مصر موتورز مجتمع السيارات - كارثة بكل المقاييس....!

السلام عليكم.........
الاخوة الافاضل صباح الفل وكل سنة وانتم طيبين بمناسبة عيد الفطر الكريم(مش هقول المبارك)!!!
حصل معايا موقف غريب جدا وكان حوار صعب عليا اوي ...ايه اللي حصل؟؟
كنت ماشي الاسبوع اللي فات الساعة 11 بالليل وفي نص شارع الهرم موجود كدة مطبات حديد بيسموها السواقين (عين القط)....كنت علي سرعة 60 تقريبا واول ماعديت المطبات دي لقيت العربية بطلت والطابلوه بينور...!غريبة صح.؟
طبعا كنت ماشي ف الشمال ..نزلت زي الشاطر وزقيت العربية وركنت تحت كوبري المريوطية....وفتحت الكابوت وعملت نفسي فاهم وكدة.....!وعرفت لوحدي ان الكابل الواصل بين الموبينة والاسبراتير سايح من ناحية الموبينة...!!!!
طبعا فضلت ادور علي ميكانيكي اشتري من عنده الكابل ده والحمد لله بعد عذاب لقيت واحد ميكانيكي واشتريت منه الزفت ده ب 10 جند
ركبت الكابل والعربية حلفت مش دايرة....اتخنقت جدا ...كانت الساعة 1 بعد نص الليل....! سبت الماروتي تولع بجاز ..ودورت علي مطعم (فولت) التانك وبعد كدة دورت علي قهوة ..عمرت الدماغ بحجرين شيشة وواحدة مظبوط...!
ورجعت للقرف بتاع الماروتي قعدت وشغلت الكاسيت وف بالي استني للصبح اجرها للميكانيكي...المهم وانا بفتح الكونتاكت لقيت العربية دارت:wave2W21:....!!!
بصراحة مكنتش مصدق ...وفضلت ادوس ع البنزين بغيظ شديد جدا....!
طبعا حمدت ربنا ...وبطلت العربية تاني ودورتها لقيتا دارت وزي الفل...! قلت بركاتك ياحجر الشيشة..!
تاني يوم ...كنت رايح معزوم في اكتوبر ...وجريت كالعادة ...وحصل ان كان فيه مطب كدة كسر ف الطريق ...اكلته علي سرعة 70 تقريبا.....وعادي بقي ..بس حسيت ان فيه حاجة غريبة حصلت في العربية....طبعا عملت مش من هنا ومشيت عادي ..بس بعد فترة لقيت العربية طفت لوحدها...وطبعا زي اول مرة حلفت مش هتنطق خالص ...طبعا هنا مفيش شيشة وقهوة (كان قبل الفطار علي فكرة)....!
كلمت الاستاذ الميكانيكي..قالي سيبها تبرد وهتدور معاك..لان الموبينة سخنة دلوقتي...قلت تمام..طبعا كنت ف الجبل وكنت واخد فاكهة للناس اللي معزوم عندهم...بس هدايا مين بقي ده الجوع كافر( وهجمت علي الفاكهة)........!!
بعد 3 ساعات لقيت الناس اللي كنت معزوم عنهم بيكلموني ...وجابولي ميكانيكي...والكارثة الكبيرة ((((((( سير الكاتينة مقطوع))))) ربنا يستر وميكونش حصل مشاكل ف الصبابات....!!!!!!!!
سحبنا العربية للورشة ورحت اجيب سير ومطلعش نفس المقاس..ورجعت تاني اخيرا ركب السير ..واشتغلت العربية ...كانت الساعة3.30 فجرا ...قلت اسيب العربية واروح اتسحر وانام واجي لك الصبح....:cry2W9:
الحوار ده عمل بتاع 300 جند...!
طبعا الحكاية مش فلوس ...حكاية قرف وخنقةوعطلة واحراج وووووو كملو انتو بقي.....تخيلو حضراتكم من قبل الفطار لحد الساعة 3.30 الفجر ....الحمد لله انا مش متجوز وبعرف اتصرف ف الازمات...تخيلو حضراتكم لوحصل ده مع احد السادة المتزوجين ..وكان مثلا مسافر حتة بعيدة ..او لاي سبب مكانش فيه موبايلات......!!!!

حبيت انقل القصة دي عشان الناس تاخد بالها من حوار الزفت سير الكاتينة ده....
الحمد لله العربية رجعت زي ما كانت في السحب والشد وكدة ...
بس بقي فيه حاجة غريبة ..بسمع صوت حكحكة بسيطة اوي في عداد السرعة(مع انه شغال تمام) وكمان العربية بتنتش..يعني ساعات بتعمل رجرجة..كمان بحس ان فيه ونة جاية من الموتور ...والميكانيكي قالي الونة دي بسبب السير مشدود وبعد شوية هيريح والصوت هيروح... علي فكرة عربيتي مش قديمة اوي (سوزوكي ماروتي 2005) وعاملة 32 الف كيلو..................!!! !!!!!!!!!!!!
ياجماعة ارجوكم ..لازم تخلو بالكم من حوار الزفت ده ..عشان محدش عارف الظروف ماشية ازاي...
شكرا لكم واسف علي الاطالة ..بس حبيت انقل الموضوع زي ماحصل معايا بالظبط عشان الناس تاخد بالها.