ازاى تحافظ على فتيس عربيتك الفولكس " جولف - بولو - بيونتير - جي تى اى "
 

سلام عليكم و رحمه الله و بركاته

ده اول موضوع ليا فى المنتدى الشيق ده و يمكن اول موضوع اكتبه على منتديات على الانترنت من سنة 2009 من ساعة ما انتشر الفيس بوك

المهم اغلب عربيات الفولكس الانواع اللى ذكرتها بتتشابه فى المشاكل و اسبابها بالنسبة للفتيس و بأستثناء ان فى تفاصيل خاصة بالاوتوماتك هتكلم عليها برضو

المانيوال

فى الانواع اللى ذكرتها بيكون الفتيس بنظام الجر الامامى عليه كل حمل العربية و طبعا محدش يقول مفيش كرونه الفتيس ليه 3 تروس اضافيين بيقومو بدور الكرونة جوه هوسنج الفتيس او الحلة بتاعته و اكبر مشاكل المانيوال ممكن نتجنبها لما نعمل الخطوات دية

1- عصاية الفتيس -و فى الصيف تحديدا بتكون تقيلة شويه فى بعض الغيارات زى الخامس و الرجوع و ده بسبب نقص الشحم و دخول الاتربة و عشان ده ميحصلش و متلاقيش ان العصاية حصل فيها ريجلاش و بقت تقيلة فى الغيارات و بتفوت اشترى علبة شحم نضيف ب 20 ج و خليها معاك و ارفع الكاوتشه اللى مغطية العصاية و هاتها فى المور و حط فيها شحم على قد ما تقدر و مهم جدا فى الصيف تحديدا مع التراب اللى بيكون فيه تكون الكاوتشه سليمه و كلبساتها اللى بتقفل الحلقة بتاعتها على الغطاء سليمة

2- تيش الفتيس - و دية قطعة معدينة صغيرة بتمسك فى كامة الغيارات من تحت و بتساعد عصاية الفتيس انها تاخد الغيارات و تسكنها فى اوضعها الصحيحه ده من اكتر القطع المستهلكة فى الفتيس اللى مش بننتبها ليها الا اما تعمل مشكلة فى تيش الفتيس فى كاوتشه صغيرة جدا بتدخل فيها بيضة الكامة و تمسك فيها مهم جدا الكاوتشة دية تتنضف و تتشحم مع دخول الصيف و مهم جدا لو الكاوتشة دية بايظة او فيها قطع تتغير لأنها لو فكت هتلاقى العربية ماشيه معاك من غير غيارات و صدقونى تجربة ده على طريق السفر بتكون فيلم رعب حقيقى

3- هوسنج الفتيس او حلة الفتيس - و دية الجسم الخارجى اللى بيكون جواه الجير بوكس و كل اجزاء الفتيس و مهم جدا الحلة دية تتغسل و تتراجع لو عليها اى زيوت من الخارج لأنه احيايا بيكون الاولسيهات دابت و بتطلع زيت بدون ما تحس و احيايا بيكون خرم فى الحلة نفسها لا قدر الله و بيحصل نتيجة مطبات غلط و نصيحة فنيه لو الموضوع بيطلع نقطة بسيطة لما العربية تيجى تقف متفكش الفتيس كلها عشان تغير الاولسيهات الحقه بسيلكون المفاصل او بيقولو عليها شيزلونج و ده برضو بيكون خيار جيد لو فكيت الكرتيرة بتاعة الفتيس و ملقتش جوان مكان اللى كان راكب تمن السيلكون ده 25 ج و هو غير السيلكون الحرارى و العادى

4- شداد الفتيس و ده اللى ماسك الفتيس جوه العربية و اوعى تهمل فيه او فى اى كاوتشه تبعه و لازم تطمئن عليه بأستمرار لأنه لو فك هتلاقى الفتيس على الأرض

5- الكبالن - لأن العربيات دية جر امامى فى اغلبها فالفتيس بينقل الحركة للعجل من خلال مجموعة كبالن كبلن داخلى و كبلن خارجى و مهم جدا تتابع اصوات الكبالن دية و تشحمها بشحمل ايسو و تغير كاوتشتها لو متأكله و اوعى تهمل فى القطعة دية ابدا و خلى بالك ان فى حر الصيف هتسمع اصوات تانيه بتغطى على صوت الكوبلن و ده نتيجة تمدد المعادن بدراجت مختلفة فى الصيف متخافش من الموضوع ده و اختار وقت مساء لأختبار الكبالن

6- زيت الفتيس - و ناس كتير بتهمل زيت الفتيس المانيوال و كأنه امر مسلم لا يتم تغييره زيت الفتيس من اهم الزيوت فى العربية و لازم يتغير بعد كل 40 الف كيلو و تجيب زيت نضيف لعربيتك و انت اللى تشترى الازازه بنفسك و تروح لحد يغيرهولك و تتأكد من برشمة الجركن و تختار نوع على الاقل يكون 90 -140 متعدد و مهم تراجع طبة الزيت اذا كانت اتقفلت صح والفايبر اللى تحتيها سليم و تكون اتنضفت تمام لأن الطبة بيكون فيها مغناطيس بيشيل الرايش من جوه زيت الفتيس و الرايش ده بيكون نتيجة احتكاك التروس بشكل خاطئ - غلطاتك يعنى .

7-نقل الغيارات - مهم جدا و انت بتسوق فى ظروف الحرارة الشديدة او البرودة الشديدة انك متاخدش الغيارات العالية بسرعة فى حالة البرودة الشديدة و تاخد الغيارات العالية بدرى فى حالة الحرارة الشديدة مثال انت متعود على ظبتت البنزين والعربية انك تاخد غياراتك بعد ال 2.5 فى التالت و 3.5 فى الرابع و 4 فى الخامس مثلا ده لو انت حد مبيجريش بالعربية القيادة العادية بتاعة المصريين فى الصيف هتاخد التالت فى 2.2 و الرابع فى 3.1 و الخامس فى 3.6 لو انت من النوع اللى بيجرى اتعود بس فى الصيف تاخد الغيار بدرى قبلها ب 3 او 4 شرط عشان تحافظ على الغوايش بتاعة العربية فى الشتاء القارص هتعمل العكس هتزود على الغيار شويه 3 او 4 شرط يعنى التالت هتاخده على 2.8 و الرابع على 3.9 و الخامس على 4.4 مهم جدا تعرف انك لو اخدت الغيار بدرى اوى زى ما تاخده متأخر اوى بالنسبة للفتيس هتكسر الغوايش و دية قصة كبيرة عشان تغيرها و طبعا لو قرصت على الغيار لأخر العداد الماتور الله يرحمه

8-مسامير ربط الماتور على الفتيس من قدام و دول مهمين جدا و ممكن يتلفو بدون ما نحس و طول ما الماتور شغال و بيتهز دول بيتهزو معاه المشكله انهم مع الوقت بيضعفو و بيكون لازم يتغيرو لكن انت مش بتاخد بالك و النتيجة بتحصل مع السرعات موجات اهتزازية ما بين جسم الفتيس من قدام و جسم الماتور لأنه مش ثابتين و تبداء رحلة الرايش بقى و تلاقى العربية مش بتديلك التسارع الطبيعى بتاعها ده لو الكوبلن سليم لأن الكوبلن برضو من ضمن الامور اللى بتأثر على التسارع و دوران العجل معاك بعد ما تاخد الملفات حتى لو كانت واسعه


بالنسبة للفتيس الاوتوماتك

نفس النقطة رقم 7 خلى بالك امتى الفتيس بياخد غياراته فى ظروف الحراره الشديدة و البرودة الشديدة و ده حال مصر

النقطة رقم 6 لكن هتضيف عليها انك هتغيره كل 20 الف كيلو بالكتير و هتلاقى عندك مقياس للزيت اضافى غير مقياس زيت الماتور و هتلاقى فلتر مخصوص و لازم فى حالتك و دية نصيحه تفك الكارتيرة بتاعة الزيت الفتيس و تنضفها و لو جوانها بايظ غيره او اعمله بالشزلونج زى ما وضحت قبل كده

نفس النقط 2 و 3 و 4 و 5 و 8 و ضيف عليهم حفاظا على عمر فتيسك و على عربيتك و حياتك على الطريق متخليش اى حد مهما حكى و غنى يلعب فى برمجة السيستم عندك يا تروح للوكيل و تاخد البرمجة اللى انت عاوزها و على مسؤوليتهم الشخصية و الشباية اللى انت محتاجها و بضامنها يا ما تعملهاش خالص و ابعد عن الحرفيين نهائى و متشتريش اى قطعة استيراد للفتيس و مجموعته ابدا


شكرا لوقتكم فى قراءة معلوماتى البسيطة

رد: ازاى تحافظ على فتيس عربيتك الفولكس " جولف - بولو - بيونتير - جي تى اى "
 

رد: ازاى تحافظ على فتيس عربيتك الفولكس " جولف - بولو - بيونتير - جي تى اى "
 

مجهود رائع ... تسلم ايدك

رد: ازاى تحافظ على فتيس عربيتك الفولكس " جولف - بولو - بيونتير - جي تى اى "
 

رد: ازاى تحافظ على فتيس عربيتك الفولكس " جولف - بولو - بيونتير - جي تى اى "
 

نورت المنتدى يا رامى باشا
موضوعاتك غاية فى الروعة