|
الللحقووووونيييييي العربية كده باظت؟؟ مش عارفة اعمل ايه!!! مساعدتكم بسرعة يا ناااس
السلام عليكم جميعا.
اولا انا عايزة اقولكم اني كنت هروح فيها امبارح بس الحمد لله ربنا ستر وسلم انا كنت ماشية عادي على الدائري في اتجاه التجمع الخامس و كنت خلاص على المطلع ده اللي قبل مصنع كادبوري؛ وكنت طبعا جاسبة الخامس وماشية على 100 ولا حاجة لما مرة واحدة العربية بطلت مني في نص الطلعة بالظبط!!! انا معرفش ايه اللي حصل بس ربنا سلمها و مشيت شوية بسرعة العربية وعرفت اقف على جنب. جربت ادورها مدارتش بس البطارية مكنتش قليلة كل حاجة تانية شغالة، اتصلت بوالدي و جربت ادورها كذا مرة بس مكنتش بتدور، انا شكيت يكون الكربراتير او سير الكاتينة، ف بطلت ادورها خالص و استنيت لما بابا جه وقطرناها ربنا يستر و ميكنش حصل حاجة للصمامات او البساتن او الجوان، بس انا عايزة اسأل : 1- هل ممكن يحصل حاجة للعربية بسبب ىني جربت ادورها الاول؟ طيب اصلا انا توقعي صح؟ 2- طيب لو طلع فعلا سير الكاتينة اجيب نوع ايه بالظبط لعربيتي (اوبل فيكترا 1999 بي) و منين من المعادي؟ وبكام؟ انا عايزة نوع نضيف واصلي 3- وبعد اما اغيره اروح اكشف على الصمامات واتأكد انهم مش اتعوجوا؟ ولا اعمل اس يه بالظبط علشان انا عايزة اتطمن 4- وبعد كده اغير السير كل كام كم؟ مع العلم اني لسة شارية العربية و مكملتش بيها سنة بس مشيت بيها 15 الف كم وبالمرة ارجوكم حد يقولي اغير ايه كمان و اكشف على ايه. انا مش عايزة اتحط في الموقف ده تاني ابدا، واهي تبقى استفادة للجميع اة شاء الله! انا بجد محتاجة مساعدتكم ضروري. انتم اهل الخبرة برضه. انا هروح اجيبلها الميكانيكي لحد هنا بعد صلاة الجمعة |
رد: الللحقووووونيييييي العربية كده باظت؟؟ مش عارفة اعمل ايه!!! مساعدتكم بسرعة يا ناااس
اولا
حمد لله على السلامه ثانيا حضرتك بعد اما بطلت جبتى المور ولا كنت ماشيه على الخامس زى ما انتى لو جبتى المور اول ما بطلت يبقى التلفيات بسيطه ان شاء الله وتكمن فى طقم صبابات ودلايل جديد وجوان وش سلندر جديد وجوان فرن وجوان مانفوليد وطبعا وش السلندر هيتفك ويروح المخرطه يتركب له الصبابات والدلايل وبعدين يتحط جوان وش السلندر ويندهن جمالكا ويركب وش السلندر عليه وبعدين يتقفل الوش يتقفل الموتور من فرن ومانفوليد وتركيب سير الكاتينه لكن لو حضرتك فضلتى ماشيه على الخامس بعد اما بطلت فيفضل الموتور يتحرك بحركه العربيه ومع اختلاف التقسيمه يبقى ممكن تكون التلفيات كبيره من كسر بساتم وممكن لا قدر الله يتكسر الكرنك ودا بيتحدد اما وش السلندر يتفك ويشوف البساتم ويرفع عجله ويدى غيار ويلف العجله قدام وورا ويشوف البساتم بتتحرك طبيعى ولا فى بستم مأخر او مش بيتحرك كان الله فى عونك |
رد: الللحقووووونيييييي العربية كده باظت؟؟ مش عارفة اعمل ايه!!! مساعدتكم بسرعة يا ناااس
انا متشكرة جدا لرد حضرتك السريع.
انا مش فاكرة اوي ايه اللي حصل ساعتها عشان كنت مصدومة بس اعتقد اني مورت بديهيا علشان اقدر اقف على جنب. بس انا كنت عايزة اسأل برضه: هو انا كده كده دخلت في الموال ده اتوماتيك يعني بسبب اني دورتها (حتى لو كانت التلفيات بسيطة عشان مورتها) ولا ده الحاجات اللي مفروض اكشف عليها و اغيرها برضه ؟ انا لسة هروح كمان ساعة للميكانيكي و كنت عايزة بس اكون فاهمة كل حاجة قبل ما اروح. ومتشكرة مرة تانية و في انتظار كرمكم في الرد على بقية اسألتي الاصلية. شكرا |
رد: الللحقووووونيييييي العربية كده باظت؟؟ مش عارفة اعمل ايه!!! مساعدتكم بسرعة يا ناااس
بس مثلا فى الدايو و احتمال كبير فى الأوبل لان الدايو اساسا ماتور أوبل
ان لما السير بيتقطع التلفيات بتبقى لحظة الانقطاع ..............يعنى لو ال rpm ساعتها مكنش عالى ممكن ميحصلش حاجة ...........حتى لو متمورتش ساعتها لان سوست الصمامات بترفعها فوق و محالوة التدوير كذا مرة بعد كدا مش حتضر لان الصمامات كلها مرفوعة و الله اعلم |
رد: الللحقووووونيييييي العربية كده باظت؟؟ مش عارفة اعمل ايه!!! مساعدتكم بسرعة يا ناااس
يا رب يا أستاذ أحمد تطلع كده فعلا
ربنا يستر انا متشكرة لحضرتك و ان شاء الله هكتب هنا تجربتي كلها مع الموضوع ده. |
| الساعة الآن 09:41 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017