ساعدوني انا محتار اشتري عربية ايه
 

السلام عليكم
الحمد لله بعت ال 128 و عاوز اشتري عربية جديدة
انا دورت علي تقسيط اسلامي و استقريت علي كونتاكت كارز بس المشكلة ان نظام المرابحة عندهم اعلي من اي مكان تاني
و لسة هسأل في البنك الاهلي فرع المعاملات الاسلامية
انا محتار بين العربيات التالية
رينو لوجان فول اوبشنز ( عشان سعرها معقول)
رينو سكالا (مانوال فول اوبشنز)
نيسان صني (مانوال فول اوبشنز)

محتار اختار مين فيهم
و محتار بين التوكيلين
انا دخلت علي القسم بتاع الرينو و النيسان و كل قسم بيقول انهم احسن عربيات في السوق و يتهيألي ان الناس اجمعت ان التوكيلين مش كويسين في المعاملة و احتكار قطع الغيار
يا ريت تساعدوني

رد: ساعدوني انا محتار اشتري عربية ايه
 

السلام عليكم
بص يا باشا ,
انا كنت سألت فى البنك الاهلى فرع المعاملات الاسلامية , من الآخر ..... نفس نظام البنك العادى .. بس بيعملك عقد مرابحة عشان يغطى نفسه من الناحية الشرعية , و ما عادا ذلك فـ كله زى المعاملات العادية , يعنى ضحك على الدقون و احتيال على الشرع ,فأنا مرضتش اشترى منهم , و الله اعلم
كونتاكت فعلا اعلى نسبة مرابحة و ميهمهمش معاملات الاسلامية و لا غير اسلامية , المهم انهم يبيعوا . بس هما الى حد كبير شركة محترمة لغاية دلوقت و زمان كانوا اكثر احتراما من دلوقت

رد: ساعدوني انا محتار اشتري عربية ايه
 

انا معنديش معلومات عن الرينو , ليا واحد زميلى معاه نيسان صنى و هو بيشكر فيها
صلى استخارة و ربنا يكرمك و يقدرك للى فيه الخير

رد: ساعدوني انا محتار اشتري عربية ايه
 

الله يكرمك
ممكن الواحد يجي علي نفسه و يشتري بالغالي طالما انه حلال
لاني و بصراحة جربت الكرديت كارد (ماستر و فيزا) و بصراحة و ربنا يسامحني مكنتش بهتم اوي بموضوع الفوايد و غيره و بصراحة اتكويت بنارها و لسة بتكوي بنارها لحد دلوئتي
فانا بانصح اي حد انه يبعد عن الربا

رد: ساعدوني انا محتار اشتري عربية ايه
 

ربنا يباركلك و يوفقك للى فيه الخير
نصيحة صغيرة من اخ . على قد ما تقدر ابتعد عن التقسيط ,
و وجهة نظرى الشخصية . ابتعد عن السيارات الزيرو , الا لو كانت مثلا عربية مرسيدس و انت مش ناوى تبيعها , و ناوى تخليها معاك و تفضل من بعدك للأولاد بعد عمر طويل ,
انا اشتريت عربيتى 2008 لانسر 1300 سى سى , واقعة عليا بـ 110 الف جنيه بالرغم من ان سعرها كاش كان بـ 90 الف بس ( انا دفعت 50 الف مقدم و الباقى على 4 سنوات ) النهاردة انا لو حبيت ابيع مش حتجيب اكتر من 65 او 70 الف بالكتير , عشان كدة انا مش بفكر ابيعها الا للضرورة

رد: ساعدوني انا محتار اشتري عربية ايه
 

انا بافضل نيسان صني، يمكن عشان انتشارها اكتر وقطع غيارها افتكر ارخص من الرينو ومريحة من الداخل اكثر واوسع في حجمها وبالتوفيق

رد: ساعدوني انا محتار اشتري عربية ايه
 

ازيك يا بشمهندس محمد ... كل سنه و انت طيب ...
حضرتك عارف طبعا ان في تحالف بين رينو و نيسان
وبالتالي السكالا والصني يعتبروا نفس العربيه من حيث الابعاد والمواصفات العامه
لكن الصني موتور نيسان و السكالا موتور رينو
والصني تجميع محلي و فيه نسب مكونات محليه و السكالا كوري
للاسف التجميع المحلي مش اد كده .. هو في الصني اول ما ابتدت كان احسن والواحد استبشر خير ... عن تجربه بعربيه زميلي في الشغل سوقتها و وركبتها معاه كتير .. بس عيوب تقفيل بسيطه ممكن تتغاضى عنها ... لكن اساسيات العربيه كموتور و عفشه و فرامل و فتيس ممتازه ...
عيب الصني الاكبر انها ضيقه شويه من ورا مقابل شنطه كبيره وواسعه و غالبا حيكون ده نفس الوضع في السكالا بس للامانه انا مركبتهاش و انصحك تبص عليهم بنفسك في نفس اليوم علشان تقدر تقارن صح ... خصوصا في جزئيه التقفيل و الخامات ووسع الصالون ...

الغريب بقى ان اللوجان رغم انها فئه اقل منهم الا انها واسعه جدا من جوه و شنطتها كبيره
وتقفيلها مقبول جدا

فلو حيفرق الموضوع ده معاك وتقدر تدفعها كاش .. يبقى توكل على الله بدل ما تزنق نفسك في اقساط وفوايد ونظام مرابحه في ظاهره ربا رسمي في باطنه

وان شاء الله ربنا يوفقك لاحسن حاجه ... وابقى طمنا عملت ايه