ما هى الدايو زاز ؟؟؟ و ماهى ميزاتها و عيوبها
 

السؤال واضح من العنوان ..... ايه هى العربيه اللى اسمها دايو زاز و عيوبها ايه و ميزتها ايه ؟؟؟
و ارجو الرد بسرعه علشان فى واحده قدامى فى القاهره و انا فى الأسكندريه و بفكر جدا انى انزل اشوفها علشان اشتريها لمراتى فعايز الرد منكم و بالذات انها موديل 2001 و سعرها رخيص جدا بالنسبه لموديل 2001 و عامله حوالى 14 الف جنيه و ماشيه 70 الف كيلو !!!!!!!!!
انا مستغرب بصراحه !!!

رد: ما هى الدايو زاز ؟؟؟ و ماهى ميزاتها و عيوبها
 

ابعد عنها احسن
شركه زاز شركه روسي
و شركه دايو اشترتها في اوائل الالفيه الجديده فعلا
و كانت الشركه بتصنع سياره تسمي زاز تافاريا
و فعلا ابو الفتوح نزلها مصر لكن فشلت فشل زريع
و مالهاش لا سوق و لا قطع غيار
من رأيي تبعد عنها احسن يا شريف

رد: ما هى الدايو زاز ؟؟؟ و ماهى ميزاتها و عيوبها
 

ان جالك الزاز ... نط من الازاز
انا نفسي اعرف العربيه دي في منها كام نسخه في مصر ..
متهيألي يتعدوا على صوابع الايدين
بلاها يا شريف باشا ....
ابعد عن العربيات المبهمه ... زاز ... اولست .. ترابنت ...

رد: ما هى الدايو زاز ؟؟؟ و ماهى ميزاتها و عيوبها
 

هاخد كلامكم ثقه و احاول اقنع مراتى قبل ما نرمى الفلوس فى الأرض (قصدى فى الزاز ههههه)
و الموضوع و ما فيه انا عايز اجيب عربيه لمراتى تكون رخيصه لأننا فى الأخر مش هانستخدمها عربيه و هانستخدمها حديده بموتور علشان ابقى احجز مكان الركن بتاعى بعربيتها لما اطلع بعربيتى ههههههه لأن البارك عندنا مطوال و كله بيركن قدام علشان ماحدش يقف و يسد خروج عربيته و لو طلعت من المكان برجع ادوخ على مالاقى مكان تانى فكده ممكن اوقف العربيتين ورا بعض و عربيتى الأول بحيث انى اخرج بعربيتى و اطلع التانيه قدام و لما ارجع ازق التانيه ورا و ادخل بعربيتى و بكده يبقى حاجز مكان فى الشارع 24 ساعه و ب 14 الف جنيه بس - يـــــــــــا بـــــــــــــــلاش - هههههههههههههه

رد: ما هى الدايو زاز ؟؟؟ و ماهى ميزاتها و عيوبها
 

يا ريس لو على كده يبقى تجيب حته زستافا او سيات ولا 126 وافصل منها كبل البطاريه علشان متنامش ... و تبقى خفيفه في الزق :)
ولو عايزها بتمشي لقدام وورا يبقى 127 - 128 -
أو زود شويه وهات اونو ... برقبتهم كلهم ... دي حتى ممكن لو مشوار قريب تخرج انت بيها وتريح عربيتك