برجاء المساعدة وابداء الرأي
السلام عليكم ورحمة الله وبركاته
يمكن دي من اول المشاركات ليه وانا استفدت كتير جدا من المنتدي العظيم ده واصحابه اللي عامليين زي العائله انا ان شاء الله ناوي اشتري اول عربية ليه انا لسه مش خبير اوي في السواقة بس اتعلمت شويه معقولين كنت بفكر الاول في اني اجيب مستعمل حالته كويسة بس كنت بحس انه عامل زي البطيخة ممكن يطلع قرعة ففكرت اجيب جديد وكنت بفاضل مابين الثلاثي المرح فرنا ولانوس ولوجان علشان منتشرين وقطع الغيار الرخيصة علي اني مكنتش مقتنع بامكانيتهم وبعد كده سمعت منكم عن الساجا ودخلت دماغي اوي خصوصا الاتوماتك وكنت مقلق من اني لسه باديء في السواقه وخايف تتخبط وموضوع قطع الغيار فكنت عاوز اعرف رائيكم ومنين اقدر احجزها واية امكانية التقسيط علما اني ممكن ادفع خمسين في المية من ثمنها وللعلم انا ساكن في الاسكندرية وشكرا لكم جميعا د/محمود |
رد: برجاء المساعدة وابداء الرأي
ربنا يوفقك في الاختيار
|
رد: برجاء المساعدة وابداء الرأي
توكل على اللة
وانا سامع ان التوكيل عامل تقسيط مباشر بدفع 50% وربنا يوفقك انشاء اللة |
رد: برجاء المساعدة وابداء الرأي
شكرا علي الردود الجميلة منكم بس انا كنت عاوز تفاصيل اكتر وتنصحوني بيها ولا لأ واية نظام الحجز والتقسيط بتعها وهل قطع الغيار متوفرة بسهولة في التوكيل ولا لأ
دي هتكون اول عربية ليه وانا لسة متردد |
رد: برجاء المساعدة وابداء الرأي
اللوجان احسن من الساجا من حيث الصيانة و قطع الغيار
و يعيبها عدم وجود اوتوماتيك حتى الان لو تفضل الاوتو توكل على الله و هات ساجا لو مش مشكلة الاوتو يبقى لوجان بدون تفكير - و شيل الفيرنا خالص من دماغك حاليا لان سعرها بقى هبل و اللانوس الشيفروليه مفيش حد شكر فيها منهم انا علشان ركبتها و سوقتها كتير يبقى مانيوال لوجان - اوتو ساجا - و حاول تعمل تأمين شامل خصوصا للساجا و ربنا يستر |
رد: برجاء المساعدة وابداء الرأي
بص حضرتك العربية تحفة و تمنها فيها و لكن يعيبها حاجتين:
1- سعر إعادة البيع غير مرضى: وهى إن شاء الله عربية العمر و قليل قوى اللى بيشترى بروتون و يغير إلا لو لبروتون برضه أو حاجة ألمانى بقى 2- قطع الغيار غالية شوية ... لأ شويتين: و دى بصراحة مالهاش حل دلوقتى و خصوصاً إن الساجا لسة جديدة يعنى مافيش منها إستيراد بس بصراحة أغلب قطع الغيار متوفرة فى التوكيل و لو مش موجودة بتيجى بعد أسابيع محدودة بصراحة قطعة الغيار تستاهل تمنها لإنها أصلى و من التوكيل و حضرتك عارف أسعار التوكيلات و المشكلة إن لو العملية مزنقة و عايز أى حاجة تمشى العربية و السلام ... للأسف مش هتلاقى ... الساجا عربية بنت أصول!..:14BFD8~148: |
رد: برجاء المساعدة وابداء الرأي
حضرتك ممكن تحجز بألف جنية و لو اللون موجود يبقى تخلص على طول بدون حجز و عندك ثلاث فروع فى الإسكندرية لعز العرب: واحد فى الداون تاون و التانى فى القبارى بجوار كوبرى التاريخ لزق بس شكله كده صيانه بس و التالت فى أول الزراعى
عموماً تليفوناتهم هى: معرض الأسكندرية ومركز الخدمة الكيلو 9 طريق مصر اسكندرية الزراعي - خلف محطة شل أبيس هاتف 035003001 035003002 035003003 035003004 فاكس 035003005 معرض لاجونا ريزورت أمام كارفور أسكندرية طريق مصر اسكندرية الصحراوي هاتف 033830510 أما فرع القبارى فمش لاقيله تليفون ... شكلى كده بهيس:crazyW14:مع إنى متأكد إنى شوفت لوجو دودج و جيب على المبنى ... حد بيعدى من هناك كتير يقدر يفيدنى؟ |
الساعة الآن 10:31 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017