رينو لوجان , سيارة ممتازة توكيل ردىء
 

السلام عليكم ,
مررت بهذه التجربة مع توكيل رينو فأردت أن أحكيها حتى يعرفها أى شخص ينوى شراء السيارة فيكون على بينة
أنا إشتريت لوجان بقالى سنتين , العربية بصراحة جميلة , عالية وسحبها كويس , وشكلها مقبول جدا وسعرها مناسب ,يعنى فلوس فى مكانها , بعض المشاكل يعنى فى نتشة فى الفتيس والتوكيل ميرضاش يصلحها , العربية بتحدف يمين شوية , بس حاجات بسيطة تضايق بس متنرفذش, لغاية ما رحت أعمل صيانة ال20 ألف فى المقطم وبعد ما خرجت من عندهم , يدوبك روحت البيت لقيت العربية بتقطع , رحت بعت إيميل شكوى , يومين وإتصلت بى واحده من عندهم , وقعدت تقنعنى إن مفيش علاقة ما بين المشكلة والصيانة وإن دية مجرد صدفة , وأنا زى العبيط صدقتها , وقالتلى إرجعلنا تانى على المقطم نشفلك إيه المشكلة , المهم رجعتلهم تانى قالولى المشكلة فى نوع البنزين اللى بتستخدمة , والمفروض أغير نوع البنزين والمشكلة هتروح بعد شوية , عملت زى ما قالوا وفضلت شهر ماشى بالعربية وهى مطلعة عينى والمشكلة بتزيد , المهم فى الاخر عملت عبيط ورحت على العبور وقلتلهم العربية بتقطع , مفيش ساعتين والمهندس راح قالى هو إنت عامل صيانة ال20 , قلتله أه , راح شوية وجيه قالى العربية خلصت وبقت كويسة , قلتله طيب كانت إيه المشكلة , قالى البوجيهات بايضة , قلتله بس البوجيهات دية جديدة متغيره فى ال20 , قالى مش عارف أقلك إيه !!
يعنى العربية كانت كويسة رحت بيها الصيانة ركبولى بوجيهات بايضة , مش بس كده دول كمان معرفوش إن البوجيهات اللى هما مركبينها بايضة بعد ما رجعتلهم تانى وشخصوا المشكلة غلط , وفوق ده كله لما كلمت الأستا\ة بتاعة خدمة العملاء تانى كان ردها الوحيد مين المهندس اللى قالك إن البوجيهات بايضة ؟ يعنى مكنش همها إن الخدمة عندهم زفت , قد ما كان هاممها إنها تعرف مين اللى كشفهم , وقالتلى أنا هرجع للتيم بتاعنا وأكلمك تانى وطبعا معبرتنيش, الكلام ده من 20 يوم

زى ما قلت فى الأول , العربية فلوس فى مكانها , بس ربنا يعينك فى الصيانة , مش هتأخد خدمة ويا ريت يسيبولك العربية أصلا سليمة

رد: رينو لوجان , سيارة ممتازة توكيل ردىء
 

اللى اعرفه \(من كلام ملاكها) ان التوكيل احسن شئ فى العربيه دى
اكيد حاله فرديه

رد: رينو لوجان , سيارة ممتازة توكيل ردىء
 

أنا بردة قبل ما أشتريها لما سألت واحد صاحبى قالى التوكيل كويس ,
بس بصراحة بعد اللى شفته
وبعد ما سمعت قصص ناس تانية فى التوكيل
رأى إتغير تماما

رد: رينو لوجان , سيارة ممتازة توكيل ردىء
 

توكيل الرينو فعلا من افضل التوكيلات في مصر بس للاسف برضة كل قاعده ولها شواز فرع المقطم من اسواء فروع الرينو في مصر

وحضرتك كان المفروض لما سالتك عن اسم المهندس اللي عملك الصيانة في العبور كنت اخدت اسمها هي وقدمت فيها هي الشكوي عشان دا مش سؤال يتسال لعميل المفروض كان عنده مشكلة واتحلت

بس سؤالي لاخونا the1stguest حضرتك شفت ايه من توكيل الرينو وعلي فكرة هو هو توكيل ال KIA خلاك تغير رايك في التوكيل ؟؟؟؟

انا عن تجربة سنتين لوجان وسنة وشوية سانديروا دا غير كام شهر كارينز الحمد لله توكيلات اسكندرية سواء في العامرية او سموحة قايمين بالواجب وزياده وخصوصا سموحة اللي انا غالبا ما بعمل عنده صياناتي