مصر موتورز مجتمع السيارات - كان عندى مشكلة جننتنى مع A5 واتحلت بفضل الله تعالى

زى مانتم عارفين انا عندى اوكتافيا a5
المهم ومن غير ما اطول عليكم .... الاسبوع الى فات دوة كان ليه معايا شويه حجات كده غريبة مع العربيه سعات تكون زى الفل وامسك الخشب عالشان ماحسدهاش:fun_7_5_128[1]:
وسعات اجاركم الله اكره نفسى واكرها واكره عشتى كلها:shwt:
نخش فى المشكله ؟؟؟؟؟
لمبه التزحلق ASR بتنور بمزاجها و اول ما اتنور العربيه يركبها العفريت حاجه اول مرة اشوفها العربيه تبطل وهيه ماشيه مش عارف ازاى
ومن خبرتى السابقه انا عارف ان اللمبه ديه بتنور لما احدى العجلات بتلف اكتر من الثانيه يعنى لما تكون فى تراب او زيت على الارض .....
بس الاهم من دوة كله بتنور كمان لما الماتور مايكونش بيعمل بكفائته المعتاده يعنى لما يكون فيه حاجه غلط فى الماتور
روحت مكدبتش خبر ورايح لعم الاسطوات الى بتعامل معاه الحقنى .....

قالى لازم نحط العربيه على الجهاز عالشان نعرف العطل فين
روحت رايح لواحد كهربائى بتعامل معاه لقيته مش موجود "مسافر فى مشوار"
قلت نشوف واحد تانى وبدئت المعاناه
حطينا العربيه على الجهاز
الله ايه الاخطاء ديه كلها كل حاجه مديه Eroor
انا قلت اكيد الجهاز دوة فيه حاجه ده حتى الفتيس والفرامل والايرباج الى انا مبشتكيش منهم مديين ايرور.

قلت اشوف واحد تانى سألت بتاع قطع الغيار الى بتعامل معاه ووصفلى واحد تانى
المهم الله يسهله ...
الراجل دوة عنده مركز مش كبير قوى . بس تلاقى فيه كل حاجه
سمكرة ودوكو ... ميكانيكا ... فرش ... تكييف ... كهرباء ودوة المطلوب
قلتله على المشكله واكشف يا عم الاسطوات
قال ايه العربيه فيها قفله فى الضفيرة وعاوزة تتراجع كلها وممكن نغير اجزاء منها
يا راجل ده محدش لعب فى ضفيرتها ولا حد زعلها:shwt: ...قال ممكن وانت ماشى العربيه حكت فى مطب وسلكين عملوا قفله متأكد يا عم الاسطوات ديه العربيه مصفحه من تحت ... قالى عيب يا باشمهندس
العربيه ديه لعبتى وانا عارف كل مسمار فيها وراح فارد عضلاته:fun_7_5_128[1]:
المهم من جوايا مقتنعتش بالكلام دوة:110105~127:
وقلتله ان شاء الله هعدى عليك يوم الثلاثاء القادم على فكرة الكلام دوة كان يوم السبت الى فات

وقررت اخد العربيه واروح بيها التوكيل عالشان متتبهدلش
وروحت رايح انهارده الصبح الساعه 9 وحطو العربيه على الجهاز " الجهاز بتاع اسكودا لتشخيص الاعطال "
عالطول راح مطلع العطل فين بالضبط
تخيلوا طلع ايه
مش هتصدقوا
.
.
.
.
كل دوة كان بسبب ان سير الكاتينه مش مضبوط
راح الباشمهندس الى هناك قالى قلتله ازاى دوة مفروض بقاله 20 الف كيلو وهوة المفروض يشتغل كمان 30 الف كيلو على الاقل قالى العيب منه
هنفك ونضبطه ونشوف قلتله فك واضبط يا باشمهندس
واول ما فك طلعت المشكله فى شداد الكاتينه البليه فيها بوش خفيف ومش عاوزة تضبط تخيلوا ده انا مغيرها فى التوكيل عند ال 55 الف كيلو
حتى التوكيل فيه مضروب
قلته ياباشمهندس ايه الحكايه
المهم قلتله توكل على الله وغيرها راح مغيرها هيه والسير وقلت لو مضبطتش هتفكهم
المهم راح مغيرها ولقيت المشكله اتحلت
وراح قايلى عندك حساس الكرانك بيشاور عقله يعنى بقيله 20% ويبوظ
قلت دوة نغيره المرة الجايه
روحت شاريه وانا مروح ومركبه عند الميكانيكى بتاعى
والحمد لله كل حاجه بقت تمام

خلاصه الموضوع ايه
لما يكون فيه مشكله غريبه عندك على طول روح للمتخصص انا روحتلهم مش عالشان سواد عيونهم
لأ عالشان عندهم الجهاز بتاع الاوكتافيا وهيقدر يشخص العطل بالضبط
تخيلوا معايا لو سمعت كلامهم ولعبت فى الضفيره
ولا لعبت فى الفتيس زى ما قلى الاولانى كان ممكن هخسر قد ايه
:waving: