مصر موتورز مجتمع السيارات - تفويلـة عملت 265 كيلو بس!! ما اسباب استهلاك البنزين العالى؟

السلام عليكم ورحمة الله
الاستاذ سمير والاخوة اعضاء المنتدى .. قمت بحل المشكلة الاخيرة ولله الحمد والتى تتعلق بفقد السحب اثناء السير
بالاضافة لتوقف الموتور بشكل مستمر مع صوت غريب للموتور " صوت ضعيف كأنة مخنوق " وعند الضغط على الاكسلتير بمجرد لمسة يتوقف الموتور عن العمل .

المشكلة تتخلص فى الكربراتير + الاسبراتير .
بالنسبة للكربراتير : قمت بفكة قطعة قطعة بناءاَ على الكتالوج الخاص بالكربراتير يشرح عمل كل قطعة بشكل جيد
ووجدت ما يعيق عملة " لدى صور اثناء الاصلاح سأرفقها لاحقاَ " اولا .. عدم وجود الجزء الثانى من احد البكات " الحتة اللى تحت اللى فيها فتحات البنزين الخاصة بالبك " ووجدت فقط الجزء العلوى وهو المسمار مما يعيق سير البنزين داخل الكربراتير بشكل طبيعي
" تخيل لو كنت رحت لبتاع كربراتير وقلت لة الكربراتير بايظ كان هيفطس م الضحك من منظر البك "
ولا سيما الخمسين جنية اللى هيطلبها اونطة .. المهم بعد كدة دخلت على الابرة والعوامة ولقيت العوامة البلاستيك في جزء ف النص بين القطعتين البلاستيك المنفوخين .. لقيت الجزء اللى بينهم دة متنى ثنة .. البشمهندس اللى فتحة علشان يكشف علية عوجة اكيد وهو بيقفل ! .. الخطأ الثالث : لقيت سوستة " مكنة الفاكيوم " مش فى مكانها ومتنية وطبعا متنية لانها مش ف مكانها اساسا ولما تضغط اكسراتير المفروض ان دراع الاكسراتير يضغط اثناء مشوارة دراع مكنة الفاكيوم علشان تبدء تشفط بنزين عن طريق الجلدة اللى جوة . لقيت مسمارين فى اماكن متفرقة بيلفو ع الفاضى غيرتهم .. بعد ما اطمنت على كل حاجة ورجعت كل بحاجة لمكنها واستخدمت بعض القطع القليلة من القديم اخدتة ورحت اركبة ف العربية .. " اخد منى ساعتين عمل " دورت السيارة وظبط مسمار الهوا ومسمار البنزين .. ولاول مرة ف حياتى اظبطها بنفسى بشكل صحيح .
وتأكدت من عدم وجود رعشة ف المكنة " رجة " بالاضافة لعدم وجود دخنة .. وبالنهاية تـعريق الشكمان مياة وهى المؤكد لنجاح العملية . بعدها خليت الميكانيكى راجع عليها ولم اخبرة انى اصلحتها وفهمتة انى رحت لبتاع الكربراتيرات وان خنقة الموتور فكت .لوحدها ومقتنعش طبعا .. دة بالنسبة للكربراتير

الاسبراتير : المشكلة كانت فى الجلبة اللى طلبو انى اعملها لة ومكنتش اعرف انها مسكن .. الميكانيكى كان مغير لى ابلاتين وكوندنسر امبارح ومعرفش يظبط كهربا ولا يعمل حاجة لمشكلة الكربراتير .. وطبعا البوش اللى كان موجود ف الاسبراتير كان العائق الاكبر فى عدم خروج كهربة مناسبة للسيارة مع مشكلة الكربراتير الاتنين عملو اتفاقية وعطلو السيارة بشكل كامل .. لان الاتنين روح السيارة . ظبط كهربة الاسبراتير لاول مرة باردو ف حياتى من المسمار او الصامولة اللى بيقولو عليها ودى كانت الخطوة الاولى قبل ظبط هـواء الكربراتير
يعنى كهربة الاول ثم ضبط هواء الكربراتير .. لسة هخلي الميكانيكى يراجع على ظبطة الكهربة لانى اول مرة اعملها لكنى حاسس انها مظبوطة الحمد لله .. لان مفيش رجة او رعشة من المحرك .. والحرق مظبوط ومفيش دخنة وصوت المحرك طبيعي .. خرجت جربت العربية لمسافة قصيرة والحمد لله زى الفل وفـايقة جداَ .. كانت نايمة وصحيت

انا سعيد لانى قمت بعمل اشياء لاول مرة وتكون النتيجة مرضية ومظبوطة .
كدة الحمد لله خلصنا المشكلة الاخيرة ... نرجع بقى للمشكلة الاولى " حاسس انى هضرب من حد معين هنا :) "
بعزك والله يا بشمهندس سمير :) ... المشكلة هى استهلاك البنزين المبالغ فية .. جبت جركن وفكيت الكنبة اللى ورا ثم خرطوم الراجع وحطيتة ف جركن ودورت العربية وانتظرت لحد ما بدء الخرطوم يرمى بنزين ف الجركن .. نزلت اخدت لفة كاملة تحت العربية " كالعادة مفيش اي تسريب بنزين " رجعت كل حاجة مكانها ومش عارف اعمل اية تانى ... لقيت تعريق خفيف جداَ من مدخل البنزين فى الكربراتير وطبعا التعريق دة عمرة ميوصل استهلاك البنزين لهذة الدرجة .. جبت كولية جديد وقطعت جزء من الخرطوم وقفلت الكولية على اخرة لدرجة انى كسرت 2 كولية من الضغط عليهم وقفلهم بشكل كبير وباردو فية تعريق بنزين خفيف . معذرة على الاطالة ولكنى اردت
افادة الغير في ما وجهتة وما قمت بعملة حتى ان صادف احدكم هذة المشكلة يكون على دراية بها .