الى محبى إبيزا
 

بسم الله
السلام عليكم
انشاء الله هشترى عربية بعد 6 اشهر ( لسة باااااااادرى) ومعايا حوالى 30000 وعجبتنى الابيزا بس كنت عايز اعرف الفلوس الى معايا على اول السنة تجبلى موديل كام وكام سى سى وفيها تكييف ولا لا وشنطة العربية كويسة تشيل شنطة سفر معقولة وقاعدة الكنبة مريحة فى السفر ولالا والباور اية اخبارة (الباور بالنسبالى مهم جدا)
واية افضل سنة صنع كويس فى الابيزا
وعايز اعرف حالة العربية كويسة ازاى (ممكن حد من الجروب يبقى يساعدنى هو او يدلينى على ميكانيكى كويس)
انا اسرتى صغيرة زوجة وطفل شهرين ومحتاج عربية موفرة وتقدر تسافر على الاقل مرة فى الشهر 200 كيلو
وشغلى فى 6 اكتوبر 100 كيلو رايح جاى (ممكن اروح بيها مرتين فى الاسبوع)
وشكرا ليكم جميعا

رد: الى محبى إبيزا
 

30 يا باشا يبقي ابيزا 94

1300 سي سي و هتلاقيها مكيفة ان شاء الله في منها مكيف كتير بس هي اساسا نازله الفابريقه بتاعها كانت نازله بسربنتينه التكييف و بتدخل هوا سخن كده انما بتبقي ناقصه علي الكباس و الكويل و كده بس اغلب الناس مركبة تكييف فيها و بيبقي تحفة خصوصا ان العربية ملمومه

شنطة العربية تشيل شنط سفر مش شنطة واحدة و لو شلت الاستاند الاسود اللي بيفصل الشنطه عن الصالون هتاخد اكتر

للامانة الابيزا 94 هاف باور دركسيونها ناعم مش تقيل خصوصا لو العفشه متربطه و علبة الدركسيون مظبوطه

بالنسبة لقطع الغيار و الميكانيكا قطع غيارها في كل حته و لو حبيت تجيب اي حاجة فيها هتيجي عادي جدا بس مش غالية اوي و مش رخيصة برضه لان حاجتها كلها الماني و اسباني

تقدر تسافر بيها و نص انشالله تسافر كل يوم السفر عموما مش اجهاد بالعكس ده مريح للموتور اكتر من مشي شوارع القاهرة اللي كل شوية تدوس و تقف و حاجة تجيب الضغط

و اي سؤال فيها انا موجود و هي معانا من الزيرو فا انا ملم بكل تفاصيلها ان شاء الله

رد: الى محبى إبيزا
 

لو هاتجيب ابيزا ماتنساش انك تكشف عليها كويس و يشترط الحاله الرائعه في الالماني بالذات علشان مايقرفكش
الابيزا هاتعملك اكتر من كده بكتير بس لو تصبر شويه و تجيب كورولا 94 او كريستاله في حدود الاربعينات يبقى افضل كتييييييييييييييييييييييي يييييير

رد: الى محبى إبيزا
 

محمد ابيزا طول عمرك نجم وشكرا ليك
بس انا ليا استفسار
1-احسن موديل فى الابيزا سنة كام ولية القديم احسن من الجديد
2-وهل كل الميكانيكيا بيفهمو فيها ولا ليها ميكانيكى مخصوص فى الابيزا (اصل انا لقيت ناس كتير بتحزر انك تكشف على العربية كويس جدا عشان الشباب بتقرص على العربية دى)
3-وموديل 94 اكيد كاربيراتور مش انجيكشن ودة هيستهلك بنزين شوية
4-والتكييف عامل اية فى الزحمة
5-والقى العربية دى فين بتتباع مستعملة
شكرا ليكم

رد: الى محبى إبيزا
 

احسن موديل من ناحية الاعتمادية 94 و عموما القديم اجود من الجديد مش معني كده ان الجديد وحش بالعكس ممتاز بس القديم ليه طعم تاني حتي لو كان تكنولوجيا اقل و دي امزجه يعني

يعني انا لو خيروني تركب ابيزا 94 1600 ولا 2008 1600 هركب 94

مش كل الميكانيكيه بيفهموا فيها بس ال 94 مش لغز عموما و سهلة في التصليح بس في ناس كتير بتفهم فيها عندك مثلا لو العفشه من احسن الناس في العفشه اللي عمره ما خيب معايا في حاجة (مصطفي الباشا) في البحر الاعظم و مش في 94 بس وديتله 2001 قبل كده و ظبطها برضه

الميكانيكه عندك محمد سمير في جسر السويس عندك ماستر فولكس (متروحلهمش) التوكيل طبعا اساتذه بس حراقين ده طبعا علي سبيل المثال لا الحصر

94 كربراتير اه و الكربراتير عموما بيستحمل الشد و القرص و الحرق اكتر من الانجكشن يعني يوم ما يبوظ الكربراتير و انا بقول يوم ما يبوظ انا بقالي سنين بفحت في العربية دي من ساعة ما اتعلمت السواقه و قبلها عربية بقالها 15 سنة بتشتغل ماشية كيلوات بالعبيط و الكربراتير ده محدش لمسه و يوم ما يبوظ 300 جنيه اجيبلك غيره انما الانجكشن اولا متقدرش تنزل عن بنزين 92 دي حاجة الانجكشن لسعته جامده يعني كنترول انجكشن بس في ال 2001 ب 570 جنيه حساس الهوا لوحده ب 800 جنيه
حساس بوابة الانجكشن ب 400 جنيه استيراد وحدة الحقن كلها عاملة 3000 جنيه

الحاجات دش مش بتبوظ بسرعة ولا حاجة بالعكس معمرة جدا بس انا شخصيا بفضل الكربراتير عن الانجكشن لاني واجهت مشاكل في عربية والدي مرسيدس 280 و قديمة موديل 1984 بس انجكشن شوية بنزين مخلوط بميه دخلوا التانك بهدلوا العربية و بوظوا طرمبه البنزين الكهربا و كانت ليلة انما الابيزا حصلت فيها مرة كده علي الطريق الزراعي ادي تنضيفه كربراتير بالاسبراي و غير فلتر و عيش حياتك ولا الهوا:)

غير كده طبعا الكربراتير استهلاكه اعلي من الانجكشن بس في بنزين مازال موجود اسمه (80) و ده الابيزا بتاخده و مبتقولش لا:)

عربيتي مفهاش تكييف بصراحة بس الاقاويل متضاربه بصراحة انا جربت العربية دي بتكييف و كانت خالفه تقسيمه اساسا و مع ذلك محستش ان التكييف خانقها اوي ولا حاجة بالعكس كان تبريد ممتاز و العربية جميلة و في ناس التكييف خنقها زي مثلا في الجولف 2 ال 1300 و عموما لو اشتريتها مكيفة خير و بركه مشتريتهاش مكيفة تكييفها بيتكلف في حدود 2500 استيراد الاصلي

عندك سوق الجمعة اعلانات الجرايد و مجلة عربيتي بيبقي فيها اعلانات بيع لكل الماركات و انا لو لقيت حاجة هكتبلك في الموضوع هنا و ربنا يوفقك ان شاء الله :) و اي سؤال متترددش انك تسأل:)