ابيزا 99 حلوه؟؟؟
 

الاول السلام عليكم جميعا للمنتدي الرائع اولا انا سجلت هنا جديد عشان واحد كبير اوي اسمه الاستاذ محمد ابيزا بجد يا استاذ محمد انا كنت عايز اشتري ابيزا و من خلال البحث علي النت عرفت ان مستر محمد ابيزا هو الزعيم والكبير في مجال الايزا والله العظيم تتبعت حضرتك لغايه ما وصلت هنا انا كان عندي شويه اسئله كده لو مافيهاش رزاله

انا معروض عليا ابيزا99 عامله 87 كم و دواخل فابريقه و حاله ممتازه وعفشه رياضيه السعر 35 الف كنت عايز اعرف اول حاجه معني دواخل فبريقه ان هي ممكن تكون مثلا عامله حادثه من بره و كمان يعني ايه عفشه رياضيه والعربيه دي 1000 سي سي هل ده كويس ولا ايه وهل موديل99 ده كله 1000 سي سي انا اسف جدا يا شباب علي الاطاله عليكو بس هل السعر ده كويس و تنصحوني بايه ويا تري الموديلات الاقدم ال94 مثلا افضل و متشكر مقدما ......................... ........

رد: ابيزا 99 حلوه؟؟؟
 

يا باشا ايه الكلام الجامد ده ربنا يخليك مش عارف اقولك ايه ربنا يقدرني و افيدك بقدر الكلام الجميل اللي حضرتك قلته في حقي :)

اولا يا باشا الابيزا 99 عربية ممتازة اعتمادية توافر قطع غيار توفير بنزين رهيب 350 كيلو في الصفيحة و بتزيد عن كده كمان ضريبة قليلة في ظل ارتفاع ضرايب ترخيص العربيات

دواخل فابريقه يا باشا يعني حضرتك لما تفتح الباب كده تمام هتلاقي بطن الباب من جوا و هتلاقي الحته اللي الباب بيقفل عليها دي بتبقي عليها بويه تمام دواخل فابريقه يعني البويه دي فابريق يعني العربية مرشتش دواخل و دي طبعا حاجة ممتازة و لما اي عربية بترش دواخل سعرها بينزل جامد و طبعا بيبان رش المصنع الاصلي بتاعها من رش صنايعية مصر

بص يا باشا بمنتهي البساطة و بدون الدخول في تفاصيل هتلخمك و مش هتستفاد بيها العفشة الاصلية بتاعت العربية اكيد موجودة فيها معتقدش انه غير العفشة بالكامل تمام اكيد قصده علي المساعدين و السوست المساعدين و السوست الرياضي دول بيبقوا انشف و اكثر قساوة من العفشه العادية بتاعت العربية بس العفشه الرياضية تخيليك تفتقد عنصر الراحة في العربية يعني مثلا في النقر و الحتت المكسرة العفشه العادية تاخد و تدي مع الارض و متحسسكش بالتكسير اللي انت ماشي فيه تمام العفشه الرياضية لا هتحس بالكلام ده كله بس هي فيها ميزة انها بتعلي ثبات العربية في السرعات العالية مع ان الابيزا مش محتاجة ثباتها يزيد لان ثباتها ممتاز

ال 1000 سي سي موتور اعتماديته عالية مش وحش و شغال زي الفل مع ناس كتير جدا تمام و موفر في البنزين و كله علي حسب اتسخدامك لو استخدامك عنيف طبعا بحكم انه موتور صغير هيبقي مش قوي اوي معاك انما هيستحملك لو استخدامك عادي و اغلبه جوا المدينة هيبقي كويس معاك و هيوفرلك بنزين كتيييييييييييييييييييييير

الابيزا ال99 في مصر في منها 1000 و 1400 بس 1400 قليل مش كتير

و طبعا ال 94 افضل من 99 ال94 اساسياتها كلها جولف 2 و 3 انما ال 99 بولو و البولو اضعف و اقل اعتمادية من الجولف لكن برضه عربية ممتازة

و اي استفسار انا موجود:) و ربنا يوفقك

رد: ابيزا 99 حلوه؟؟؟
 

يا باشا دي اققل حاجه تتقال في حقك و انا اللي مش عارف اقولك ايه علي سعه ردك و معلوماتك و مجهودك بجد حاجه جميله جدا معقول لسه في ناس حلوه كده في مصر عايزين يخدموا و بس !!!!!

طب بالنسبه للسعر يا زعيم رايك ايه فيه و بعدين في حاجه محيراني بعد ازنك ليه الشركه نزلت الموديلات الجديده اوحش من القديمه دي غلطه بشعه .......
و بالنسبه لل94 ايه السعر المناسب ليها يعني لو حالتها ممتازه من كلو تبقي عامله كام مثلا.....
و ايه اكتر موديل تنصحني بيه يعني الموديل اللي ادور عليه في كل حته و امسك فيه بايدي و سناني

و الف شكر ليك يا كبير مره تانيه و يارب ما يحرمنا من خبراتك و معلوماتك ابداااااااااااااااااااااا ااا

رد: ابيزا 99 حلوه؟؟؟
 

يا باشا ده واجب عليا:)

السعر يا باشا معقول بس في اغلي من كده انا بس عايز اعرف حالتها ايه عشان اقدر اقول السعر كويس ولا كتير اكشف علي العفشه و قيس كبس المكنة و سمكري يكشف علي الصاج و يشوف حالته برضه و الاحواض و القوايم و كده و لو محتاجة مصاريف قولي محتاجة ايه و انا اقولك تاخدها ولا لا و كده

قولي احتياجاتك من العربية عشان اقدر اقولك انهي موديل تمسك فيه بأيدك و سنانك لو مشيك مشي عادي و اغلبو جوا المدينة وعايز حاجة توفر بنزين يبقي ال 99 لو عايز حاجة تفرم فيها و حرق و شد و كده و تستحملك يبقي 94 بس ال94 1300 كربراتير فا استهلاكها اعلي في البنزين

يا باشا مش غلطة من الشركة ولا حاجة الفرق مش بشع بين العربيتين بس ال 94 افضل فاهمني بالمقارنات بين الاتنين و نفس الحاجة هنا و هنا دايما ال 94 بتتفوق علي 99 و عموما يا باشا القديم احسن من الجديد في كل العربيات مش سيات بس و برضه ال 99 ممتازة مش هتندم عليها كفاية انك تمشي بصفيحة في حدود 350 كيلو حد طايل ptmnlo123per1106

و برضه عربية اعتمادية جدا و بتستحمل فا متقلقش و يا ريت تقولي حالة العربية اللي ادامك بظبط و تقولي اقصي مبلغ ممكن تدفعه و انت ايه احتياجاتك بظبط من العربية

رد: ابيزا 99 حلوه؟؟؟
 

بالنسبه لاحتياجي فحيبقي جوه البلد يعني اروح بيها الكليه اتفسح مع صحابي كده يعني مع العلم اني سواقتي هاديه جدا و مش بتاع جري ولا تغريز بس في نفس الوقت عايز عربيه مثلا لما احب اسافر بيها تدي معايا وبرضو لو كنت مستعجل و حبيت اجري برضو شويه ما تقولش لا بس انا اهم حاجه عندي ان العربيه تبقي اقل مصاريف و مشاكل ده رقم واحد قبل ال سي سي و الكلام ده وبرضو اللي قطع غيارها ارخص و اكتر توفر و اسهل في التعامل معاها طبعا حضرتك عشان استاذ و رئيس قسم فهمت ان انا عايز عربيه عمليه....... وبالنسبه للمبلغ انا اخري 34 او اقل حبه كمان

اما حضرتك العربيه اللي معروضه عليا حالتها فوق الممتازه طبعا بالنسبه لعين الناظر بمعني اني لسه ما كشفتش عليها بس انا حاسس ان شاء الله انها زي الفل مع العلم انها متظبطه من كلو يعني كاسيت سي دي جنوط سنتر زجاج كهربي كل الحاجات دي بس حضرتك اللي شدني انها عامله 87 كم بس و انا من خبرتي الصغيره اعتقد ان ده ممتاز بالنسبه لعمر العربيه ولما اتكلمني قالي نخلص علي 34

وطيعا عشان احترت قولت لازم اسئل الكبير محدش حيفدني غيره....

رد: ابيزا 99 حلوه؟؟؟
 

تمام يا باشا يبقي خليك في ال99 كده انت مش هتحتاج الاستفذاذ اللي بيحبه الشباب في ال 94 ptmnlo123per122

بس عشان متقولش محمد مقاليش العربية قطع غيارها مش غالية اوي بس مش رخيصة دي حاجتها كلها الماني و اسباني انما هي مش بتستهلك قطع غيار حاجتها معمرة

اكشف قبل ما تشتري اكشف قبل ما تشتري اكشف قبل ما تشتري انا قلتها 3 مرات اهو اكشف اكشف اكشفptmnlo123per122

ميزة العداد الديجتال بتاع ال99 ان صعب اللعب فيه فا الي حد كبير العداد صادق بس برضه الكشف هيخلينا نتأكد اذا كان العداد مش ملعوب فيه ولا ملعوب فيه

بس لو 87 الف فعلا يبقي خدها بس برضه اكشف

رد: ابيزا 99 حلوه؟؟؟
 

يا باشا بجد مش عارف اقولك ايه مش معقووووووووووووووولل!!!!!

ايه السرعه و الجمال في الرد و التنسيق ده...انا حاسس زي ما تكون اخويا اللي بينصحني واللهptmnlo123per112
انا بس ليه سؤال اخير انا عارف ان من كتر الاسئله اللي سئلتها لحضرتك مفروض تيجي تضربني و تهزئني كمان بس معلش انا عشمان في كرم اخلاقك فاستحملني شويا.....

ايه احسن طريقه للفحص عن العربيه من كلو و ادق طريقه ايه عشان ما اتخمش اخوك اصلو غلبان شويه ههههههههه

و طلب اخير بس ده محبه والله ممكن ايميل حضرتك و ما تخافش مش حرزل علي حضرتك و لو مش حينفع صدقني مافيش والله اي مشكله
و مليوووووووووووووووووووووو ووووووووووووووووووووون مليوووووووووووووووووووووو ووووووووووووووووووووووون شكر يا باشا علي زوقك ومجهودك الجبار ......................... .