مصر موتورز مجتمع السيارات - انا محتار جدا ومش قادر اقرر فممكن تساعدوني في اختار سيارتي لو سمحتم

ممكن مساعدة يا شباب علشان انا عايز اشتري عربية ومش قادر اقرر– اولا انا نازل مصر نهائي على اخر السنة اللي جاية بإذن الله وابتديت اشوف الخيارات المتاحة في مصر - المواصفات الاساسية التي لا غنى عنها بالنسبة لي هي عربية عالية (علشان المطبات) اتوماتيك ويبقي أحسن لو 7 راكب لكن لو 5 وواسعة ممكن برضة الحد السعري مش مشكلة مبدئيا لأني ممكن ادفع مبلغ واقسط الباقي بس تكون عربية عملية وسمعتها كويسة متعمليش مشاكل في التشغيل أو الصيانة وقطع الغيار – بعد الدراسة والتفصيص اتضح لى الخيارات التالية

بالنسبة للعربيات العالية ال7 راكب

بيجو 5008 عربية رائعة وكل الكلام عليها كويس ونازلة هنا في السعودية فول اوبشن ب 93 ألف ريال يعني حوالي 145000 جنيه وحوالي 65% جمرك يعني هتقفلها 240000 بس طبعا المشكلة الاساسية هى انها لسة منزلتش مصر ومش عارف هتنزل والا لا فانا موقف الخيار ده لغاية لما تتضح الصورة وتنزل في مصر فلو حد عنده أي أخبار عنها ياريت يقولنا ولو اتحدد لها سعر والا لأ

ستروين سي 4 جران بيكاسو اظن نزل منها بنزين 1600 في المعرض الاخير بس مش عارف بكام وعلى فكرة موتور ال 1600 تربو بيدي 156 حصان وهو نفس موتور ال 5008 طيب ممكن تعرفولي سعره كام وهل الاستروين صيانتها كويسة في مصر وقطع غيارها ولو هنقارن بينها وبين ال 5008 مين يكسب - على فكرة في مقارنات كتير بينهم على النت والأغلبية في مصلحة البيجو بس انا بسأل من الناحية العملية في مصر

دايهاتسو تيريوس مشكلتها ان نسبها صعبة وتحس ان اتزانها عليه كلام بالاضافة لان الداخلى بتاعها مش قد كده ومع ذلك هي مازالت بديل جيد

فولكس توران رغم انها عربية جميلة وكفاية انها فولكس لكن اضطريت الغيها من حساباتي علشان السمعة السيئة للجير اللي الكل بيشتكي منه ولو دخلتوا على اليوتيوب هتلاقوا فضايح ( اتمني يصلحوا المشكلة دي بس هية للأسف مازالت قائمة حتى الان)

بعد كده ننزل للكيا كارينز واللوجان ودايما السؤال اذا كان تمن اعلى حاجة في الكارينز ب 130 الف وتمن الستروين 230 الف هل الفرق ما بين الاتنين يستاهل ال 100 الف

بالنسبة للعربيات العالية وخمسة راكب فقط فهناك

كيا اسبورتاج ناس كتير بتمدح فيها بس مش عارف نزلت والا لسه وهينزل منها اوتوماتيك ام لا وايه رأيكم فيها

نيسان قاشقاي عربية جميلة وتقفيل انجليزي ومكسرة الدنيا في اوروبا ولكن للأسف نازل منها مانيول فقط لذلك استبعدتها

رينو داستر وهي برضة عربية جيدة رغم ان الداخلي بتاعها قديم شوية بس مشكلتها برضة ان مش نازل منها الا مانيول لذلك ايضا استبعدتها

بالنسبة للسيارات المنخفضة 7 راكب فيه

البيجو 308 اس دبليو عربية جميلة وعملية بس عيبها ان فيه ناس اشتكت منها انها واطية قوي وخاصة لو محملة وبتحك في المطبات ايه رأيكم في الكلام ده هل حد جربها

لو فيهحد عنده بدائل اخري يا ريت يقولنا

اسف للاطالة وجزاكم الله خيرا