مساعدة عاجلة بخصوص بيجو 307
 

السلام عليكم ورحمة الله
معروض عليا بيجو 307 موديل 2008 (غالبًا الـ xt) كاملة مانيوال بسعر 100 ألف .. فهل السعر ده كويس ولا مبالغ فيه ؟ وكام تساوي فعلاً لو حالتها كويسة ؟
وأخيرًا إيه أقرب وأفضل مراكز خدمة وكشف أعطال بالكمبيوتر ليها قريب من جسر السويس ؟

أرجو الرد جزاكم الله كل خير

رد: مساعدة عاجلة بخصوص بيجو 307
 

غاليه جدا جدا جدا ومانيوال كمان........!
ده SW اوتوماتيك 2008 بحوالى 95 الف وحاله ممتازه ويمكن اقل
تابع الاسعار على كونتاكت هتلاقى اقل
وبالنسبه للكشف على السياره عليك وعلى التوكيل جنب ملاهى السندباد
تكشف عليها كويس وربنا يوفقك

رد: مساعدة عاجلة بخصوص بيجو 307
 

ربنا يكرمك يا أيمن على سرعة الرد
أنا فعلاً حسيت انها غالية لما شفت في كونتاكت كارز واحدة خليجي اوتوماتيك وفتحة سقف وبـ 93 ألف
يعني دي لو خلصت 90 مثلاً تبقى كويسة ولا غالية برده ؟ أو بمعنى آخر اللي زي دي بتعمل كام دلوقتي في السوق لو حالتها كويسة ؟
وغير التوكيل اللي جنب السندباد ، فيه مراكز خدمة تانية موثوق فيها قريبة - مش شرط تبع التوكيل - بيفهموا فيها ؟ أو حتى كهربائي وميكانيكي محترمين بيشتغلوا فيها ؟

رد: مساعدة عاجلة بخصوص بيجو 307
 

يستحسن فى حالة فحصك للسياره بغرض الشراء تفحصها عند الوكيل ولو اغلى شويه
لأنه بيبقى فحص مضمون وصادق الى حد كبير جدا.
اما من حيث السياره محور الحديث فهى غاليه جدا واعتقد انها لو حالتها كويسه وانت لم تذكر قطعت كم كيلومتر؟ فهى لا تتعدى بأى شكل من الاشكال ال 80 الف جنيه وخاصة انها مانيوال والمانيوال فى هذا الطراز نادر جدا .
وعموما عندك فى الحرفيين متخصصين فى البيجو مثل:
احمد ندا
امجد بتاع الستروين والبيجو
احمد العسكرى
وكلهم عندهم اجهزة كشف اعطال

رد: مساعدة عاجلة بخصوص بيجو 307
 

ربنا يجزيك خير يا أيمن تعبتك معايا
هو طبعًا أكيد هكشف عليها عند الوكيل إن شاء الله لو فيه نصيب وهاخدها
بس أنا كنت بسأل عشان لو خدتها أشوف لو حبيت أصلح فيها حاجة فيه حد قريب ولا لأ ، وفعلاً الحرفيين قريبة مني وكنت ناسيها !
بالنسبة للعداد فهيا عاملة تقريبًا 45 ألف زي ما صاحبها كاتب
وكويس انك نبهتني لسعرها الحقيقي عشان متخمش فيها
شكرًا مرة تانية أيمن

رد: مساعدة عاجلة بخصوص بيجو 307
 

اعتقد العربيه نادره جدا
ولو العربيه خلصت في حدود 85 و ال90 الف تبقي كويسه
لانها مانيوال يعني ما فيش تغير زيت فتيس اوتوماتيك ب 800 جنيه كل 60 الف

رد: مساعدة عاجلة بخصوص بيجو 307
 

شكرًا أستاذ محمود على ردك
لكن يا ترى تقصد بقولك "العربيه نادره جدا" انها كويسة يعني ولا العكس ؟؟
أنا في رأيي إن ندرة العربية دي شيء مش كويس لأن سعر إعادة البيع غالبًا بيبقى وحش غير التعب في إيجاد قطع غيارها وإيجاد مراكز بتفهم في تصليحها غير التوكيل اللي أسعاره نار طبعًا

وفعلاً مشكلة تغيير زيت الاوتوماتيك منها دي مشكلة كبيرة ! غير إني قرأت كتير عن مشاكل في الفتيس الأوتوماتيك بتاعها أصلاً