رجاءا من خبراء جولف 5 عام 2006
 

السلام عليكم
انا بفكر اشتري جولف 2006
ارجو اللي عنده معلومه عنها وعن قطع غيارها وعن سعرها
فيه واحده قدامي ب 105
ولونها ابيض عاملة 120 الف كيلو
وايه اقرب توكيل للمنصورة
وهل ليها قطع غيار في المنصورة ؟ ومين بيشتغل فيهم استيراد
لان انا بالنسبة ليا الاستيراد افضل من التوكيل 100 مره في كل حاجه لاني بختار القطعه برحتي
وبختار سعرها معاها
لكن التوكيل ده بيختار السعر بس ههههههه
مستني ردودكم وارجو اللي عنده معلومه ولو هايفه يقولي عليها
لانها عربيه مش منتشره خالص في المنصورة ولا في اي حته غير كايرو واليكس
حتي بورسعيد لا
وبرده لو فيه اماكن ليها في كايرو او بورسعيد او اليكس
ياريت تبلغوني بيها
شكرا

رد: رجاءا من خبراء جولف 5 عام 2006
 

السعر غالى والعداد كتير
مواصفاتها اه ؟ وصياناتها معمولة فين ؟

متوسط سعرها 90 الف - 100

رد: رجاءا من خبراء جولف 5 عام 2006
 

توكيلها غالى جدا وقطع غيارها غالية ومعمرة
كباس تكييفها مش حلو
اللى قدامك مواصفاتها اه ؟؟
لو خليجى عداد قليل ومش متهانة ممكن تدفع 100 بس تكون اوتوماتيك والفتيس العادى مش دى اس جي
الاوتومتيك العادى والموتور العادى مش التى اس أى لأنه مش اى حد بيصلحه

رد: رجاءا من خبراء جولف 5 عام 2006
 

شوف انا معرفش عنها حاجه خالص لسا مشوفتهاش ومقعدتش مع صاحبها
وعشان كده قولت اسال الاول النظام ايه ...
اولا موضوع قطع الغيار غاليه جدا جدا جدا دي معروفه زيها زي الفورد الفوكس والفولكس والاسكودا
كل الالمان كده عادي

مشكلتي بقي عايز افهم يعن ايه ماتور عادي ومش تي اس اي دي لان انا مش فاهم حاجه
ولو نزل منها مانوال يبقي افضل ليا لاني مش بحب الاوتوماتيك ..

وكمان مستر هشام فيه نقطه مهمه جدا العربيه دي كفاءتها حلوة ؟.... ولا لا ؟
وصحيح انا اقصد العربيه دي لان فيه شكلين باين لمودل 2006
انا اقصد الشكل ده
http://images02.olx.co.za/ui/8/41/48...-sale-Cars.jpg

رد: رجاءا من خبراء جولف 5 عام 2006
 

شوف لو انت عندك نية فعلا تمتلك جولف 5 هقولك تعمل ايه و تكشف عليها ازاى

بص الفرق بين الموتور الفولكس العادى و الفولكس تي اس اى الاخير تربو و عليه الاير ماس مصنوع بالنانو تكنولوجى فده مش هتلاقيه عند اى حد سبقلى وضحت ان ده من اسرار تصنيع العربية دية حساسية الاير ماس ده بالذات

فتيس الدى اس جى من افضل الفتايس اللى اتصنعت من فولكس و سهل برمجة للأستخدام الرياضى

العربية عافشتها قوية لكن اجزاءها غالية جدا فلو كنت من الناس اللى بيحبو ينطو على المطبات فنصيحة بلاش لكن لو بتحب السفر و الطرق الفاضية و بتكره الزحمه و اشارة روكسى وجسر السويس هتعيش مبسوط مع العربية

نظام التبريد بتاع العربية فاشل فى مصر راديتير و تكييف و نصيحة تعدلها براديتير اكبر حتى لو مش هتهتم بالتكييف

الايرو دينامك بتاع العربية عالى جدا و سهل تطوير هيكلها و وزنها خفيف

بصراحة ال 100 الف كيلو رقم مرعب و هتلاقى فى عيوب منتظراك فبلاش منها لأن اللى فاكر نفسك هتوفره دلوقت هتصرفه بعد كده الا لو انت رحت منزل فى تمنها و عملت صيانة ال 100 الف و غيرت طاقم كبالن و خراطيم و كوعة ميه و فلاتر و علبة بيئة و زيت فتيس و ماستر فرامل و شوفت الموتور على الكمبيوتر محتاج ايه و ادتهوله و غيرت قواعده و زيوت فتيس و خدمت الاسكاترة و طرمبة البنزين ساعتها تبقى عربية جديدة و تستحق انك تركبها و طبعا طاقم كاوتش و سيرفيس اس تى بى و بوجيهات و موبينة و تنضيف مارش

رد: رجاءا من خبراء جولف 5 عام 2006
 

كل العربيات اللي ماشيه في السوق عامله فوق ال100 الف من بدري جدا
يعني اقصد انها كلها 100 الف ماشيه 120 الف كده
واللي ممشتش اصحابها بيطلبو فيها مبالغ عاليه ومبالغ فيها ومش بتتباع
لان سوق الجولف تقيل حبتين
وبالنسبة للرصه اللي انت رصيتها دي بقي اللي هو هغير فيها كل حاجه دي هتعملها كام
يعني اجيبها بكام واصرف عليها كام عشان تقعد معايا 4 او 5 سنين
انا سواقتي علي الطرق المفتوحه 120 والطرق المتوسطه 90 مبزودش ابدا عن كده
مهما كانت العربيه اللي سايقها
لاني مش بحب الجري اوووي
والمطبات كده كده اكيد بناخدها تاتا تاتا عشان اي عربيه عفشتها زباته
قولي اجيبها في حدود كام وماشية قد ايه موديل 2006 تحديدا اي لون
وهل فيها مانوال ولا لا لاني شايف كله اوتوماتيك وانا مش بحب الاوتو اصلا
فقولي كده ببساطه الحاجات دي عشان متوهكش
1- العربيه تتجاب بكام
2- الكشف عليها في التوكيل هيتكلف كام وتغيير الحاجات اللي انت قولت عليها ميزانيته اد ايه؟
3- التوكيل اصلا النظيف ليها فين ؟؟؟
4- الموتور اختار ايه بالظبط الانسب فيه واللي ميكونش مشكلة خالص ليا قدام

رد: رجاءا من خبراء جولف 5 عام 2006
 

هتجيبها من 80 - 95 اخرك

هتصرف 10 عليها

توكيلها فى العبور اصاد الجولف ستى والستى مول ده اريحلك

TSI بس تحترمه
نمط القيادة يرجعلك اوتو او مانيوال

اعمل حسابك ان الميكانيكى اللى هتاخده يشكفلك عليها قبل ما تاخدها و التوكيل و الغسيل بتاعها و شوية الاوراق و طباعة نسخة من الكتالوج هترميلك 800 ج و نصيحة متفتوش الحصول على كتالوج العربية من صاحبها او تحمله و تطبعه اعتبره من تكاليفها لأنه حاجه مهمة جدا بالذات مع الفولكس عموما