الحمد لله أخيرا 405
 

السلام عليكم و رحمة الله و بركاته

أخيرا و بفضل الله تعالى اشتريت حبيبة قلبى بيجو 405 مو 91 فرنساوى و الحمد لله العربية حالتها كويسة جدا بس ناقصها compressor التكييف بس مش مشكلة , ناوى أجيبه على مهلى إن شاء الله
بس هوه فى حاجه واحده بس؟
دى أول عربية ليا
فيا ريت حد يقولى هل فى حاجات بتتغير أول لما أستلمها؟ و أحطلها زيت إيه؟ و أحافظ عليها إزاى؟يا ريت تفيدونى فى الموضوع ده.
وفى سؤال كمان
يا ترى أخلى صاحب العربية يعملى توكيل و لا نعمل عقد بيع؟ أيهما أحسن؟
ويا ريت حد يقولى أرفع الصور إزاى؟

رد: الحمد لله أخيرا 405
 

الف الف مبروك ربنا يبارلك فيها ويديك خيرها ويكفيك شرها وبالنسبة للزيت موبيل 10 الف والورق ماعنديش فكرة والله

رد: الحمد لله أخيرا 405
 

مبروك اخى الكريم
ياريت لو تقول لي سعرها كام

رد: الحمد لله أخيرا 405
 

الف الف مبروك عليك السياره
ياريت لو تقرير بعد التجربه ..... ويكون بالصور

رد: الحمد لله أخيرا 405
 

الف مبروك ربنا يديلك خيرها ويكفيك شرها
ثانيا يا ريت تغير كل السيور اللى فى العربية خصوصا سير الكاتينة لأنت انت متعرفش هو ماشى اد ايه واصلى ولا لأ
ثالثا غير كل الزيوت ومعلش هى مصاريف فى الأول بس هتريحك بعد كده يعنى غير زيت الفتيس والمحرك وشوف مستوى زيت الفرامل والباور
بالنسبة لنوع الزيت هو اشهر الأنواع موبيل وشيل واسو أكتر حاجة الناس بستخدمها هو الموبيل
موضوع توكيل او بيع ده سيان مش هيفرق انما يعتمد على حضرتك لو انت مش هتنقل الرخصة دلوقتى يبقى اعمل توكيل وامشى بيه لحد ما تيجى تنقل الرخصة ,,, ولو انت هتخاص كله مرة واحدة يبقى اطلع انت وصاحب السيارة على الشهر العقارى وخليه يعملك عقد بالبيع وطبعا خد رخصة العربية ومتنساش يكون اسم المالك اللى فى الرخصة هو اللى موجود فى عقد البيع وبعدين اطلع على المرور واطلب نقل الرخصة باسمك بالعقد اللى معاك
ومتنساش تخلى المالك يجيبلك شهادة المخالفات وبراءة الزمة قبل ما تدفع فلوسك

رد: الحمد لله أخيرا 405
 

ربنا يباركلك فيها ويكفيك شرها
غير الزيوت واهمهم زيت الفتيس عن تجربة

رد: الحمد لله أخيرا 405
 

اولا مبروك علي العربيه وربنا يباركلك فيها
ثانيا اعمل صيانه كامله للعربيه يعني غير بوجيهات و سيور و فلاتر و زيوت و اكشف علي بلي العجل و العفشه
و موضوع نوع الزيت مش هتفرق اسو من موبيل المهم التغيير في الميعاد
و مبروك مره تانيه