مصر موتورز مجتمع السيارات - تقرير عن شيفروليه اوبترا

بسم الله الرحم الرحيم

الشكل الخارجي
طبعا الاوبترا تتميز بتصميم رزين ومفيهوش خطوط او تعاريج كتيرة وطبعا تصميم قوي وحلو على الرغم انه بقاله فترة متغيرش
من الجانب تتميز بخطوط هادئة وانسيابية مقبولة جدا
من الخلف تتميز بمصابيح رياضية قوية ورائعة وتصميم جيد جدا جدا
والعربية تاخد 9/10 من حيث التصميم

المحرك والفتيس
محرك السيارة هوا محرك بنزين متوسط الحجم بسعة 1598 سي سي من 4 سلندر و2 كامة و16 صباب يولد قدرة حصانية تقدر 107 حصان عند 5700 دورة في الدقيقة وعزم قدره 150 نيوتن / متر عند 3600 دورة في الدقيقة والتسارع من 0 الي 100 في زمن قدره 10 ثواني تقريبا واقصى سرعة في حدود ال180 كم/س ومتوسط الاستهلاك في حدود ال7.5 لتر لكل 100 كم
وطبعا العربية نازلة مصر بنوعين من الفتيس اولهم فتيس مانيوال 5 سرعات والتاني فتيس اوتوماتيك من 4 سرعات
والعربية تاخد تقيم 9/10 من ناحية المحرك والفتيس

العفشة والفرامل
بصراحة انا معرفش نوع التعليق بس بصراحة نظام التعليق فيها ممتاز ومدي العربي ثبات رهيب جدا وكمان العفشة حلوة جدا جدا وارتفاع العربية عن الارض 160 ملم ودا كويس جدا علشان الطرق المصرية وتتميز انها متوفرة بجنوط عادية مقاس 15 بوصة
وفرامل العربية على الرغم انها مش ABS الا انها قوية جدا ودا نظرا لان الاربع عجلات دسكات ودا مقوي الفرامل جدا جدا
والعربية تاخد تقييم 8/10 من حيث الفرامل و9/10 من حيث العفشة

الابعاد والوزن
ابعاد العربية معقولة جدا طولها 4515 ملم وعرضها 1725 ملم وارتفاعها 1445 ملم وقاعدة العجلات 2600 ملم ووزنها 1240 كيلو ودا وزن تقيل نسبيا
والعربية تاخد تقييم 7/10 من حيث الابعاد والوزن

التابلوه
على الرغم ان التابلوه فقير نسبيا مقارنا بالاكسنت او الريو الا ان تصميمه جميل جدا وهادئ وكمان اضائته بليل حلوة وجميلة وهادية وخامات الطابلوه معقولة جدا جدا بالنسبة لعربية بالسعر دا
والعربية تاخد 7/10 من حيث التابلوه

الوسع الداخلي
ماشاء الله صالون الاوبترا واسع ومريح جدا جدا والعربية تشيل 5 مرتاحين جدا جدا والكراسي تنجيدها ممتاز ومريحة والشنطة واسعة جدا على الرغم ان مساحتها قليلة نسبيا 405 لتر
والعربية تاخد 10/10 من حيث الوسع الداخلي

الخامات والتقفيل
بصراحة تقفيل العربية حلو جدا وخاماتها معقولة مقارنا بسيارات نفس الفئة
والعربية تاخد تقييم 8/10 من حيث التقفيل والخامات

السوند سيستم
على راي المثل اقرب طريق لقلب السائق الساوند سيستم هههههههه
بصراحة الساوند سيستم محترم جدا والسماعات قوية جدا ونقية وحلوة
وطبعا كاسيت العربية CD & MP3 باربع سماعات
والعربي تاخد 10/10 من حيث الساوند سيستم

الكماليات
العربية فقيرة نسبيا من حيث الكماليات
تكييف باور سنتر جهاز انذار بريومت كونترول ازاز ومرايات كهربا فتح الشنطة من الداخل كاسيتCD & MP3 باربع سماعات وفرش قماش وفوج لايت امامي واربع مساند راي متحركة وزجاج مظلل
والعربية تاخد 6/10 من حيث الاوبشن

عوامل الامان
العربية مفيهاش اي عوامل امان الا حزام الامان هههههه
العربية تاخد صفر/10 من حيث وسائل الامان

التوكيل
طبعا من اسوا التوكيلات في مصر منصور وعلى راي المثل تغور من وش منصور
التوكيل تقييمه ــــ10000 /10 دا اقل واجب والله

قطع الغيار واعادة البيع
قطع غيار الاوبترا في كل مكان والحمد لله واعادة بيعها ممتازة وكويسة
والعربية تاخد 10/10 من حيث قطع الغيار واعادة البيع

المميزات والعيوب
العيوب تتمثل في انعدام وسائل الامان وكمان قلة الاوبشن واهم عيب طبعا هوا التوكيل
اما المميزات فهيا كتيرة جدا مثل قوة المحرك والفرامل والتكييف والوسع الرهيب والعلو عن الارض والثبات الحلو وقطع الغيار اللي في كل مكان وحاجت كتيرة تانية

في النهاية الاوبترا عربية محترمة جدا وممتازة وانا اعتبرها افضل عربية في الفئة دي :Wkiss5: