مصر موتورز مجتمع السيارات - كل ما يخص 128 عن تجربة ع مدار 5 شهور, أنقلها إليكم ع طبق من ذهب.

بسم الله الرحمن الرحيم,
النهاردة و بتاريخ 14 - 4 - 2014 تم بيع عربيتي نصر 128 موديل 1977,

و بالمُناسبة دى حبيت أقولكم كل تفاصيل العربية اللي عرفتها علي مدار الـ5 شهور اللي فاتت و هي المُدة اللي قعدت معايا فيها العربية.

بصراحة مش عارف ابدأ منين ولا أقول إيه لكن هحاول بقدر الامكان اقول كل عيوب العربية دي و مميزاتها,

صحيح العربية رخيصة و في متناول الجميع و قطع غيارها زي ما بيقولوا عند البقال لكن في المقابل بردوا ان كل كام يوم بتجيب قطع غيار و قطع الغيار اللى موجودة كلها بلا استثناء مضروبة.

يعني لو هتركب شاهين مثلاً و تجيب قطع غيار معين بـ200 جنية هتقعد معاك سنة
لكن لو راكب 128 و هتجيب نفس قطع الغيار بـ50 جنية هتقعد معاك أسبوع و عن تجربة محدش يزايد ع الكلام لأني شوفت الويل و المرار ف العربية دى

دي أول نقطة بالنسبة لسعر قطع الغيار.

النقطة التانية الصنف دة من العربيات اللى هي 128 لازم تاخد بالك منها اووووووووووووووووووووووى و لازم تكون حنين عليها و لازم تاخد بالك من كل صوت بتطلعه العربية عشان ده بيكون تنبيه لمشكلة كبيرة جاية.

بالنسبة للأصوات انا هقول كل الاصوات اللي مرت عليا و أسبابها و علاجها,

لو العربية بتطلع صوت طقطقة ف الملفات يبقي ده كوبلن و الصوت بيحذرك انك تغير الكوبلن عشان العجلة متفرتش منك ف ملف ولا تفوجئ ان العجلة ف مكان و انت ف مكان في الحالة دي تروح لعفشجي يغيرلك جوز كبالن صيني يقعد معاك سنة جوز الكبالن ب 200 جنيه تقريبا و مصنعية 100 جنية :fun_car:,

لو العربية وانت ماشى من مجرد ما تشيل رجلك من علي دواسة البنزين بطلت منك و دورت و بطلت و دورت و بطلت يبقى ده عيب مسمار الكاربرتير عايز يتنظف عند أي ميكانيكي او بتاع كاربترتيرات ينظفهالك ب 20 جنيه و ده بيكون بسبب تجمع اوساخ و شوائب البنزين علي المسمار المسؤل عن مرور البنزين ف الكاربرتير:fun_broken:,

لو العربية وانت ماشي لقيتها بتنتش منك و السرعة حسيت انها مكتومة مش زي كل يوم معاك يبقي ده عيب بوجيهات تطلع زي الشاطر ع قطع الغيار تشترى طقم بوجيهات فلاج ب 30 جنية و تغير بوجيهات و انت عند الميكانيكي بتغير البوجيهات خليه يبصلك ع البوجيهات القديمة لو مهببة و فيها هباب حرق يبقي بعد ما تغير بوجيهات تروح لبتاع الكاربرتير ينظفلك الكاربرتير عشان الحرق فيه زيادة و بيهبب البوجيهات و لو البوجيهات كانت فيها زيت لقدر الله يبقي الموتور بتاعك بقي خفيف و اعمل حسابك انك داخل علي عمرة موتور و غالباً هيكون طقم شنبر مش عمرة http://www.masrmotors.com/vb/images/...AD96%7E139.GIF

لو أنت ماشي بالعربية و حسيت بالانوار بقت ضعيفه اوي و البطارية نامت يبقي حاجة من الاتنين ملهمش تالت ( البطارية عليه العوض أو الدينمو فيه مشكلة و مش بيشحن البطارية ) و في الحالة دي تروح للكهربائي و يعرفلك العيب منين و يصلحه http://www.masrmotors.com/vb/images/...86B2%7E161.gif

لو العربية لقيت أصوات خبط من تحت وانت بتزود بنزين و الاصوات دي ف النص اللي قدام من العربية يبقي غالباً الشكمان الافيز بتاعه وقع و عايز افيز لانه مع حركة العربية و في طلعتها العربية طبيعي انها بترج جامد و بيحرك الشكمان بيخليها تخبط في العفشة من تحت و الافيز بتاع بتركيبة بسلاطاته و باباغنوجه ب 40 جنية. اما لو مطلعش شكمان فهيكون العفشة عايزة تتربط و لازم تروح عند عفشجي محترم يربطلك كل مسمار في العفشة :hech:

لو انت واقف بالعربية و لقيت صوت الموتور عالي عن اللزوم يبقي تروح لبتاع الكاربرتير يظبطلك صوت الموتور عن طريق مسمار الهواء,

لو انت ماشي بالعربية و حسيت ان العربية بتحدف يمين و مش مستقرة في الارض يبقي تروح لظبط الزوايا عشان يظبطلك زوايا العربية و بالمرة تطمن ع حالة الكاوتشات بتاعتك و الكاوتش ثم الكاوتش ثم الكاوتش اوعي تهمل ف موضوع الكاوتش و تقول ياعم دي 128 ياعم كبر يا عم نفض اووووعي هتندم و كل يومين هتفسي و هتتخرم منك و هتبهدلك أخر بهدلة و لو بتدور ع نوع كاوتش كويس عليك و علي ساندرا تايلاندي الفردة ب300 جنية و محترم جداً :Wkiss5:

لو حسيت ان الفرامل الكبس بتاعه بيجي من الاخر و ضعيف اتأكد من زيت الفرامل عشان ممكن يكون نقص او فضي خالص و هات علبة باكم ب 10 جنية و املاه لكن لو لقيت زيت الفرامل موجود يبقي التيل عايز يتغير و عموما طقم تيل امامي و خلفي بتركيبه و كل شئ مش بيعدي 120 جنية و عن تجربة :1336:

اما بقي لو سمعت صوت من الابواب و العربية ماشي الابواب عاملة مزيكا يبقي غالباً انت اتضحك عليك ف العربية دي او بمعني أصح بدأ يكون في شرخ ف القايم بتاع العربية و عايز يتلحم و عايز تركب خابور لباب العربية عشان يتظبط لانها بقي واسع في القفل بتاعه و فرق وسع الباب في القفلة بيخليها تتحرك مع العربية و تعمل صوت مزعج :fun_10_1_124[1]:

اما لو أنت ماشي بالعربية و حسيت ان السحب بتاعها ضعيف جداً و الفتيس بيعض كتير و اتأكدت ان البوجيهات و الكبلاتين و الكوندنسر أو بمعني أصح ( طقم الكهرباء ) اتأكدت انهم كويسين يبقي الحالة دي العيب في طقم ديسك و أسطوانة و ده سعرهم بتركيبهم و بكل حاجتهم ب350 جنية :110105no44:

امممممممممممممممممممممم إيه تاني !؟؟؟؟

لو العربية وانت ماشي طلعت دخان ابيض من الشكمان و عمالة بتطلع الدخان ده في بنسبة 99% العربية عايز طقم شنبر يعني ربع عمرة و بنسبة 1% العربية عايزة عمرة كاملة و ده هيبان لما تحل الموتور و تخلي الميكانيكي يحددلك
بالنسبة لمصنعية طقم الشنبر كله علي بعضه بالشراء بمصنعية حوالي 700 جنية لكن لو عمرة كاملة من 1600 ل 2000 جنية MAD

لو العربية طلعت دخان لونه أسود ف ده عيب في الكاربرتير عايز يتظبط :thnkr:

لو العربية فيها أصوات غريبة حاول تفضي العربية من اي شئ يخصك بتتحرك زي موبايلك مفاتيحك تليفونك اي حاجة بتتحرك ف العربية و امشي بالعربية و حدد الصوت منين و غالباً هتلاقيها من العفشة او من المساعدين :3mla:,

الحاجات اللي لازم تاخد بالك منها في العربية.

- كل يوم الصبح قبل ما تدور تطمن علي الزيت من حيث لونه و المقياس بتاعهُ.

- كل يوم الصبح قبل ما تدور لازم تتأكد من الريداتير و المياة و لازم تعرف ان الطبيعي بتاع العربية انك تزودلها مياة كل يومين او تلاتة لكن لو كل شوية بتزود مياة يبقي في حاجة في الريداتير و غالباً هتلاقية مخروم.

- لازم تاخد بالك من الزيت كويس اوووي و الزيت تستعمل أفضل زيت للعربية دي و هو زيت التعاون الاحمر ب55 جنية, و ده بيتغير كل 1000 كيلو و الافضل انك تغير علي 900 كيلو عشان احنا داخلين ع الصيف و الموتور يكون مرتاح.

- لو لقيت الموتور من قدام بيرشح زيت لازم تروح لميكانيكي عشان يتطمن ع الموتور لانك تقريبا داخل علي عمرة أو طقم شنبر.

- العربية متعرضهاش لمياة كتير يعني متغسلهاش كل يومين تلاتة لأن كتر غسيلها يعرضها للبارومة بشكل كبيررررر.

- لازم تتاكد من كل جزء ف العربية ان مفيهاش بارومة عشان لو فيها بارومة و انت أهملت فيها البارومة هتكبر و هينتشر ف العربية و هيكل العربية هيبقي ضعيف جداً و من أقل خبطة هتتأثر.

- لازم كل يومين او تلاتة اول ما تدور العربية و تتحرك تروح لبتاع كاوتش يتطمن ع الهواء و هي باردة أفضل من وهي سخنة عشان يظبط ضغط الهواء.

- اوعي تنسي الطوارئ ( الاستبن و الكوريك و الصليبة ).

- أعرف دايماً ان العربية لو أنت اهملت فيها مشكلة كانت هتتحل ب 100 جنية, بسبب أهمالك ده المشكلة هتكبر و هتتحل ب 500 جنية, و عن تجربة.

- مينفعش تدور العربية و تتحرك ع طول لازم تسيبها تسخن ع الاقل الحرارة تكون علي 75 أو 80

- خد بالك من مؤشر الحرارة لو جت علي 91 او 92 و المروحة مشتغلتش يبقي عندك مشكلة في ثرموستات الحرارة و دي بتتغير ب 25 جنية و مصنعية 20 جنية عند الكهربائي.

- لو لقيت مؤشر الزيت وانت ماشي بالعربية عمالة تنور ولما تزود بنزين بتنطفى ده غالباً بيكون سبيكة الزيت عايزة تتغير و دي ب 300 جنية بالمصنعية و خلي بالك لو مؤشر الزيت نور و منطفاش وانت بتزود بنزين اوعي تمشي بالعربية لازم تقطرها للميكانيكي عشان يعملك سبيكة الزيت و إلا هتندم و هتدخل في عمرة موتور.

- لو لقيت مؤشر البطارية بتنور ع خفيف اوي و بتنطفى اعرف ان بطاريتك مش بتشحن كويس و في مشكلة في الدينمو أو البطارية.

- لو سمعت صوت خبط ف العجلة وانت ماشي بالعربية ده غالباً بيكون بلية العجل و لازم ع السريع كده تغيرها و دي بمصنعيتها حوالي 100 جنية,

لو حسيت وانت ماشي بالعربية و بتاخد يمين او شمال و الدركسيون مش بيستجيب معاك بسرعة ارجع ظبط زواياك و اتطمن ع الكاوتش.

ده كل اللى انا مريت بيه بصراحة و اللي عايز يستفسر عن أي شئ يتفضل وانا بقدر الامكان هفيدك باللي اعرفه بأذن الله.

نصيحة اخوية من اخ ليكم مجرب
حاول متصرفش علي العربية كتير يعني متتفشخرش بالمصاريف ع العربية لانها في الاول و في الاخر 128 و مهما كنت صارف عليها إلا انك و انت بتبيع هتلاقي اللي هيشتري منك بيقولك مش ذنبى انك صرفت عليها خد حاجتك معاك.

صدقني و عن تجربة شخصية فعلاً دي ف الاول و الاخر 128 اه جميلة و لذيذة لكن هتاخد منك كتير و هتديك قليل.

و ربنا يرزقكم و يكرمكم ببيعها و تدخلوا في الاحسن و الاحدث بأذن الله.

و اخيراً اتمني لكن الدعاء بالمغفرة و الرحمة لامواتنا جميعاً.

و ده أخر موضوع ليا ف قسم 128 لكن هتواجد في القسم في حالة الرد علي استفساركم أو أي طلب ليكم و من فترة للتانية هدخل القسم هنا للمساعدة في أي شئ انا أقدر عليه.

اخوكم احمد الجارحى.