بعد الاستخاره والتوكل على الله ....أخيرا ستروين C4 قولوا ماشاء الله
 

اخوانى واحبائى واصدقائى اعضاء منتدى العمالقه الشهير بمصر موتورز
احب ان اعرفكم اننى وبعد الاستخارات المتعدده والتردد الهائل مابين تركى للمدرسه
الفرنسيه القريبه جدا من القلب والنزوح للمدرسه الالمانيه او الكوريه كما استشار على بعض الاخوه
قررت ان ابقى فى المدرسه الفرنسيه للسيارات وعدم التضحيه بكم الخبرات الهائل التى اكتسبته
فى التعامل مع السياره السابقه المرحومه الاكسارا 2 .


البداية :

وكان قرار البيع لسيارتى القديمه العزيزه جدا على قلبى وكان من الصعب جدا البيع لأن السياره
كثير من الناس من غير المهتمين بالسيارات وهم كثير جدا على فكره لا يعرفون السياره ولا
امكاناتها ولا مزاياها لا يعرفون سوى السمعه السيئه التى تركها لنا وكيل ستروين السابق
فى السياره ال AX , ZX ومشاكل التصنيع وما الى ذلك.


وعملت اعلان فى كونتاكت وكنت عاوز فى العربيه 55000 جنيه وللعلم السياره تسوى اكتر من كده
لكن السوق بتاعنا مابيرحمش السيارات الفرنسيه واسألوا الميجان2 .

والحمد لله وفقت فى بيعها تانى يوم مقابلة افطار رمضان الخاصة بمصر موتورز وبعت ب 50الف
تحت وطأة وضغط السوق ...وربنا يبارك للى أخدها ويكفيه شرها

وكانت الخيارات متعدده انى اجيب سيات توليدو او بورا او سى فور او ميجان هاتشباك ولم تكن التضحيه بالمدرسه الفرنسيه سهله على النفس فكان الاختيار سى فور
وعلى الفور عملت اتصالاتى بأحد الاشخاص فى توكيل الستروين واتى لى بسياره جميله اول ما شوفتها حسيتها جدا وكأنى ارى السياره لأول مره... تسللت الى مشاعرى وكيانى امتلأ بها تماما


كان لونها كحلى وفيها بعض الخدوش البسيطه جدا من الخارج وفابريقه بالكامل وموديل 2006 وماشيه حوالى 64000 كيلو .

وقرارى الاول انى اعملها تقييم فى عز العرب وكانت النتيجه السياره لا يوجد بها اى عيوب ميكاانيكيه وضغط الموتور جيد جدا والفتيس مش مسجل اى اعطال والكهربا تمام عدا الكاوتش
يجب تغييره بالكامل لأنه كاوتش الفابريقه لم يتم تغييره من وقت شراء السياره
السياره تملكها احدى السيدات وهى دكتوره جامعيه وفوضت احد الاشخاص فى بيعها والحمد لله خلصت على 67000 واطلعت على مستندات الصيانات الدوريه فى التوكيل وجبت تاريخ السياره
بالكامل من السيستم بتاع التوكيل .

واستخرت استخاره نهائيه وانا فى الشهر العقارى فى المسجد المجاور له وتوكلت على الله
وعملت مراجعه نهائيه على السياره من الخارج.
والحمد لله السياره اصبحت فى حوزتى الأن.

تقييمى للسياره بعد اول يومين قياده.

- مش عارف ابدأ منين ولا منين السياره تحفه يا جماعه والله سواء من الداخل او الخارج
المقصوره الداخليه ولا اروع رحبه جدا من الامام ومتوسطة الرحابه من الخلف اماكن تخزين متعدده
سواء فى الباب او فى التابلوه او درج التابلوه اللى ممكن ياخد ديك رومى.

-السياره يوجد بها ثلاجه وبلوتوث ومثبت سرعه ومحدد سرعه وتكييف تاتش ومرايات وزجاج كهربائى وكاسيت سى دى بس للأسف اوديو وجير بوكس اوتوماتيك ستيبترونيك وشاشات بيانات تحفة التصميم وعجلة قيادة متعددة الوظائف وطبعا ريموت وسنتر و باور (تحفه).


-السياره بجد تخليك مش عاوز تنزل منها من كتر جمال شكلها من الداخل فرش مريح جدا تابلوه ولا اروع مع الاضاءه البرتقالى التى تتميز بها السيارات الفرنسيه الصنع مع العلم ان شاشة البيانات
الرئيسيه تتحول الى اللون الابيض السماوى فى ساعات النهار لأنها تعكس ضوء النهار من الخارج
وحتى احتيار فونت الرقم الخاص بالسرعه الموجود على الشاشه الرئيسيه مواكب لشكل التابلوه وحتى تصميم السياره من الخارج.





-الكاسيت صوته ملوش حل هو اوديو لكن صوته قوى ونقى جدا ومدعم بسماعات قويه جدا ونقية الصوت .



- شنطة السياره مش واسعه اوى يعنى حوالى 310 لتر يعنى ممكن تاخد حاجة مريم وعمر تقريبا

- اداء السياره كويس جدا وعفشتها روعه قاسيه الى حد ما وتتميز بقوة المساعدين الهائله والاتزان فى الملفات مع السرعات العاليه رائع جدا كعادة ستروين الرائده فى مجال الانسيابيه والثبات على رأى اخويا ( سام رام)
يعنى تقدر تقول عجلة القيادة لا تنقل لك الاحساس بالطريق الى حد كبير.

- الفتيس:
سلاسة التعشيق تحسها على السرعات العاليه فقط لكن من الاول للتانى للتالت فى الزحمه حاسس النقلات تحت قدمى ودي مايحسهاش غير ركيب الاوتو فقط .
لكن التجميع كويس جدا والكيك داون ايضا جيد جدا والاستيبترونيك ممتع للغايه ومتحسش بالنقلات تماما وانت مشغله.
اعتقادى الشخصى ان الفرنساويين فشلوا تماما فى تطوير وصناعة الفتيسات الاوتوماتيك وامامهم فرصه للتطوير والابتكار ويركزوا على الفتيس كما يركزون على التصميمات الثوريه لسياراتهم.

- الفرامل فيها نظام ABS وقويه جدا وحساسه للغايه

- الموتور طبعا N7 موتور مجموعة PSA الشهير الموجود فى اكتر من 10 موديلات للسيارت خاصتهم.

- العزل :
بجد انا ادعو اى شخص يركب سيارتى ويحس مدى العزل داخل المقصوره رائع اد ايه بجد
اختراع.. ماتحسش ابدا بعصبية الموتور على السرعات وصوت كلاكس المقطوره تحب تسمعه وانت داخل السياره كأنك سامع صوت فيروز وهى بتشدو (احنا والقمر جيران).

-فوانيس الاضاءه من صناعة الصانع الاول فى العالم لفوانيس السيارات magneti marelli الايطالى
حاجه جامده اوى .
اضاءه مبهره جدا لا تؤذى القادم من الاتجاه المعاكس وحتى الفوجات اضائتها كافيه فى احلك الطرق
وطبعا فيها حساسات اضاءه مع الظلام .

اه نسيت فيها كمان حساسات مطر يعنى لما الدنيا تمطر المساحات تشتغل اوتوماتيك وتزيد سرعتها مع زيادة سرعة المطر.


اما العيوب مش شايفها حتى الان لكن لو لاقيت هاقول على طول
لكن لو اعتبرت كثافة الفيبر فى المقدمه عيب ماشى نجعله عيبها الوحيد حتى الأن.

واخيرا احب اشكر كل من ساعدنى واعطانى النصيحه والرأى

-ابونورا - سامح رمزى- حازم خضر- ابيزا- بوب-سومو

رد: بعد الاستخاره والتوكل على الله ....أخيرا ستروين C4 قولوا ماشاء الله
 

الف مبروك يا ايموووووووون :)

اختيار موفق و سيارة رائعة :)

ربنا يباركلك فيها يا رب و الف مبروك مرة تانيه:)

رد: بعد الاستخاره والتوكل على الله ....أخيرا ستروين C4 قولوا ماشاء الله
 

الف الف الف مبروك

ياعاشق ستروين

ربنا يعطيط خيرها و تامن شرها و تستخدمها فى الخير دايما

الف الف مبروك يا ايمن

رد: بعد الاستخاره والتوكل على الله ....أخيرا ستروين C4 قولوا ماشاء الله
 

وشكر خاص جدا لصديقى وحبيب قلبى الأستاذ سيف الدين لأنه كان منتظر منى افضل اختيار الجديد
عن المستعمل لكن اعمل ايه يا سيف مابحبش القسط ولا بحب الجمعيات
وربنا يخليك لينا استشارى مالى عظيم للمنتدى

رد: بعد الاستخاره والتوكل على الله ....أخيرا ستروين C4 قولوا ماشاء الله