|
محتاجة حد يديني ثقة بجد ونصايح متبخلوش عليه
يا جماعة انا عربيتي المتواضعة كيا بيكانتوا اتوماتيك وطبعا الاتوماتيك مفيش اسهل منه
لسه بتعلم عليها نزلت عليها امبارح بس وانا راجعة قلت لاخويا ركبني علشان خاطري طبعا سقت في شارع فيصل بيقلي هدي رحت دايسة فرامل ع الاخر العربية وقفت وطبعا اللي ورايا كان هيلبس ورحت سمعت تيييييييييت واخويا نزلني وقلي هسوق واعتذر للرجل وركبني تاني مشيت شارع رايح جي ونزلت بليل الساعة 2 بليل كده وسقت تمام التمام اولا كل مرة بركب العربية الخوف بيقل وخصوصا لو حد جنبي والطريق فاضي بس انا هفضل خايفة كده كتير وهل ده احساس طبيعي يعني وابتدي انزل امتي في الزحمة ؟ لما بجي ملف او ادخل شارع بحس اني هلبس في الحيطة واخيرا بقي طول ما انا ماسكة الطارة وماشية عدل مبحودش لا يمين ولا شمال بس بحس طبعا ان العربية بعد ما كانت في اليمين رايحة شمال والعكس فهل موضوع الدركسيون ده هيتضبط معايا مع الوقت ولا انا كده فاشلة ولما بيقلي هدي بلاقي نفسي هديت اوووووي بس مش بقف معلش طولت عليكم بس انا نفسي حد يكلمني يحسسني ان ده طبيعي واني مش شاذة وان فيه امل محدش يتريق عليه من الرجال انا قريت فضايحكم عن مواقفكم في بداية السواقة فبلاش احباط يستركم ربنا |
رد: محتاجة حد يديني ثقة بجد ونصايح متبخلوش عليه
أختى الكريمة /أم لوجى
السلام عليكم ورحمة الله وبركاته لا تقلقى أبدا كل ده طبيعى وكلنا كنا كده واكتر من كده كمان بس هى هتاخد فترة على ما تتعودى وتتجرأى شوية بشوية هدى اعصابك خالص وانتى سايقه وحاولى بع كام مره من جلوس اخوكى بجوارك انك تسوقى وحدك ده هيشجعك شوية بشوية سبحان الله انا كنت العكس لما حد يجلس جنبى اتلخبط سوقى بهدووووء فى الاول علشان لا قدر الله لو فيه مفاجأه الضرر يكون قليل تدربى تدريجيا فى شارع هادئ ووقت مناسب يكون المرور غير مزدحم وممكن تيجى تتدربى عنى فى 6 أكتوبر ههههههههه الشوارع عندنا الى حد ما واااسعة وجميلة ورايقة بإستثناء بعض الميادين مث ميدان الحصرى مثلا انا لغاية دلوقتى بهرب فى شارع جانبى خلف البنك الاهلى اكتوبر علشان لا امر منه الميكروباصات عند الحصرى حاجة رهييييبة ربنا يوفقك يا حبيبتى ويبارك لك يها ويكفيكى شرها ويعطيكى خيرها وتتمتعى بها دى نعمة اننا ربنا رحمنا من المواصلات والتاكسى وخلافه ربنا يخلى لك روجى ويبارك لك فيها وأى خدمة راسلىنى على الخاص تحت امرك :CHUBBY~36: |
رد: محتاجة حد يديني ثقة بجد ونصايح متبخلوش عليه
طبيعى جدا
حكاية الدركسيون يمكن عشان مركزة فى الدركسيون ......... الصح انى اركز فى الطريق قدامى و ساعتها لا اراديا ايدى حتظبط الدركسيون و مهم جدا و انت مش سايقة تركزى كويس اللى سايق بيتصرف ازاى و تقارنى اللى بيعمله باللى بيجى فى بالك ساعتها لو كنتى مكانه حتعملى ايه |
رد: محتاجة حد يديني ثقة بجد ونصايح متبخلوش عليه
اولا لازم يكون في حد جمبك بس ميتكلمش عشان يديكي الثقة في الاول بس ده طبيعي ثانيا حاولي يكون في مسافة بينك وبين العربية اللي قدامك عشان حكاية مسك الفرامل مره واحدة دي وانك تحسي الفرامل وتعرفي المشوار بتاعها اد ايه يهدي واد ايه يمسك كدا يعني ثالثا لازم تكون مريات العربية مضبوطة وتبصي في المريات بس اوعي تسرحي لحسن تلبسي في اللي قدامك واربطي الحزام بيريح اكتر في القاعدة رابعا حاولي تسوقي بالنهار اكتر في وسط العربيات خامسا محدش بيعرف يسوق في مصر وبكره لما تتعملي هتعرفي تلاقي واحد سايق مطلع ايده بره والتاني ساند علي المخدع والتالت مرجع الكرسي وفي الجديد بيبقا منزل الكرسي تلاقيه غطسان كدا قدام شوية هنلاقي واحد سايق بضهره اه والله السواق في مصر مرار |
رد: محتاجة حد يديني ثقة بجد ونصايح متبخلوش عليه
بصي حضرتك
مبدئياً أنا هقولك اللي محدش قالك عليه تجنبي تماماً السواقة في شارع فيصل أنا عن نفسي ساكن في المريوطية وشغلي في ناصر الثورة ووالله بركب ميكروباص وانا رايح ووانا جاي بسبب الزحمة اللي فيه مش خوف من السواقه ( لأ ده خوف على العربية ) بصراحة :) كمان لما تكوني سايقة خليكي واثقة في نفسك وان كل اللي بيسوقوا مفيش فيهم إيد زيادة ولا انتي ناقصة حاجة عنهم وخلي اخوكي في الأول يمشيكي في شوارع واسعة وماتكونش زحمة ... لحد اما تشدي حيلك وباعدين امشي في اي حتة خلي بالك دايماً ( خليكي باصة قدامك ده نمرة واحد ) بعد كده يمينك وشمالك ومراياتك موضوع الدركسيون ده هيتظبط مع النظر للأمام وموضوع الفرامل ده هيتظبط مع الوقت بالأحساس وحاولي تحبي العربية لأنك لما تتعلمي ويبقى معاكي رخصة وتسوقي هتقعدي فيها وقت اطول من أي حتة تانية |
| الساعة الآن 06:41 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017