|
هتجن :استهلاك البنزين صدمنى !!!
السلام عليكم
انا يا جماعه معايا جيب شيروكى 93 اربعه سلندر 2500 سى سى كنت مش بفهم حاجه فى البنزين واستهلاكه بالاضافه ان عوامة البنزين عندى بتخرف ومش دقيقه فكنت مبخدش بيها وكل مشوارين تلاته بروح احط بنزين للاخر طبعا خراب بيوت كده مؤخرا عرفت ان عربيتى بتعمل من 180 الى 200 كيلو فى الصفيحه وعرفت ان الصفيحه 20 لتر وانا عربيتى بتاخد حوالى 65 لتر يعنى نقول تلات صفايح يعنى المفروض لما احط بنزين للأخر واملى التانك يمشينى 600 كيلو ولو اعتبرنا الدنيا زحمه وانا عربيتى بايظه مثلا نقول 400 كيلو ! لكن كانت الصدمه بقى انى بعد اخر مره حطيت تفويله صفرت العداد وقولت مش هحط بنزين قبل 400 كيلو ده لان عوامه البنزين بايظه ومش عايز اخد بيها لكن بعد 107 كيلو لقيت اللمبه نورت !!!!!!!!!!!!! فى الاول قولت لا دى العوامه بايظه انا هفضل واثق من نفسى ومش هحط بنزين ده لسه بدرى بعدين قولت لا انا ممكن احط واشوف حطيت كام واحسب عدد الكيلووات اللى مشتها على لترات البنزين اللى حطيتها واعرف حرقت قد ايه فى كام كيلو لكن اتصدمت ولقيت العربيه خدت 40 لتر بنزين ده معناه انى حرقت 40 لتر فى 107 كيلو ازاااااااااااااااااى يا جماعه !! يعنى بدل ما ال50 لتر دول يمشونى 400 او 300 كيلو مشونى 107 بس ! بصوا انا العربيه مش بخرج بيها غير مره فى الاسبوع بمشى بيها فى المره دى 27 كيلو والطريق بيبقى فى الغالب سالك لانى بختار وقت رايق واحيانا بيبقى زحمه فى بعض المناطق وبعدين بيسلك اسلوب سواقتى هوه انا لما بلاقى الطريق قدامى فاضى بدوس بنزين جامد وبحب اسمع صوت الموتور عالى واستمتع بسحبه العربيه القويه تقريبا بخلى الار بى ام على تلاته او اعلى شويه "مع العلم انى مش متهور خالص يعنى لو قدامى فاضى بدوس واجرى لكن لو ظهرت عربيات والطريق بدأ يزحم بهدى ومباخدش غرزه " أحيانا بسقط غيار يعنى مثلا ماشى على كوبرى عالغيار التالت على سرعه 40 وعلي يمينى اتوبيس ماشى براحه والعربيات ورا بتزمرلى عشان اعدى الاتوبيس لو فضلت دايس بنزين السحب مش هيبقى قوى فبدى التانى واقرص وانطلق برده احيانا بسيب الغيار كتير من غير ما انقل وخصوصا التانى لان السكه بتبقى زحمه ولو مشيت شويه هتقف تانى فبكسل اجيب غيار وارجع اجيب غيار تانى وكده ونظرا انى بخرج بالعربيه مره واحده فبطر انى انزل الجراج اسخنها تلات مرات فى الاسبوع عشان البطاريه متنمش التسخينه بتاخد من ربع الى نص ساعه وساعات بقعد ادوس بنزين واعلى صوت الموتور السؤال بقى معقول حتى لو انا بسوق غلط ولو انا بمشى فى الزحمه يبقى الفارق كبير اوى كده يعنى بدل ما ال 40 لتر يمشونى 400 كيلو او حتى 300 يمشونى 107 !!! انا قررت انى بعد التفويله دى هغير من اسلوب سواقتى تماما وهبطل الحرق عمال على بطال وهحاول فى الطلعه الار بى ام ميزدش عن 1 وهحاول مسيبش الغيار كتير بس تفتكروا لو عملت كده ممكن ارجع الفارق واخلى العربيه تحرق ال 40 لتر دول على 300 كيلو على الاقل ؟ طب لو كل الحاجات اللى قولتها دى متوصلش للفارق ده وكده هيبقى العيب من العربيه تفتكروا ايه هوه السبب او المشكبله ممكن تكون منين ؟ |
رد: هتجن :استهلاك البنزين صدمنى !!!
اولا اسلوب سواقتك مش قوى لدرجة انة يعمل 107 كيلو فى 40 لتر حتى لو حارق على 5 اربى
كدة انت عندك مشكلة ولازم تحلها اولا ممكن الرشاشات بتسيل وممكن السيرفيس بقالك كتير معملتوش اللى هو فلتر بنزين ودا مهم اوى وممكن يكون سبب رئيسى فى المشكلة فلتر هو لا يقل اهمية عنة وزيت وفلتر زيت وبوجيهات اعمل دول الاول واكشف على الرشاشات وشوف وانا متابع معاك كل يوم لحد ما توصل للحل باذن الله |
رد: هتجن :استهلاك البنزين صدمنى !!!
اقتباس:
طيب اسلوب سواقتى مش قوى حتى بالنسبه للموتور 2500 سى سى ؟ عالعموم هشوف بقى وابقى اروح للميكانيكى وامرى لله مع انى بكره واقفته الصنايعيه واستغلالهم ومش بحب اروح غير لو فيه مشكه كبيره طب هل ممكن يكون من ضمن الاسباب "الاسبراتير" ؟ |
رد: هتجن :استهلاك البنزين صدمنى !!!
من اللي حضرتك بتوصفه... فيه احتمال لكذا حاجة طريقة السواقة عادية من وجهة نظري... ما تعملش كل الفرق ده.... إنما حكاية التسخين دي 3 مرات في الأسبوع... دي أكيد ليها تأثير... أتوقع أنك ممكن تستهلك من ربع إلى نص لتر في كل مرة من غير أي تغيير في عداد الكيلومتر، يعني حوالي 1 إلى 2 لتر في الأسبوع استهلاك بنزين بدون استفادة فعلية بس من المؤكد إن العربية فيها مشاكل تانية... عشان كده محتلجين نشيك على كذا حاجة: * دايرة البنزين مفيهاش تسريب... من أول التانك لحد الكاربيراتير أو الرشاشات * نسبة الخليط سليمة.... يعني الرشاشات سليمة / أو الكاربيراتير متعاير صح * توقيت الإشعال مظبوط * تاكيهات الموتور مظبوطة * مفيش أي معوقات للحركة... يعني فرامل قافشة مثلا... أو اسطوانة دبرياج مفوتة... أو عمود كردان معووج * ضغط الهواء في الإطارات مضبوط صح ومفيش كاوتش مهوي * زوايا العجل سليمة إيه تاني؟؟؟؟؟ مش عارف.. ده اللي جه في دماغي حاليا لو عايز تعرف طرق تانية لتوفير البنزين... ادخل على الموضوع ده: http://masrmotors.com/vb/showthread.php?t=61557 ... |
رد: هتجن :استهلاك البنزين صدمنى !!!
رأى الخوة الاعضاء اكثر من رائع ..... و المشكلة مش حتخرج عن الى ذكروه ان شاء الله
الى حصل معايا قبل كدة ان الماسورة الى داخلة على الكاربراتير بدات فى تسريب البنزين .... و طبعا البنزين ده كان بيتبخر على طول من حرارة المحرك الاستهلاك الى حضرتك ذكرته فى البداية .. اعتقد ان ده استهلاك ال 6 سلندر |
| الساعة الآن 02:22 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017