رد: اسئلة بخصوص فيات سيينا
 

دى لمبة بتجهز العربية للدوران السريع عبر ضخ الوقود من التنك على الأغلب, لا ضرر من ادارة السيارة قبل اطفائها, لكن ربما لا تدور من أول محاولة.
لو اللمبة بتنور و انت سايق يبقى فيه عطل فى جهاز الانحيكشن, ربما من الرشاشات.

من العادات الجيدة تسخين السيارة قبل التحرك بها, فهذا يطيل عمر المحرك.
لكن ملكش دعوة بعداد الأر بى ام, عند الادارة الباردة فان الانجيكشن يرفع عدد لفات المحرك حتى لا يتوقف عن الدوران, الى ان يسخن المحرك.
المفترض أنو العداد ينزل عند 9-10 لما العربية تسخن, أو أعلى شوية لو مشغل التكييف.
معنى انو الار بى ام مش بينزل يبقى فيه مشكلة فى منظومة الحقن, و ده واضح من لمبة الانجيكشن المنورة.

استهلاك البنزين لا يمكن قياسه ببساطة, و هو يخضع لعوامل كثيرة جدا لا يمكن حصرها, منها طريقة القيادة, الحمل, حالة السيارة, المحرك, منظومة الحقن, حتى ضغط الكاوتش.
بس انا شاكك انو كل المشاكل محصورة فى المشكلة الاولى, اللى هى فى نظام الحقن الالكترونى.
و لا تحول السيارة الى غاز, لأن الغاز الطبيعى بيبوظ المحرك تماما بعد فترة قصيرة, الغاز الطبيعى به مادة الكبريتيك التى تتسبب بتأكل المحرك,
لو حولت غاز طبيعى يبقى اللى وفرته فى البنزين هتدفعه فى عمرة للمحرك بعد سنة أو اتنين بالكتير.

رد: اسئلة بخصوص فيات سيينا
 

بالظبط كده ... زي ما قال مهندس فادي ..
اللمبه نفسها حتى بتكون على شكل رشاش
والمفروض او ما تلف المفتاح في الكونتاكت تنور لمده ثانيتين تقريبا و تطفي لوحدها و ساعتها تدور العربيه عادي ..
والمفروض انها متنورش تاني .. بتنور بس قبل اداره العربيه لما يكون المفتاح على اول تكه من الكونتاكت
فمعنى انها تنور و حضرتك ماشي ان في مشكله في البخاخات

الار بي ام عاده على المور و العربيه سخنه بيكون عند 9 .. واول ما تدور العربيه بيعلا فعلا شويه و يبتدي ينزل والعربيه بتسخن .. بس مش لازم تستنى لحد ما ينزل لوحده .. لأن تسخين العربيه بالكامل مبيتمش و هي واقفه
التسخين الاولي بيكون علشان بس تحريك الزيت من الكارتيره و دخوله فيجميع اجزاء المحرك .. و بعد كده العربيه تسخن مع المشي

موضوع الريحه دي غريبه شويه
بس هو كان حصل موقف معايا معرفش ليه علاقه و لا لأ ..
اول ما جبت العربيه و انا ماشي مع السخونيه كنت بشم ريحه غريبه و تفضل موجوده لحد ما العربيه تبرد
وبعدين اكتشفت ان كان في كيس اسود ماسك في العربيه من تحت و بيسيح طبعا من السخونيه فيطلع الريحه دي ..

السيينا 1400 سي سي 8 فالف موديل 2000 .. و كان استهلاكها معايا معقول جدا بنزين 90 كويس جدا ليها .. الصفيحه كانت بتعمل متوسط 280 كم
يعني متوسط 7 لتر لل 100 كم ...

وارد جدا تكون كل المشاكل اللي حضرتك قلتها يكون سببها واحد .. وان شاء الله تكون حاجه بسيطه و تتحل بسهوله و تتظبط العربيه معاك

بس حاول دايما متسيبش التنك يوصل للريسرف .. لأنه بيكون ساعات في رواسب و شوائب في التنك و لما البنزين يقرب يخلص الرواسب دي ممكن تعمل مشاكل ...
ودايما ابقى غير فلتر البنزين مع فلتر الزيت ..

وابقى طمنا عملت ايه

رد: اسئلة بخصوص فيات سيينا
 

اخي الكريم فادي
اخي الكريم سام رام
------------------------
شكرا جزيلا علي الافادة
هوا فعلا حصل مرة واحدة والعربية العداد كان علي ربع التانك وكانت بتنتش جامد لدرجة اني كنت حاسس انها هتقف ورحت فولت علي طول
بس كان مؤشر التانك علي الربع - يعني كتير ؟؟!!!

اما بخصوص الريحة - فهيا مش ريحة كيس بيتحرق او اي حاجة بتتحرق لا - دي ريحة كدة زي النشادر او الفريون - مش حاجة بتتحرق او بنزين او عادم

انا كنت بفكر اروح توكيل اوماترا اللي في جسر السويس واعمل فحص شامل علي العربية عشان اعرف راسي من رجلي

بالمناسبة اخي الكريم سام رام - انت كنت قولتلي ان انت كان معاك سيينا قبل كدة - فهل تعرف ميكانيكي محترم وكهربائي محترم يبص علي العربية - دا في حالة اني لاقيت التوكيل ضارب في السما وتكلفة عالية

كمان انا نسيت اقولكم ان التكييف بيفصل ويشتغل مع المطبات - في سلكة في توصيلاته معلقة
ونازلة من فوق دواسة الاكسراتير ولازم اخبطها برجلي عشان تشتغل - ناس متجيش الا بالضرب

المهم انا عارف صدعت دماغكوا - بس معلش فرصة تساعدوني قبل رمضان ما يخلص وتكسبوا ثواب بزيادة

اني احبكم في الله

رد: اسئلة بخصوص فيات سيينا
 

بصراحه يا استاذ sikostar انا كنت بعمل الصيانه في مركز اخبار اليوم قبل ما يبقى تبع وكيل فورد و بعد كده بعت العربيه
بس ممكن حضرتك تكشف بس على العربيه في التوكيل و يعملو مقايسه .. و ساعتها تبقى عارف بالظبط العربيه محتاجه ايه حتى لو حبيت تصلح بره عند اي ميكانيكي
وشوف برضو رأي الزملا ممكن يكون حد يعرف ميكانيكي كويس يوجهك ليه
عموما ال 1400 صيانتها اسهل من ال 1600 .. و ان شاء الله تكون كلها حاجات بسيطه و تتظبط على طول

رد: اسئلة بخصوص فيات سيينا
 

سؤال بسيط
هيا السيينا 1400 كابيراتير ولا انجكشن؟؟؟