|
الأستاذ محمد إبيزا .. ممكن سؤال يافندم ؟؟
السلام عليكم جميعا يا معشر محبى السيات وخصوصا الإبيزا فى كل مكان .. بخصوص الإبيزا 94 سعة 1300 هل ياترى ينفع يركب لها تكييف ؟؟ ولو ينفع أشتريه منين ويركب عند مين ؟؟ وسعره كام ؟؟ كمان عاوزه أغير الريداتير .. هل الأحسن أشترى واحد إستيراد ولا الأفضل إنى أعمل واحد نحاس نفس المقاس حسب كلام الأسطى بتاع الريداتيرات ؟؟ طيب ولو الأفضل الإستيراد .. ييجى منين ؟؟ وسعره حوالى كام ؟؟ شكرا للجميع .. شكرا استاذ محمد إبيزا .. |
رد: الأستاذ محمد إبيزا .. ممكن سؤال يافندم ؟؟
اقتباس:
لو الموتور نضيف و حالته حلوه ركبي تكييف بس لو الموتور تعبان بلاش عشان هيقصف عمره مع مراعاة ان في حالة تشغيل التكييف الاداء بيقل شوية عشان كده بقول لازم يكون موتور حالته حلوه منين من اي تاجر استيراد بتاع سيات عشان تاخدي التكييف الاصلي متحطيش اي تكييف غير الاصلي و بيتكلف حوالي 3000 جنيه غير مصنعية التركيب الردياتير متعمليش تفصيل هاتي واحد اصلي استيراد يكون سليم و كويس و يتنضف و يركب سعره حوالي 250 تقريبا من الوكاله او الحرفيين |
رد: الأستاذ محمد إبيزا .. ممكن سؤال يافندم ؟؟
ميرسى أوى يا استاذ محمد على اهتمامك وسرعة الاستجابه .. حضرتك فعلا محترم جدا وخدوم جدا ..
بس حضرتك مش شايف إن 3000 كتير شويه !! قالولى فى ورشه فى مصر الجديده بتركب تكييف جديد بنص المبلغ دا ، بس أكيد الأصلى أصلى طبعا . الأسطى بتاع الريداتيرات قالى إن الريداتير النحاس أغلى وأمتن كتير من اللى فى العربيه ، وقال كلام كتير مفهمتش منه حاجه غير إن الأصلى ألومنيوم وفبر ، ودا بيكون أقل فى العمر وصعب فى الصيانه والتسليك واللحام . مؤشر الحراره عندى يعتبر ميت .. مبيرفعش ولا شرطه واحده ، ولما رحت للكهربائى قالى إن العداد سليم وشغال .. طيب فين العيب يافندم ؟؟ شاكره لك مقدما أستاذنا العزيز .. |
رد: الأستاذ محمد إبيزا .. ممكن سؤال يافندم ؟؟
اقتباس:
3000 ده الاوريجينال و كمان 3000 ده هتجيبي بيه كويل و كباس و سربنتينه و توصيلات و خراطيم و حوارات كتير يعني مش هتجيبي حاجات قليلة يعني و متركبيش اي حاجة عشان ممكن تخربلك الموتور و فيه واحد صاحبي ركبه من سنة بالمبلغ ده كل الكلام اللي اتقالك ده اتقالي و اتقال لاصحابي .. مفيش احسن من الردياتير الاوريجينال اللي العربية نزلت بيه .. المصنع ادري بعربيته من اي صنايعي فاشل في مصر ! و علي فكرة انا عندي الاصلي بتاعها و العربية اتخبطت عندي من قدام من فترة كده و محصلش فيه حاجة ولا اتكسر ولا باظ ولا اي حاجة و بقالي سنين معملتلوش صيانه ولا سكلته ولا اي حاجة من الكلام ده شوفي الترموستات اللي العداد بياخد منه قراية الحراره لو بايظ مش هيخلي العداد يقرا ده في حالة لو حضرتك متأكده ان العيب مش من العداد |
رد: الأستاذ محمد إبيزا .. ممكن سؤال يافندم ؟؟
حضرتك طمنتنى بجد على الريداتير ، لأن كل الناس تقولك لازم صيانة الريداتير كل طلعة صيف ( تسليك وغسيل وخلافه ) وأنا أول مره أروح لصنايعى ريداتيرات بصراحه .. العربيه شغاله معايا من يوم ما جبتها زى الفل ، لاسخنت ولا قصرت معايا .. بس تقول إيه فى نصايح الناس ، والراجل ما صدق إنى دخلت ورشته وفتح الكبوت ، قال دا ريداتير ورق وعامل زى لعب الأطفال ، سيبك يا آنسه من العربيات الجديده دى ، لا يعلى على الفيات 131 وال 132 والشاهين و ال504 !! قلت له بس العربيات دى خلاص إنقرضت !! بس يا استاذ محمد ، أنا قلت الكلمه دى والراجل طاح فيا .. إنتى بتقولى إيه يا هانم ؟؟ دى العربيات الأصليه اللى اثبتت كفاءه فى مصر وعايشه مع الناس وكل الصنايعيه حافظينها وبيشتغلوا فيها وهما سايبين إيديهم ومغمضين .. كل الجديد دا ورق ، لا صاج ولا مواتير ولا عفشه ولا اى حاجه .. كله ورق .. دا بيضحكوا عليكو بشوية التولته والرفاهيات والكماليات ..
قلت له إيه ياعم ؟؟ إنت شايفنى راكبه أوكتافيا ولا باسات ولا هوندا !! دى عربيه إبيزا كاربراتير بنت عم الجولف ، إنتاج فولكس .. !! قالى فين الفولكس بتاع زمااااان !!!!!!!!! دا زمن مايعلم بيه إلا ربنا !! طبعا يا استاذ محمد عقليات صعب التعامل أو التفاهم معاها ..!! أنا آسفه لو كنت طولت على حضرتك .. بس بجد أنا بفهم من حضرتك كل اللى مش بقدر أفهمه من أى حد .. تسلم يافندم .. وربنا يخليك لينا .. ويجعله فى ميزان حسناتك .. |
رد: الأستاذ محمد إبيزا .. ممكن سؤال يافندم ؟؟
اقتباس:
الابيزا حاجتها متينه و بتعيش مقلناش حاجة لكن الافضل عشان تعيش اكتر انك تعملي صيانه ممكن متعملش و مش هتشتكي عادي بس لو عملتي صيانه هيبقي احسن هقولك ليه اولا تشيلي الصدا اللي بيتمدد في الحديد داخل دورة الميه و وش السلندر تاني حاجة تحافظي دايما علي الرادياتير نظيف و سالك لان التراب لما بيتجمع عليه من فترة للتانيه بيكتمه حبه علي حبه هتلاقي الهوا مش واصل كويس ليه و العربية تسخن فا الافضل انك تعملي صيانه عشان الحاجة عمرها يتضاعف و تبقي العربية دايما فايقه و نضيفه و اعطالها هتقل طبعا و سيبك من الراجل الغريب ده ! ده تلاقيه عامل شبه الديناصور المنقرض ! اولا رادياتير الابيزا مش فيبر العلب اللي في الجناب بس هي اللي فيبر و علي فكرة ردياتير المرسيدس برضه كده علب الجناب فيبر ! انما الردياتير نفسه مش فيبر و تبريده ممتاز و بيعيش كتير خصوصا لو الاصلي بتاعها اللي هو فاليو MADE IN SPAIN ده عايز يعمل عليكي شغل و يكرهك في العربية و خلاص ! كمان علي فكرة لو ركبتي الاوكتافيا و الباسات هتلاقيهم ميقلوش متانه عن الابيزا نفس مستوي الاعتمادية للمحرك و العفشه و نفس المستوي من جودة التقفيل و التجميع لان كلهم ينتموا لفولكس فاجن جروب ! بأختصار علامة فولكس و اودي و سيات علي اي عربية بيدي ضمان للي راكبها و ده بشهادة كل اللي ركبوها و اي سؤال انا موجود و هرد علي كل اسئلة اعضاء المنتدي الخاصة بسيات و فولكس ان شاء الله و مفيش اي ازعاج :) |
رد: الأستاذ محمد إبيزا .. ممكن سؤال يافندم ؟؟
لو سمحت انا عوز رقم تليفونك الاستاذ محمد ابيزا
|
| الساعة الآن 12:19 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017