مصر موتورز مجتمع السيارات - انا جبت السايبا برايد الجديده وده كل شيى عنها بالصور

اقتباس:

المشاركة الأصلية كتبت بواسطة AboNoRa (المشاركة 85302)

مع كل التقدير والاحترام ليك يا استاذ احمد بس البرايد بتاعة ال AAV من اسواء البرايد اللى اتعملت فى الدنيا ومش هتلاقى ليها اى ذكر فى اى مكان وكان الكل يستنكرها اصلاً

البرايد ال AAV هى اللى سوقت سمعة البرايد السيدان فى مصر وده اللى خلى الهاتش باك تتباع اكتر مع ان كلنا عارفين مدى حب المصريين للسيدان والمحركات الاكبر عامة

البرايد ال AAV نقلاً عن لسان كبير مهندسى (عبر البلاد) اللى ورا سوق القنال الدولى ودول كانو من اكبر مراكز الخدمة للعربية ديه ايام وليد توفيق كان فيها مشاكل كتير وعيوب تقفيل اكتر بكتيييييييير

والشىء الصادم بقى ان فيه مهندسين فى التوكيل القديم اكدولى ان البرايد بتاعة AAV كانت بتيجى من مصنع ايران اصلاً وتتقفل فى مصر (الكلام ده بعد 2000 طبعاً)

وبناء على تجربتى الواقعية (انا معايا برايد مو 96 الكورى هاتش باك وبرايد 2006 الايرانى)
واحدة داخلة فى 200 الف كم والجديدة داخلة فى 60 الف كم والاتنين بحالة جيدة والحمد لله
عايز اقول لحضرتك ان والدتى بتفضل تركب الايرانى عن الكورى لانها انعم فى القيادة والسحب من الكورى وده راجع لفرق الموتور وتغذية الوقود MPI

لكن لا انكر ان معايير الجودة مختلفة لكن الخامات صدقنى مش لاقى فرق خالص
وبستغرب لما الاقى ناس بتفرق بين الاتنين كان واحدة مرسيدس والتانية لادا اوكا
او بعض الناس اللى بتقول ان الايرانى تقليد والكورى هى الاصلى
مع ان الكورى اصلاً اعادة تصنيع ايضاً من المازدا 121 بخامات وجودة اقل ونجحت عن المازدا 121
كذلك البرايد الايرانى نجحت جداً فى سوريا وايران كسيارة تجارية (تاكسى) وفى البلدين حققت اعلى مبيعات وتحديداً فى سوريا كانت الاعلى مبيعاً بالتساوى مع الهيونداى اكسنت

وعن تجربة برضو العربية معايا بقالها 3 سنين لم يتلف فيها الا
كاوتشة الميزان جنب واحد (بخمسة جنية)
تيل امامى وخلفى (واتغير الخلفى بعد 40 الف كم )
شرخ بسيط فى التابلوه (وده حصل لاغلب موديلات 2006 لانها اتركنت فى الشمس كتير فى التوكيل انا شاريها فى شهر 2 / 2007)

غيرت البطارية الاصلية بواحدة جديدة فى الضمان
غيرت الولاعة فى الضمان
غيرت سلك الدبرياج والديسك والاسطوانة (بسبب تلف السلك واهمالى فى تغييرة على 40 الف كم )
غيرت الكاوتش اللى جاى معاها بكاوتش وجنوط سبور لتعزيز الثبات
غيرت بعض ازرار رفع الزجاج الكهرباء
غيرت علبة الدريكسيون بسبب حادثة دخلت فيا عربية فى العجل الادمانى

اقسم بالله العظيم ده اللى اتغير فىالعربية بكل امانة واغلبها حاجات بسبب الحواث (انا رشيت حزام مرتين وهرش التالتة)
واستخدامى عنيف جداً والناس عارفة كده كويس
ولاحظ ان كل الحاجات اللى اتغيرت تعتبر اكسسوارات مش من اساسيات العربية

علشان كده انا شايف انها افضل سيارة اقتصادية بمعنى الكلمة فى الفئة ديه

اما بالنسبة للصاج فهو ضعيف فعلاً بنفس ضعف الهيونداى اكسنت او اكسيل او السويفت او العربيات بتاعة الجيل ده ومابعدة
لكن العربية فيها دعامات فى الابواب ده غير كامرات صلب (كمرات بجد مش فيبر زى عربيات اليومين دول) فى الاكصدامات الامامية والخلفية فوقيها طبقة من السفنج المضغوط ثم الاكصدام الفيبر

دخلت فى شاهين رزع من وراء اتكسرت عندى الشبكة وهو فوانيس واكصدام فى الارض
دخلت فيا نص نقل من الجنب غيرت علبة الدريكسيون وزرجينة وشكراً
دخل فيا توكتوك من ورا الاكصدام اتقشر
دخلت فيا تاكسى رينو فى بوز الاكصدام الورانى الاكصدام اتكسر وهو اكصدام بكبوت برفارف والريداتير ركب فوق الموتور
خبطتت فيا 131 من الجنب على سرعة اكثر من 60 الرفر الورانى اتطبق والقدمانى عنده وبس
وفيه امثلة كتيييييييييير وصور كل خبطة عندى لو عايزين اورفعالكم
وكل تجديد (سمكرة ورش حزام مع زرجينة) مش بيتكلف اكتر من 1000 او 1500 مع الاكسسوارات والفوانيس والصيانة الدورية والذى منه

بجد يا استاذ احمد العربية ديه نعمة يمكن كتير بتمنى اجيب حاجة اشيك خاصة موضوع خامات الصالون ديه والعزل لكن لحد دلوقتى مش لاقى حاجة بالاعتمادية ديه ورخص تكاليف الاصلاح وقطع الغيار

معلش يا استاذ احمد انت استاذنا طبعاً بس انت جيت فى ملعبى ptmnlo123per122

كل دة جرالها ؟
كتر خيرها انها لسة ماشية علي الطريق اصلا