اسعار بعض قطع غيار ستروين AX
 

السلام عليكم احبائى الكرام
حبيت انقل تجربتى فى شراء قطع غيار ستروين ax اللى هى تعتبر غاليه ومش متوفرة
بس مش غالية على فترة استهلاكها ومتوفرة مع اللى يدور
وان شاء يمكن الكلام ده يكون مفيد لحضراتكم
بس طلب صغير :يا ريت ى حد يشوف الموضوع يشارك ولو بكلمة للرفع عشان الموضوع يفضل متجدد والكل يستفيد
اولا قطع الغيار الجديد:
من فادى اسحاق بالتوفيقية-
فلتر زيت 15
فلتر بنزين 30
طقم كهرباء 4 بوجية 30
مراية جانبية 80
2 ريش مساحات 20
سير دينامو 30
سير كاتينة 60

جديد من رقى ستروين -الحرفيين
طلمبة بنزين فرنساوى 100
علامة ستروين 20
كلمة ستروين 25
سير دينامو 20
----------------------------------------------------------
بالنسبة للمستعمل
كربراتير استيراد (من احمد كربراتير-امبابة) 275 مع ترك القديم

من زعتر بالحرفيين:
كونتاكت بالمفتاح 125
2غمازات جانبية 60

من شعبان بالحرفيين:
اشارة شمال 50
عصاية فرامل اليد 100
2وش اكرة داخلية 50

وكان عندة شماسات يمين+شمال 150
مساحة خلفية 75
تارة كويسة 125
زرار انتظار 100 ؟؟؟!!!! مش عارف ليه
فبر التار(غطاء فوق وتحت بيركب تحد التارة)125
تابلوه حاله جيدة بي لتروين مش مكيفة -لانه مافيهوش فتحات التكييف الجانبية بس نفس شكل الستروين المكيف بجميع زرايرة وكان بيتكلم فى 700

الكلام الازرق ده انا ماشتريتهوش بس سألت عليه
(والمفروض انه ناقصنى زرار الانتظار والتارة بالفبر والمساحة الخلفية ووش اكره داخلى وهوايات تكييف والشماسة يمين)
يا ريت لو حد يعرف حد عنده الحاجات دى بأسعار مهاوده يدلنى

معلش نسيت اكتب بعض اسعار الحاجات دى من عند ياسر بالحرفيين لانى روحت له وسألته على اللستة list اللى محتاجهه بس مااشتريتش من عنده -لان وهوه بيدور على اللى انا عايزة جاله زبون عايز 4 ابواب لعربيتة فقالة كمان خمس دقايق عدى عليا وطبعا الخمس دقايق عدوا بسرعة والراجل رجع تانى لقى الشاب اللى عند ياسر لسه بيدور على طلباتى فالشاب قاله انتظر لما اخلص الراجل زعل وقاله يعنى ايه هوه انا بشتر ببلاش انا جاى اشترى وادفع فلوس وقولتى تعالى كمان شوية وجيتلك فا ماينفعش تعطلنى جنبك-قام الشاب اللى بيبيع قاله طيب تعالى معايا لان الابواب فى المحل التانى وانا واقف هنا لوحدى(اللى خلانى امشى ومارجعلوش تانى انه طبعا قفل المحل واخد الزبون اللى انا جاى قبله وقالى تعالى المحل التانى ) بصراحة اتخنقت من الموقف ولا عشان الواحد غلبان ومش بيتكم بتناكة ويشد على البياع يقوم يتنفضله كده عشان كده انا سيته ومشيت على الرغم انه كان عنده اسعار اقل من بره ويمكن موفر حاجات اكتر لكن ماروحتلوش تانى واضايقت جدا
طبعا ده مش ذم فى المحل لكن شرح موقف مش اكتر لعل غيرى يستفيد ولما يروح
لياسر ده يعرف يخش عليه زاى (معلش كلام كتير بعيد عن الموضوع)
المهم كان عنده:
الكونتاكت بالمفتاح 100
الاكره الداخلية 25
زرار الانتظار 50
ماكينة المرشدير 50
فيشة المرشدير 10
اشارة امامية 50
المراية الشمال 75
غمازات الواحدة 20
زرار زجاج كهرباء 40
فانوس خلفى كامل 75 للواحد



يارب اكون قدرت افيد اخوانى ببعض الاسعار واماكن بيعهم
واللى عايز ارقامهم يبعتلى ع الخاص لانى اعتقد وضع ارقام التليفون يعتبر دعاية وده ضد قوانين المنتدى
ولوممكن برضه حد عنده تجارب فى شراء قطع الغيار او الصنايعية الكويسين يشارك معانا ومايبخلش علينا

رد: اسعار بعض قطع غيار ستروين AX
 

بارك الله فيك.
معلومات مفيده للاعضاء ان شاء الله

رد: اسعار بعض قطع غيار ستروين AX
 

شكرا على مرورك ودعوتك

رد: اسعار بعض قطع غيار ستروين AX
 

اضافة جديدة النهاردة بالنسبة لقطع غيار الاستيراد
من شعبان فى الحرفيين
فبر التارة(علبتين بلاستيك بيقفلوا على بعض تحت التارة على طول) 100 ج
التارة بحاله ممتازة 125ج
مساحة خلفية فيها ريشة تعبانة كده بـ 75 ج
غيرت العلبة الوسطانية بتعة الشكمان بـ 60 ج لان القديمة كانت ضعيفة والمصفة الداخلية اتكسرت
بس بصراحة الفرق بان بعد التغيير فى ساعتها السحب فرق كمان صوت الشخلله اختفى

رد: اسعار بعض قطع غيار ستروين AX
 

طيب معلش ياجماعه عشان انا مش بأفهم فى العربيات بس عاوزه اجيب واحده
هى كده قطع الغيار غاليه اوى بالنسبه لباقى الموديلات ؟ الاوبل كورسا مثلا.
وتانى حاجه هى العربيه كويسه ولاحتبهدلنى ؟

رد: اسعار بعض قطع غيار ستروين AX
 

واضح ان حضرتك جديدة فى المنتدى والعربيات بصفة عامة
ونصيحة مجرب
اولا :حددى المبلغ بالظبط اللى عاوزة تشترى بيه او على الاقل( من كذا... الى كذا....)
ثانيا:حددى متطلباتك واحتياجتك من العربية
ثانيا:دورى على احسن عربية فى حدود المبلغ المتاح والامكانيات المطلوبة
رابعا:حاولى تعرفى كل حاجه عن نوع العربية اللى هتشتريها من قطع غيار لاماكن الصنايعية لاماكن بع قطع الغيار ومدى توافرها و.... و..... الخ وده بيكون فى البحث فى المنتديات المتخصصة فى السيارات زى المنتدى اللى حضرتك فيه دلوقتى(ده طبعا بعد ماترسى على نوعية معينة من العربيات)

واعتقد ان فى موضوعات عنوانها (ازاى اشترى عربية مستعملة) ده عشان تحددى احتياجك والغرض من الاستخدام وتفاصيل تانية
واحب اقربلك الصورة بطريقة عملية عن طريق تجربتى الخاصة وهى لسه قريبة جدا من حوالى شهرين

(اول مافكرت فى عربية قولت انا عايز عربية ترحمنى من زحمة المواصلات وتعب انتظار الميكروباصات بالساعة اذن انا محتاج عربية وبس طيب معايا من 15 الى 20 الف دول ممكن يجيبوا ايه؟؟؟ اكيد زى اى حد جديد ابتديت بالفيات 127 و128 نظرا لانتشارها وتوافر قطع الغيار ورخصها وتوافر الصنايعية كذلك ومتوسط السعر ده يجيب موديلات من 80 الى 90 بالنسبة للسنة وفعلا نزلت السوق وشوفت واتفرجت قولت استنى شوية اعرف الفلوس اللى معايا تجيب ايه غير الفيات -حاجه يكون فيها اوبشن اعلى-وخصوصا ان كان اساسى اركب تكييف فى اى عربية لقيت الماروتى كويسة وموديلاتها من التسعينات ولذيذة وموفرة للبنزين وممكن يركب لها تكييف ودى معلومة عرفتها من احد الاعضاء انه ركب تكييف للسوزوكى ماروتى فشجعنى ادور فيها بعد ماعرفت انه صعب التكييف يركب للـ 127 والـ 128 كل ده فى حدود المبلغ المتوفر بعدين عرفت ان فى بيجو 205 اصلا مكيفة وفى متوسط السعر المطلوب بس حسب حالتها وموديلاتها من الثمانينات للتسعينات ونزلت وشوفت وعاينت وقريت كتير عنها وكنت على وشك الاستقرار على الاختيار ده وبالصدفة اكتشفت المفاجئة (الستروين AX) المذهلة
مكيفة - سنتر لوك الفابريقة- زجاج امامى الفابريقة - هاتش باك - موتور 1400 - وموفرة فى البنزين كل دى مميزات
العيوب :
قطع غيار غالية بالنسبة لباقى الماركات لكن بيقابلها=قطع الغيار معمرة واصلية بالنسبة لباقى الماركات.
ندرة المتخصصين فى الصيانة لكن بيقابلها= وجود مراكز وورش متخصصة (معلش ممكن المشوار يكون بعيد لكن الاعطال هتبقى اقل من غيرها لانها عربية ممتازة وخصوصا لو متصينة صح)

المجمل العام العربية تستاهل قطع الغيار الغالية والقليلة والتعب لغاية ما نروح لمتخصص او مش متخصص بس امين فى شغله وفاهم

ملحوظة مهمة واخيرة العربية دى مش بيركبها غير اللى فاهمها ومقدر قيمتها لان حقها فى مصر ضايع من ساعةمانزلت ومالحقتش تثبت وجودها
والنهاية مش هتلاقى عربية فول اوبشن بالسعر ده غير الستروين
لو عندك استعداد تتعبى شوية فى الاول وتصرفى غالى شوية وبعدينتعوضى التعب والمصاريف بمرور الوقت توكلى على الله ودورى على ستروين حالتها كويسة ومش هتندمى ان شاء الله
بس المهم يكون معاكى حد فاهم ويقدر حالة العربية الحقيقية واعرفى برضة لو هتحتاج تظبيط او مصاريف هتتكلف قد ايه واوعى تاخدى بالظاهر لان فى ناس كتير بتظبط شكل العربية من بره بوش بويه وشوية كلام فارغ عشان تحلى فى عين الزبون

واخيرا السعر يتراوح بين 16 الى 35 على حسب الحالة
وزى ماعنوان الموضوع بيقول (اسعار بعض قطع الغيار) فى الاول
وربنا يوفقك فى عربية حلوة كده تحببك فى الستروين

رد: اسعار بعض قطع غيار ستروين AX
 

شكرا جزيلا لردك الوافى عليا ... انا فعلا بدأت ادور على عربيه ستروين ... وربنا يوفقنى والاقى حاجه كويسه ... وياريت لو اى حد يعرف عربيه ستروين ax كويسه يبعتلى عالخاص