مصر موتورز مجتمع السيارات - الغيار الاول بيعلق

اقتباس:

المشاركة الأصلية كتبت بواسطة abdo4422 (المشاركة 145506)

عندي عربية فيات 131 جايبها جديد
والغيار الاول بيعلق ساعات كتير واحاول انقل وكأني مش دايس دبرياج ويطلع عيني لما يجيب الاول
وساعات كمان احس ان الفتيس بيطنطط وانا ماشي علي الاول
ممكن تفسير
لان في ناس قالتلي زيت الفتيس عايز يتزود وناس قالتلي الدبرياج واطي خلي الميكانيكي يعليه
ممكن الافادة من اهل الخبرة

موضوع النقلة الاولي ده ممكن يكون لعيب داخل افتيس ( ممكن غويشة و حشة او ترس وحش ) اما عن التنطيط و انت ماشي علي الاول فبرجاء التحديد

هل هو اثناء الطلعة و انت لسه بتشيل رجلة من علي الدبرياج ؟؟؟ إذاكان كذلك ممكن يكون العيب اما في دسك الدبرياج و خاصة في الريش بتاعته و اما في الاسطوانة نفسها (تكون مملية قبل كده و فيها عالي وواطي أو برشام عالي او سوست الاسطوانة نفسها وحشه) و في كلتا الحالتين يجب تغيير طقم الدبرياج ( اسطوانة و دسك و بلية)

اذا كان ذلك التنطيط مستمر حتي بعد ما بتشيل رجلك من علي الدبياج خالص و انت لا زلت بتدوس بنزين ( سرعة 20 كم مثلا) يبقي ترس الاول فيه عالي وواطي و ده نادرا ما يحدث الا اذا كان مكسور و ملحوم قبل كده ( يعني الفتيس مفكوك قبل كده و ملعوب فيه) و ساعتها انسي انك تحاول تصلحة لانه هيكون ملعوب فيه البخت و ممكن جدا تصرف عليه و تلاقيه بعد كده ظهرله عيب ثاني ،،، هات واحد استيراد 6 غيار احسن و ريح دماغك

مشكلة ال131 و الكثير من الموديلات القديمة أنه انتشر مؤخرا بعد فتح الاحلال للاجراة ( احلال سيارة جديدة بدلا من القديمة ) أنه انتشر في الاسواق مئات السيارات اللي بتكون كانت اصلا تاكسي و شقيانة و طلعان تيت اللي جابوها و بعدين اترخصت ملاكي و اتعمل لها وش بويه من بره و تتباع للناس بسعر رخيص و ياويله يا سواد ليله اللي يتدبس في واحدة منها

و اضح كده ان عربيتك تعبانه ميكانيكيا وده طبعا مش معناه انها كانت تاكسي ،،، و لكنني انصحك ان تكشف علي السيارة في المرور و معرفة لو كانت اصلها تاكسي أم لا و اذا لا قدر الله تبين انها كانت تاكسي يبقي امامك اختيارين :-
1- إما أن تستثمر فيها صح و تنكتها نكتة 100% ( طبعا تعمل اللي تكون محتجاه فعلا ) بمعني انك لو لقيت حاجة معينة متعدلة ترجعها لاصلها لو حاجة بكفائة 50 - 60% ترميها احسن و تجيب جديد و تبص علي ضفيرة الكهرباء و الشاسيه و خلافه و تعمل كل حاجة فيها مرة واحدة علشان تعيش معاها سنوات و انت مرتاح و مبسوط
2- بيعها ،،، علشان الله اعلم هتعمل معاك ايه و هتفضل في دوامة ، تصلح دي حاجة ثانية تبوظ و تعمل دي تلاقي دي باظت و حدوته و مضيعة وقت و مصنعيات طائلة و انت ادري بنظامك هل سوف تتسع ميزانيتك للصرف عليها ام لا

معلش احتمال كلامي يزعلك بس انا مش عاوز حاجة الا ان انقل لك وللزملاء خبرة اكتسبتها بعد ان سددت فاتورتها بالكامل ،،، يعيش المعلم و بيتعلم

أنا تعرضت لموقف مشابه واتدبست في عربية سويفت كانت حمراء و دوكو جديد و كسوة جلد تعطي ايحاء بان الصالون مش بطال و سعرها كان مغري و بعد لما اشتريتها فوجئت من الملف انها كانت اجرة ،،،، و كان قراري ساعتها انني جبتها علي الصاج و فوجئت بمهازل كبيرة اشي لحامات و متداريه تحت فبر الصالون و اشي معجون و الضفيرة ملعوب فيها البخت و العفشة متعدلة لفيات علشان يركب تيل فيات وكبالن 128 و حاجات اخر مسخرة و اخذت الموضوع تحدي مع نفسي و عملت فيها كل شئ (ضفيرة و غيرت وش السلندر و عملت شنبر و عفشة و فرامل و كاوتشو ريداتير ) و اتكلفت ايامها حوالي 8000 - 9000 ج بس بصراحة قعدت اجني ثمارها 3 سنين لحد ما بعتها من غير ما احط ايدي في جيبي ثاني

و اهي تجربة و عدت و الواحد اتعلم منها كثير ،،، و بعدين بقيت اشوف بقه العربيات دي ( الاحلال) و هي معروضة للبيع علي حالتها ( وهي ما زالت بالدهان ابيض و اسود و بدون نمر و معها خطاب من المرور يفيد بعد الممانعة في ترخيصها كملاكي ) و باسعار لا توصف و لا تقارن بالملاكي البيتي ( 131 و 132 بستة و سبعة و بالكثير ثمانية ده لو فيها الرمق شويه ، سيتروين ايه اكس بخمسة و ستة و سويفتات من أول 10 و لو كويسه شوية و طقم جنط لا تزيد عن 15 و بيجو 504 ب 13 و 14 و ناهيك عن الـ 128 العادة و المعدل و الـ 128 زازستافا بـ 5 و 6 و 7 و الرينو 12 و الياباني القديم و لك أن تتخيل من اول 1100 و بيجو 404 موديلات الستينات الي موديلات التسعينات و طبعا فيه تجار همه اللي بيشتروا العربيات دي و يدوها وش بوية من برة و تترخص ملاكي وتتباع علي انها بيتي و الناس بتشتري