تكييف النترا 2011 ضعيف جدا
 

معايا النترا 2011 بقالها اقل من سنة و لما استلمتها كانت فى اواخر صيف 2010 حسيت ان التكييف ضعيف و كنت متوقع القاه فريزر زى ما سمعت عنه
و عند صيانه ال 1000 قلتلهم على التكيييف و كشفوا و قالولى انه كويس
لما ابتدى الصيف السنة دى ابتديت اشغله فى عز الضهر الاقيه كأنه مروحة لكن لو شغلته بالليل او لما الجو يبقى كويس الاقى التكييف بارد
و المفروض ان الواحد مش ها يشغله اللا فى الحر و انا استغربت اوى لانى قعدت فى عربية فيرنا 2009 و لقيت تكييفها تلاجة !!
انا لسه ما عملتش صيانة ال 5000
ياريت حد يقوللى اعمل ايه مع العلم انى من النوع اللى ممكن يبرد فى عز اغسطس - تخيلوا بقى لما واحد زيي يقول انه بيبقى عرقان و التكييف شغال

رد: تكييف النترا 2011 ضعيف جدا
 

ممكن مبدئيا تشوف فلتر التكييف
وخصوصا اليومين دول حر وتراب

فحاول تفكة ونظفة الاول وبعدين نشوف السبب التانى

واكيد هتلاقى ردود تانية

انا عندى لما بنظف الفلتر رقم 1 بيبرد كويس جدا واحيانا مش بتحمله

رد: تكييف النترا 2011 ضعيف جدا
 

بص هو انا معرفش الالنترا قوة تكييفها عاملة ازاى عندك لكن اللى اعرف انى الفيرنا اققوى من الالنترا فى التكييف ودى معروفة لانى جرب تكييف الالنترا والفيرنا وعارف الفرق بس تكييف الاللنترا مش وحش للدرجة دى وعلى فكرة انا انهاردة لسة جاى بالعربية الفيرنا بتاعتى ومشغل التكييف ولقيتة مش زى ما كنت مشغلة امبارح مش قوى اوى قلقت وهديت وركنت فى حتة ضلة شوية وعلى فكرة الجو كان نااااااار والعربية مولعة ارض وجو هديت العربية لانى كنت ماشى بقالى 3 ساعات متواصلة وبحرق على الغيارات والجو فى الصالو مولع ولما قربت من المدينة قلت اشغلة قلما لقيت كدة ركنت ربع ساعة اريح شوية العربية وتهدى من السخونة وشغلت التكييف وكان اعلى من المرة اللى فاتت شوية فقلت جايز العربية والجو لية عامل
فانت جرب النترا تانية بتاعت واحد صاحبك وشوف نفس القوة وبرضة يكون الجو حر مش تجرب باليل وشوف

رد: تكييف النترا 2011 ضعيف جدا
 

اتأكد من وضع مفتاح اختيار مسار الهواء انه يكون على وضع تدوير الهواء و ليس وضع دخول هواء من الخارج
لو حل المشكلة يبقى تمام بس متنساش لو ركنت العربية فى الشمس ابقى رجعه على وضع الهواء الخارجى علشان الازاز ميطرشقش

رد: تكييف النترا 2011 ضعيف جدا
 

التكييف بيتحسن بعد التشغيل يعني لما هاتوصل لل5000 هايكون احسن
تاني شء علشان كفاءة التكييف تكون كويسة لازم العربية ماتونش مركونة في الشمس ومولعة لان ده هايخلي العربية تاخد وقت كتييييير علشان توصل للبرودة المعقولة
تالث شء الحر اللي في مصر اليومين اللي فاتو عايزين تكيف سحري مش تكييف عادي انا كنت بركب عربيات كتير ومش حاسس ان التكييف شغال ومنها مرسيدس وكورولا وفيرنا وسيراتو
انا معايا النترا 2011 وتكيفها على 2 بيكون معقول

رد: تكييف النترا 2011 ضعيف جدا
 

من كلامك اعتقد أن السيارة جديدة ولا يوجد بها مشاكل، ولكن قد يوجد مشكلة في طريقة استخدامنا

أول حاجة اتأكد إن التكييف مظبوط صح، عشان كده راجع التالي:
1- مؤشر الحرارة على أقل درجة حرارة (أقصى درجة في اللون الأزرق)
2- مخرج الهواء مظبوط على الوضع العلوي المواجه لوجه الركاب (الوضعية اللي فيها شكل رجل جالس ويوجد سهم ناحية الوجه)
3- الهواء يتم تدويره داخل السيارة (شغل الزر اللي فيها شكل الشيارة وداخلها سهم ملفوف)
4- وأخيرا تأكد من تشغيل زر الـA/C

وكما قال الزملاء في ردودهم... يمكن توفير الوقت اللازم للتبريد بمراعاة الآتي:
1- حاول قد الإمكان تجنب الوقوف تحت الشمس، وإذا لم تستطع استخدم عواكس الحرارة والشماسات أو قم بتغطية السيارة
2- قبل تشغيل التكييف افتح الشبابيك للتخلص من الهواء الساخن المحبوس وإبداله بهواء أبرد من الجو المحيط في الشارع (درجة الحرارة داخل السيارة قد تصل إلى 85 درجة مئوية)
3- شغل التكييف لفترة قصيرة قبل إقفال الشبابيك لإخراج الهواء الساخن داخل مجاري الهواء في التابلوه ويفضل على أقصى سرعة للمروحة
4- حاول على قدر الإمكان عدم السير في شوارع مزدحمة لزيادة كفاءة التكييف

إذا لم تستمتع بالتكييف بعد كل ذلك... فمن المؤكد أنه يوجد مشكلة في التكييف ويجب عليك التوجه إلى التوكيل تحت الضمان.
خذ في اعتبارك أن مقصورة الإلنترا كبيرة نسبيا مما يجعلها تأخذ وقتا أكبر لكي تبرد



..

رد: تكييف النترا 2011 ضعيف جدا
 

بص المشكلة دى كانت عند واحد شارى النترا 2011 بردوا وكان العيب فى فلتر التكيف كان مسدود !!

نضف الفلتر واتاكد انك مشغل التكيف مش المروحة !!


تكيف الانترا كويس جدا زيو زي الفيرنا

انا كان معايا فيرنا ودلوقتى معايا النترا وفعلا التكيف ممتاز فى الاتنين