مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)
-   مقارنات (https://www.masrmotors.com/vb/forumdisplay.php?f=174)
-   -   سيارة فى حدود 25 ل 30 الف جنية (https://www.masrmotors.com/vb/showthread.php?t=27658)

Doudy 08-06-2010 08:27 AM

سيارة فى حدود 25 ل 30 الف جنية
 
السلام عليكم ورحمة الله وبركاتة
عاوزة عربية فى حدود 25 ل 30 الف بس تكون صغيرة اقصد محندقه :) وتكون اقتصادية بترول وقطع غيار ويا ريت تكون اتوماتيك
والمفروض ايه افضل مكان فى مصر اشترى منه اقصد هل فيه مكان معين ولا من اصحاب السيارة نفسها
فى انتظار اقتراحتكم
شكرا ان ادفانس:GROWIN~12:

المناور 08-06-2010 09:32 AM

رد: سيارة فى حدود 25 ل 30 الف جنية
 
بالنسبة للعربية عليك وعلى الكيا برايد عربية كويسة واقتصادية فى البنزين وممكن تمشىيها على بنزين 80 مش حاتقول لأ ، وعالية عن الارض فمش حاتشتكى من المطبات ، وكمان ثابتة على الطريق لانها عريضة ، وواسعة من جوة سواء للسواق أو للى ورا ، وقطع غيارها فى كل حته واسعارها حنينة يعنى فانوس الاشارات عامل بتاع 15 جنيه والفانوس كله عامل 70 جنيه وسير الكاتينة ب 45 جنيه والدينامو ب 15 والمساعدين الاصلى عامل 450 والصينى 290 ودى اسعار كمثال ، وأول ما حاتقول يا بيع حتلاقى بإذن الله لانها عربية مطلوبة وسعرها فى الرينج اللى انت عايزه ده .

وأنا انصحك انك لما تجيب العربية ماتجيبهاش بكل اللى معاك لانك بعد ما حاتجيبها حاتحتاجلك بتاع 1000 لزوم تسجيل العربية وتظبيطها وتغيير الزيوت والسيور والفلاتر وتظبطلها شوية زيادات حسب ذوقك .

واياك تشترى من السوق لانك حاتندم الاسعار بتبقى غالية والعربيات حالتها مابتبقاش كويسة والتجار هناك اول ما بيشموا ريحة عربية كويسة ما بيعتقوهاش ، انت شوف حد من معارفك يساعدك فى القصة دى احسنلك .

وربنا يوفقك

Doudy 08-06-2010 03:26 PM

رد: سيارة فى حدود 25 ل 30 الف جنية
 
السلام عليكم
الف الف شكر لحضرتك ع الرد المفصل أ.المناور
طيب لو معنديش معارف ممكن يساعدونى فى الموضوع دا وحضرتك بتقول السوق مش كويس طيب اعمل ايه اشف الوسيط او الاعلانات ولا ايه؟
وحاجة كمان هل فيها منها اتوماتيك ولا عادي بس.
انا بقالى 6 سنوات باسوق اتوماتيك ومعرفش هاعرف اسوق عادي ولا لاء
وشكر لتعب حضرتك معايا

المناور 08-06-2010 09:05 PM

رد: سيارة فى حدود 25 ل 30 الف جنية
 
مفيش تعب يا سيدى دانا بحاول ارد ولو جزء من مجهود الاخوة معايا

على حد معلوماتى مافيش اتوماتيك فى الهاتش باك اللى بيبقى فيه البرايد السيدان ، خد بالك كمان انك لو دخلت فى سيدان واتوماتيك يبقى حتلاقيها معدية ال 30000 انا كنت شوفتها فى السوق وقت ما كنت بجيب عربيتى عاملة بتاع 34000 وده كان من 7 شهور.

وكمتان الاتوماتيك بيستهلك بنزين اكتر من المانيوال والاوتوماتيك فى العريبات اللى فى رينج السعر ده حاسس ان فيه مخاطرة خليك فى المانيوال احسن ومع الوقت حاتتعود عليه الموضوع عادى مش معضلة .

بالنسبة للسوق انا جيبت عربيتى منه بس دفعت بتاع 2000 جنيه زيادة وباقل امكانيات واقدم موديل فى البرايد وكمان عدادها كان عامل 170000 الف كيلو ، هى صحيح على الرغم من كل ده عربية اصيلة معايا ومابتعملش مشاكل ولغاية دلوقتى ماصرفتش عليها غير الزيوت والفلاتر والسيور ولله الحمد بس الواحد مستخسر القرشين الزيادة دول لان الواحد مابيبقاش لاقى الفلوس دى فى الشارع وكان ممكن استفيد بالفرق ده فى تظبيط العربية مثلا علشان كده بانصحك بلاش السوق علشان ماتقعش نفس وقعتى .

وعندك الاعلانات اللى بتنزل فى المواقع وفى المنتدى هنا كمان حاول تتابعها واهم حاجة يبقى عندك ميكانيكى كويس علشان لما تروح تعاين ولو زنقت مفيش مانع تنزل السوق بس خليك حريص جدا وماتتسربعش البلد مليانة عربيات خد وقتك خالص فى الاختيار وماتنساش تستخير علشان ربنا يوفقك .

Doudy 09-06-2010 03:45 PM

رد: سيارة فى حدود 25 ل 30 الف جنية
 
طب حد م الاخوة هنا عنده سيارة للبيع ..؟؟


الساعة الآن 12:48 AM.

Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017