showthread.php?t=121431)

nader_nader 24-11-2013 11:25 PM

تجربتي مع الشيخ طارق أبو زيد
 
السلام عليكم ورحمة الله وبركاته
سأحكي لكم تجربتي بالتفصيل مع الشيخ طارق أبو زيد
أنا طبعا مكنتش أعرف الشيخ طارق إلا من خلال منتداكم الكريم وخدت عنه إنطباع إيجابي من السادة الأعضاء
وإتصلت بيه أول مره يوم الأربعاء اللي فات الموافق 20-11-2013 وسألته عن مشكلتي مع عربيتي النوبيرا لتكرار نقص المايه بشكل رهيب وصل لحد 3 لتر في كل 60 كيلو وقولتله إني حاسس انه وش سلندر وسألته عن الماتور الإستيراد وقاللي سعره
ونصحني إني أروحله علشان هو شاكك في غطا القربة اللي ممكن يكون سبب في نقص المايه
قولتله هكون عندك بكرة إن شاء الله
وبدأ اليوم الصعب والحمد لله
تحركت من العبور تاني يوم الخميس الموافق 21-11-2013 وخدت الدائري للهرم وعند المعادي تقريبا العربية سخنت وفتحت لقيت مفيش نقطة ماية في القربة
واكتشفت ان الماية بتطلع من الشكمان وتأكدت إن كده وش السلندر جاب اخره
وكل 5 كيلو كانت بتسخن واقف ادور على مايه وازودها بالكامل
ووصلت نزله الهرم بعد عذاب ووقفت بالعربية وقولت انا هكلم الشيخ طارق اقوله يحضر الماتور واركبه عنده بالمره لأن أصلا رجوعي للعبور أصبح شئ صعب
وحاولت الإتصال بالشيخ طارق لمده ساعتين متواصلتين علشان أتأكد قبل ما اروحله إن الماتور جاهز وفي إمكانية للتركيب عنده علشان مكملش المسافة لحد المحل عنده على الفاضي
وعلى مدار ساعتين متواصلين الشيخ طارق بيكنسل عليا في كل مرة بحاول الاتصال بيه
واخير اضطريت اني احاول ارجع تاني للميكانيكي بتاعي في الزيتون ووصلت بعد حوالي 5 ساعات بعد عذاب وبهدله

الميكانيكي بتاعي حل الماتور وطلع الوش بايظ تماما وقاللي الأفضل ننزل الحرفيين نشوف مكنة استيراد وبردو فضلت اتصل بالشيخ طارق وقولت يمكن كان عنده اي عذر وبدل ما اجيب الماتور من الحرفيين اروح اجيبه من عنده وحاولت الاتصال تاني وهو بردو بيكنسل في كل مكالمة

واتفقت مع الميكانيكي اننا هننزل الحرفيين امبارح الموافق 23-11-2013 ونزلنا وإتفاجأت ان الأسعار هناك غاليه والماتور بالفتيس سعره من 3500 الى 4000 جنية وقولت احاول اتصل تاني بالشيخ طارق أسأله عن الأسعار وتوفر الماتور
وفضلت أحاول أكلمة حوالي 20 مره هو بيكنسل لحد ما رد ودار الحوار التالي
أنا: السلام عليكم
الشيخ طارق: وعليكم السلام (نعم)
أنا: انا كنت كلمتك بخصوص الماتور واتفقت اني هجيلك وكنت في طريقي بس انت مردتش عليا
الشيخ طارق: ها
أنا: عندك مواتير نوبيرا
الشيخ طارق: لا
أنا: طيب اخر سعر كان كام
الشيخ طارق: معنديش علشان أقولك
أنا: طيب هيج..... وراح الخط مقفول في وشي

طبعا انا زعلت من الموقف وقولت حسبنا الله ونعم الوكيل
وبعد كده استخرت ربنا واشتريت من الحرفيين
ولكن الموقف يدل على عدم احترافية في التعامل وعدم تقدير

أترك لكم التعليق ،،،

AMMI 24-11-2013 11:37 PM

رد: تجربتي مع الشيخ طارق أبو زيد
 
مش لاقى تعليق اقوله بصراحه انت بتحكى حقائق. وطالما الشيخ طارق عمل الموقف ده يبقى مش هينفع معاه العتاب

أيمن الروبي 25-11-2013 12:02 AM

رد: تجربتي مع الشيخ طارق أبو زيد
 
للأسف نفس الموقف حصل معايا
كنت محتاج طقم جنوط لعربيتي علشان اللي عندي كانو منتهيين وكل شويه الكاوتش ينام مني
فعرضت موضوعي علي المنتدي هنا
وهو رد عليا وقالي عندي طقم الجنوط استيراد مفهوش الهوا مروحة بتاع 132
وسعر الطقم 200ج قولتلو اقل طقم مروحه عامل 600ج ومتبهدل
قالي متقلقش عندي وتعالي وب 200ج
قولتلوا خلاص انا مسافر الفيوم شغل بكرا
الكلام ده من سنه ونص تقريبا
وانا رايح هعدي عليك اخدهم اركبهم عندك واسافر مشواري
وبالفعل روحتلوا بعد ما دوخت علي المكان
واتصل بيه كتير مش بيرد وانا واقف قدام المحل عنده اكتر من ساعه ونص
وفي واحد ابن حلال وصفلي عنوان بيته روحتله وفضلت انادي عليه
لقيت ابنه بيرد عليا
بقوله عاوز والدك علشان طقم الجنوط
قالي والدي مش موجود الكلام ده 10الصبح
واصلا احنا مبنبعش جنوط اساس والولد بيرد عليا بمنتهي البرود وبطريقه مش كويسه
اقوله طب اوصل لوالدك ازاي مش بيرد عليا
الولد يرد عليا اصله سايب تليفونه في البيت ومش واخده معاه
وطبعت اتعطلت وعرفتش اسافر يومها للتأخير وسافرت تاني يوم مواصلات
وبعد كده اشتريت طقم جديد
وفي نفس الاسبوع عمل نفس الحركه في زميل معانا علي المنتدي كان عاوز منه كربراتير عربيه بولونيز
وبرده ابنه اللي رد علي الزميل وقالوا معندناش
حسبي الله ونعم الوكيل
كل ما افتكر الموقف دمي يتحرق بطريقه غير عاديه

انا حاسس بصاحب الموضوع علشان اتعمل فيا

treka 25-11-2013 01:12 AM

رد: تجربتي مع الشيخ طارق أبو زيد
 
طب ماترد ياشيخ طارق

Eng/salwa 25-11-2013 01:56 AM

رد: تجربتي مع الشيخ طارق أبو زيد
 
لا حول ولا قوة الا بالله


الساعة الآن 02:42 PM.

Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017