مصر موتورز مجتمع السيارات - معروض عليا رينو ميجان 2006 اوتوماتيك \ والمهندس بيشكر فيها

مصر موتورز مجتمع السيارات (https://www.masrmotors.com/vb/index.php)

- رينو ميجان Mégane (https://www.masrmotors.com/vb/forumdisplay.php?f=159)

معروض عليا رينو ميجان 2006 اوتوماتيك \ والمهندس بيشكر فيها

السلام عليكم
انا يا جماعه النهارده روحت شوفت رينو ميجان 2006 اوتوماتيك ماشيه 60 ألف كيلو و مطلوب فيها 68 وهنحاول نوصلها ل 65 وبصراحه العربيه عجبتنى اوى من بره وخصوصا من جوه مقارنه بعربيتى الحاليه جيب شيروكى 93 يا جدعان العربيه مليانه اوبشانات و حاسس بفرق شاسع ونقله لايستهان بها من سنه93 الى سنه 2006
فى مهندس معرفه الراجل ده ماشاء الله عند ورشه كبيره جدا ومستوى عالى وشغله فى الرينو كان معانا
وسألته عن أغلب الأقاويل المتضاربه عن رينو زى مشاكلها و عيوب التصنيع و السمعه اللى واخداها
قاللى بالعكس كل ده كلام فاضى وانا مسؤل قدامك
قولتله طب ازاى عربيه 2006 و اوتوماتيك وبالامكانيات دى و ب 68 الف
قالى من الاخر عشان احنا مش بنفهم فى العربيات ومش بنقدرها ودى ثقافة سوق مش هتقدر لا الميجان و لا اللوجان يغيروها
وكمان شكرلى فى توكيل رينوا وقايللى انا مغير بطاريه و طرمبه بنزين ببلاش وبيقولى الخدمه ممتازه
ملحوظه : احنا كان قدامنا Bmw 316 موديل 92 و رينو ميجان 2006 انا وانا رايح اشوف العربيه كنت مستبعد الرينو وقولت لا الbmw لا يعلى عليه حتى لو 92 وكفايا انى هبقى من ملاك ال bmw
لكن لما دخلت الرينو حسيت بتقله كبيره وامكانيات عاليه و حابب اركب عربيه 2006 وكمان اوتوماتيك
العربيه معششه فى نخاشيشى يا جماعه :fun_36_3_1[1]:
وحابب اعرف رأيكم

رد: معروض عليا رينو ميجان 2006 اوتوماتيك \ والمهندس بيشكر فيها

والله ياباشا ربنا يسعدك

وانا برضه باعشق شكلها بس برضه لازم نعرف ايه سبب الانهيار الكبير فى سعرها

وكمان انا سمعت ان مشاكلها كتير ومش بتتحل الا فى التوكيل وبفلوس كتير طبعا وده اللى مقلل تمنها

وكمان برضه تقيله قوى فى بيعها

من الاخر اللى يجيبها يبقى عاجبه شكلها ومش فارقه معاه اى فلوس بعد كده

رد: معروض عليا رينو ميجان 2006 اوتوماتيك \ والمهندس بيشكر فيها

اقتباس:

المشاركة الأصلية كتبت بواسطة ezzat2002mo (المشاركة 510206)

شكرا يا ستاذ عزت على ردك واهتمامك
والعربيه الصراحه كشكل عام من بره وجوه حالتها زيروووووو
وعجبنى اووووووى انها اتوماتيك:286:
والمهندس تخصص رينو بيأكدلى انها لقطه
وهو نفسه معاه رينو فلونس
واذا كان على ان بعض الاعضاء بيقولوا مش رياضيه انا اصلا مش غوى جرى ومناوره وكده انا سواقتى هاديه ومش بنزل بالعربيه كتير

رد: معروض عليا رينو ميجان 2006 اوتوماتيك \ والمهندس بيشكر فيها

اقتباس:

المشاركة الأصلية كتبت بواسطة ahmedraafat00 (المشاركة 510291)

ياباشا اولا انا مش باكسر فرحتك وعلى فكرة كلامى ده مش عن تجربه بس من ناس مجربه

لو انت فى دماغك العربيه ومش فارق معاك مشوار التوكيل واى مبلغ هاتدفعه توكل على الله لانها عربيه كل حاجه فيها كمبيوتر حتى الكونتاكت والشنطه بكارت كمبيوتر

انما لو عاوز عربيه لما تعطل تقدر تصلحها فى نفس اليوم وصيانتها مش غاليه يبقى دور على حاجه تانيه تخش مزاجك

وبرضه الراى النهائى لك

رد: معروض عليا رينو ميجان 2006 اوتوماتيك \ والمهندس بيشكر فيها

حضرتك انا مخصص مبلغ تقريبا قد المبلغ اللي مع حضرتك للعربيه يعني وتقريبا حيرتي كلها بين النيسان 2007 والاوبترا 2006/2007 المهم انا ركبت ميجان بتاعة واحد صاحبي وعجبني الاوبشن الكتير اللي فيها بس قبل ما اكمل اعجابي كان صاحبي عمال يحكيلي عن ماساته مع التوكيل ومع العربيه ومع الدنيا كلها وبقيت حاسس اني ناقص اني اهديله الاضاءه وانزله الكرسي عشان اعرف مشكلته المهم اني حضرتك لو ناوي تشتري العربيه لازم يكون عندك وقت كتير فاضي انك كل شويه تروح التوكيل وبردو لازم يكون حضرتك مخصص مبلغ محترم كل شويه للصيانه وبعد لما تيجي اوعي تخليها تقرب بس جنب ورشة اي ميكانيكي لانو هتخرب ومن الاخر ممكن توصل لمرحلة انك هتكون مدمن توكيل وعامة اصحاب الرينو ميجان كلهم بيعتبرو التوكيل ده بيتهم وبيعتبرو العاملين فيه اهلهم وناسهم لانهم بيقعدو معاهم اكتر ما بيقعدو مع اولادهم بجد نصيحه بلاش وانا شايف اني فيه الفئه السعريه حاجات كتير افضل بمراحل ثم اني انا اصلا شاييف ان 65 كتير عليها وفي الاخر احب اقول لحضرتك ان الانسان لما بيفكر يشتري عربيه بيشتري عربيه عشان تريحه مش تتعبه ارشحلك بالمبلغ ده نيسان او اوبترا او هيونداي نيو اكسنت او رينو لوجان جديد لو كنت من هواة الرينو