مشكله فى اوبل فيكترا و عايز اعرف حلها
 

يا جماعه معايا اوبل فيكترا موديل 98 و هى اوتوماتك و 2000 cc و مشكلتى معاها ان الميه بتنقص جدا يعنى مشوار واحد قريب و الاقى ميه القربه كلها خلصت و رحت كشفت على الرادياتير و فكيته و و طلع سليم و مافيش اى حاجه بتسرب و مش عارف منين المشكله دى ..... فأرجو من خبراء الأوبل مساعدتى لحل هذه المشكله.......

رد: مشكله فى اوبل فيكترا و عايز اعرف حلها
 

راجع على اكواع المياة وارفع العربية وهى شغالة وبص شوف التسريب منين وفى الغالب هيكون من احد الاسباب الاتية:
1- كوع مياة بيسرب
2- خرم فى الردياتير
3- غطاء القربة بيسرب
4- اويل سيل كوع
5-خرطوم الساخن او مشترك الخراطيم
6-الوصلة اللى من القربة للردياتير.

والقصة مش محتاجة حد متخصص ارفعها علشان تشوف التسريب منين وانشااالله بسيطة ولغاية ما تعالج العيب عينك على الحرارة ما تتشلش وتتابع المياة اول بأول

رد: مشكله فى اوبل فيكترا و عايز اعرف حلها
 

و ايضا طبب المياه اللى فى البلوك
على فكرة لو مفيش تسريب مياه ظاهر و واضح يبقى ممكن يكون فيها جوان وش سلندر
ربنا يستر

رد: مشكله فى اوبل فيكترا و عايز اعرف حلها
 

احب اضيف حاجة انا كان عندى فى العربية بيحصل تسريب بس مش لدرجة انة ينزل لتحت العربية

دورها و سيبها شوية و بعدين بص من تحت زى ما اناس قالولك افتح الكبوت و بص على الاقفيزات بتاعت خراطيم المية كويس

لان العيب عندى طلع من فقيز بيسرب و ان شاء الله هتلاقى العيب

رد: مشكله فى اوبل فيكترا و عايز اعرف حلها
 

شوف يا باشا
لو فى دخنه بيضا بتطلع من ورا فى درجه الحراره العادية يبقى احتمال وش سلندر بس انا استبعد ده

لو مفيش
لو بتلاحظ تكون شبوره على الزجاج الامامى عند فتحه التكيف السخن من فوق التابلوه جنب الزجاج بالظبط
او لو فى دواسه الراكب الامامى جنب السائق لاقيت فى ماية بتجيى يبقى كده دوره السخن بتاعت التكيف بتسرب مايه

غير كده يبقى
- فى افيز مش مربوط كويس
- فى خرطوم فه شق صغير جدا مش بيفتح الا لما العربيه تسخن وهى ماشية لكن فى درجه الحراره العادية مش هيبان
- غطا قربة الماية بايظ وبيسرب الماية تحت الضغط

رد: مشكله فى اوبل فيكترا و عايز اعرف حلها
 

بص ياعمنا أنا كان معايا أوبل فيكترا موديل 98 200 سي سي وكانت معايا من الزيرو لحد مابعتها والحمد لله سنة 2006 وخلصت من مشاكلها وتكاليفها الباهظه
أنا كانت عندي المشكلهإللي حضرتك بتشكي منها ديه
وغيرت ستمائة حاجه (ناس تقولي يمكن دورة التبريد بتاعة الفتيس أو الباور هما اللي فيهم التسريب وغيرت الخراطيم الخاصه بهما ولم تفلح ثم البعض قالي القربه بتاعة الميه يمكن تكون بتسرب مع الحراره ويكون فيها شرخ بيتسبب في ده (أنا عايز أقولك إن الكل أكد إن الرادياتير سليم) وغيرت القربه بالغطاء ولم تنجح العمليه وحصلت مشكله كده في الوسط وطرمبة الميه باظط وغيرتها وساعتها قالولي يمكن الطرمبه كانت هيه السبب وبتسرب ميه قولت طيب أدينا غيرناها ولم تنجح برضه
ماطولش عليك طلعت المشكله في الرادياتير (ولعلمك حتى وأنا واخد القرار وبشتريه وبركبه الصنايعي مكانش مقتنع إنها من الرادياتير) بس أنا قلتله أنا غاوي نظافه هوه اللي بقي في دورة التبريد مابقاش في حاجه تانيه ناقصه , وبالفعل بعد تغيير الرادياتير إنتهت المشكله تماما
يعني شيك على الخراطيم لو لقتها سليمه إتوكل على الله وغير الرادياتير بيبقى للأسف مخروم من حتت كتير وعامل ومش باينه وبيبخر المايه

نصيحه أخويه لو مش عزيزه عليك إخلص منها وحقولك ليه أنا لم يسبق لي أن رأيتك ولا شفت عربيتك بس حقوللك عن تاريخها معاك بدون ماأشوفها لأنها عيوب مشتركه وعامه في الأوبل فيكترا الشكل ده:
1- البطاحات إللي بتبقى فوق المساعدين تقريبا محتاجه تغيير كل 8 شهور
2- المساعدين أمامي وخلفي محتاجين تغيير كل 14 شهر على الأكثر إن لم يكن 12 شهر خاصة الخلفيين خفاف جدا
3- الـ مـاف <==== وده حاجه كده عشان ظبط الهواء والبنزين وبيسبب برجله للموتور وبتطلع لمبه لونها برتقالي بالتابلوه مرسوم عليها موتور
4- قاعدة الشداد العلويه للموتور بتتغير كل بتاع سنه هيا التانيه
5- طرمبة البنزين الكهرباء إللي تحت الكنبه الخلفيه بتتغير كل سنتين تقريبا وبتعملها معاك في أي حته وتقطع بدون سابق مقدمات
6- الموزه الموجوده بالباب مقبض الباب الداخلي يمين وشمال قدام بيتهروا الكاوتش بتعاعه
7- شاشة العرض بتاعة الساعه والراديو وخلافه الليدات بتاعتها بتقع واحده ورا التانيه لحد ماتضلم خالص
وغيره وغيره وغيره
وعشان كده العربيه ديه سعرها واقع في المستعمل
وربنا يعينك عليها

رد: مشكله فى اوبل فيكترا و عايز اعرف حلها
 

شكرا لكل اللى شارك فى الموضوع بخبراته و احب اوضح انى وصلت فعلا انه كنت هاغير جوانات وش السلندر و اتفقت مع واحد و كان هايعملها ب 1500 جنيه ............
المهم واحد دلنى على صنايعى محترم و امين جدا جدا و شغال فى التوكيل و عنده ورشته .... و رحتله علشان برده يكشف على العربيه و قلتله على العيب بتاع نقص المياه .... عمل ايه بقى ؟؟؟!!!!

اشترى ماده حمراء اللون زى البودره و راح حاططها فى زجاجه نص لتر و راح دالقها فى قربه الميه و قالى اللون ده هايظهر معاك من مكان التسريب لو جوانات يبقى هايظهر فى الشكمان لو الرادياتير يبقى هايظهر مكان الخرم او الكسر ..... و عموما امشى بيها يومين و تعلالى ......

بعد يومين رحتله و الميه كانت ناقصه برده بص على العربيه و قالى ده غطاء القربه عايز يتغير ..... بس كده ؟؟

ايوه ..... بس كده

كام يا عم الحساب ...... رد و قال اتكل على الله , الغطا من عندى و المتده ببلاش من عند الموان اخد فلوس على ايه ؟؟

طبعا بعد الكلام ده و الأمانه دى سبتله العربيه و قلتله يغير كبالن و مساعدين و تيل الفرامل و لوحده راح مصلح السنتر و جابلى طاسه الأوبل اللى كانت ناقصه فى العربيه ........

و شكرا لأهتمامكم و اللى عايز يعرف مكانه ... هو فى وش سعودى بتاع السيارات اللى جنب حديقه الفسطاط و اسمه عباس و اللى عايز تليفونه ماعنديش مانع طبعا ...................