مركز دنيا لصيانة تكييف السيارات والريداتيرات
 

مركز دنيا لصيانة تكييف السيارات والريداتيرات
بيقولكم الصيف على الابواب والى محتاج صيانة تكييف او ريداتيرات يتفضل

رد: مركز دنيا لصيانة تكييف السيارات والريداتيرات
 

ماشاء الله عليك يا بشمهندس اشرف
انا كنت اتكلمت معاك قبل كدة بخصوص عربية BYD و حضرتك مبخلتش عليا بأى معلومات
كان عندى مشكلة بس للاسف حضرتك فى الاسكندرية - مالكش فرع فى مصر
يا بخت الاسكندارنية بيك

رد: مركز دنيا لصيانة تكييف السيارات والريداتيرات
 

ان شاء الله يبقى فى فروع تانية ربنا يكرم
وانا تحت امرك واى خدمة
وربنا يقدرنا على مساعدت الناس

رد: مركز دنيا لصيانة تكييف السيارات والريداتيرات
 

متشكر لزوقك
انا دلوقتى معايا عربية byd f3 موديل 2013
التكييف كان فى الاول قوى ببشاعة و مكنش حد بيستحملة على 3
دلوقتى مبقاش زى الاول - بمعنى
ان لما الدنيا تبقى حر قوى تحس انة ضعيف و مش مأثر قوى حتى على رقم 3
لكن لو الجو مش حر قوى او متوسط يبقى كفاءة اعلى
و لول اقل بيبقى تبريدة اقوى
و التكييف زى الفل الحمد لله فى اشارة و على السلانسية شغال بتبريدة عادى
انا سمعت ان عزل مواسير البارد بيفرق شوية فى التبريد
لكن كدة اية المشكلة هل ممكن غاز التبريد فقد قدرتة و عايز يتغير بحاجة يبانى او امريكى زى ما سمعت - مع انى مش مستخدمى التكييف كتير يعنى بس لما بحتاجة بيبقى ضعيف قوى
و السيارة الزجاج الجلفى و البابين اللى ورا غامق و انا مزودة اكتر بفامية اغمق - و بردو التكييف مش تمام
و غيرت الفلتر - بس حسيت ان تدفق الهوا زاد لكن مستوى البرودة هو هو ضعيف
ارجو الافادة لانى معرفش اى حاجة فى موضوع التكييف دة خالص

رد: مركز دنيا لصيانة تكييف السيارات والريداتيرات
 

السلام عليكم ورحمة الله وبركاتة

اخى العزيز
اولا الفريون لا يفقد القدرة على التبريد ابدا
ثانيا عزل المواسير عشان تزيد قوة التبريد ما هى كانت من الاول مش معزولة والتكييف كان كويس ولو صانعى السيارة عارفين ان عزل المواسير بيزيد كفائة التبريد كانو عزلوها
والمفروض عربيتك فيها فامية خلفى دة بيخلى التكييف افضل

مشكلة عربيتك ممكن تكون ليها 3 اسباب
اول سبب
ممكن حصل تسريب بسيط للفريون ومأثر معاك فى التبريد
او سربنتينة التكييف مسدودة بلأتربة ومش بتبرد الفريون كويس عشان كدة لما الجو بيسخن بتقل درجة التبريد
او مروحة التكييف مش بتشتغل على السرعة التانية عند زيادة درجة حرارة الفريون نتيجة ارتفاع درجة حرارة الجو

اولا حتنظف السربنتينة فى البنزينة بمسدس المية الجامد دة
وجرب

ولما الجو يكون حر اوى وحسيت ان التكييف مش كويس اركن وشوف المروحة شغالة على سرعة عالية او بطيئة

ولو عايز تعرف الفريون ناقص ولا لا لازم تكشف عند فنى وحتى لو مش ناقص حيقولك عايز يتزود ولكى الله يا دنيا

اركن العربية فى مكان ظل وشغل التكييف على رقم واحد
وافتح الكابوت واقفل باب العربية والتكييف شغال على رقم واحد
واستنى شوية شوف حتسمع حاجة بتقول تك الى هية فصل الكومبروسر وبعد ثوانى حيقول تك تانى وبعدين شغل المروحة الداخلية على رقم 2 وشوف بيفصل ولا اية لو بيفصل ومنتظم معناها الفريون كويس لو مش بيفصل او بيطول اوى يعنى ناقص
حاول انك تزود الفريون

وان شاء الله خير