أريد تقييم سوزوكى سويفت .. 94 و 93
 

هذه اول مشاركة لى فى المنتدى ... الجميل دا

بعد رحلة البحث عن سياره مستعمل .. جميع الترشيحات تركزت على سيارتين وهما هيونداى إكسيل وسوزوكى سويفت .. أنا شخصيا مفضل السويفت .. فهل إختيارى هذا صحيح ؟.. وأرجو من كل الأعضاء مالكى السويفت وذوى الخبره فى السويفت يساعدونى فى الموضوع دا .. ؟

- ما هى العيوب فى السويفت ؟
- هل هذه العيوب مؤثره فعلا ام يمكن التعامل معها ؟ ( حيث اننى ليس لى خبره كبيره فى الميكانيكا والصيانه ) .
- ما مدى توافر قطع الغيار .؟
- عدم وجود بور فى السويفت بيأثر قوى على السواقه يعنى بتبقى ثقيله ؟
- التكيف قوى ولا ضعيف وهل بيأثر قوى على السحب مع السرعه العاليه وكذلك داخل المدينه ؟

ملحوظه مهمه جدااا :

أنا أول مره أسوق عربيه يعنى لسه جديد فى السواقه . والمفروض ان اى عربيه ها اجيبها ها أسافر بيها .. فا ايه اخبار السويفت فى الثبات على الطرق السريعه ..

الرجاء لو فيه ترشيحات لأنواع عربيات تانيه فى متوسط 30 الف ياريت تقولوهالى

رد: أريد تقييم سوزوكى سويفت .. 94 و 93
 

أولا ...لاشك أن السوفيت عربية مش وحشة بس لو كانت سليمة أوى هاتريحك ...يعنى لازم تكون بنسبة 90% لى الاقل ... مشاكلها يمكن التعامل معها بسهوله ...الباور يجلعها ثقيله غلي حد ما .... الثبات علي الطريق ضعيف ....التكييف مش زى ما انت فاكر ...يعنى بالنهار مش هاتحس بيه أما بليل اهو يعنى هاتحس بيه شويه ...ويؤثر علي سحب العربية طبعا فيش كلام ...انا بتكلم على السوفيت في التسعينات طبعا .. نصيحتي لك إفرز العربية كويس جدا ولا تتنازل عن جوده 90% علي الاقل ...ربنا يوفقك

رد: أريد تقييم سوزوكى سويفت .. 94 و 93
 

اعترض معك في كام نقطه يا استاذ ياسر
ثبات السويفت معقول مش خفيفه للدرجه انا نفسي كنت بجيب بيها 140 و عادي جدا
و مكنتش بحس بالعربيه و كانت ثابته بفضل التعليق الخلفي المستقل مما يعطي ثباتا كبير
و التعليف الامامي و قوته طبعا لا يرقي لثبات الالماني لكن ثباتها كويس
التكييف برضه كان كويس اوي بالنهار و كان بيخليني متلج و قعدت سنتين ما شحنتوش
هو كان بيأثر علي السحب شويه غير اني كنت بحط بنزين 80
يعني لو كنت بحط 90 مكنتش حسيت بفرق كبير في السحب هيا النقطه الوحيده ان العربيه كانت
بتاكل بنزين كتير لما بشغل التكييف و دي نقطه الواحد ممكن يغفرها لعربيه موديل 93
و بقالها اكتر من 15 سنه ماشيه.


دا موضوع عن السويفت كنت عامله من فتره ممكن يفيد صاحب السؤال
http://www.masrmotors.com/vb/showthread.php?t=3200

رد: أريد تقييم سوزوكى سويفت .. 94 و 93
 

طبعا كلام استاذنا حازم خضر صحيح مية في المية وكمان قطع غيارها متوفرة ورخيصة جدا يعني نفس اسعار الهونداي والعربية ثقيلة وانت واقف لكن مع المشي مش هتحس انها ثقيلة انا مركب جنط 15 ومش حاسس بمشكلة في المشي والتكييف كويس وعلي فكرة دائما الناس مختلفة السوزكي افضل ام الهونداي وانا شايف ان السوزكي افضل يكفي انها ياباني

رد: أريد تقييم سوزوكى سويفت .. 94 و 93
 

هي سياره ثابته علي الطريق اكيد اي سياره بتشغل فيها التكيف بياثر علي سحب العربيه وعدم وجود باور موضوع مش مهم اوي لان اصلا الدركسيون بتعها معقول جدا قطع غيرها متوافره وةرخيصه ولو عايز تشتري رسلني وانا اجبلك حاجه جامده جدا

رد: أريد تقييم سوزوكى سويفت .. 94 و 93
 

العربية زي الفل معي من زمان وثابتة علي الطريق انا ناوي ابيع انشاء اللة الشهر الجاي بس مش هقل عن الثلاثينات

رد: أريد تقييم سوزوكى سويفت .. 94 و 93
 

السلام عليكم ورحمه الله وبركاته ،،،،،،
اخى الكريم ، انا معى سويفت 93 وبسم الله ما شاء الله الثبات قوى بدرجه عاليه طبعا مش لدرجه السيارات الحديثة او الالمانية بس انا اطمنك ان ثباتها قوى وانا سافرت بيها مرسى مطروح 4 مرات و انا فاكر كويس انى مشيت بيها على سرعة 160 لمده اكثر من ساعه ونصف متواصله _بدون تشغيل التكييف _
بالنسبة لقطع الغيار هى فى منها بيبقى زياده شويه بس فى المتوسط معقوله والسبب اى صنايعى هيقولك -انا بشتغل ف يبانى يا باشا -
بالنسبة للتكيف هو كويس ميخلكش حران لكن مش لدرجه التتليج ويمكن عشان انا عندى مشكله فى تلاجه التكييف عندى فى سدد من التراب فمقدرش احزملك فى النقطه دى
لو انت من هواه تظبيط السيارة موتورها يستحمل الديفيل بمنتهى السهوله من غير ميقولك عايز عامره او تغير شنابر
عيب السويفت انها منخفضه بدرجه مبالغ فيها على الطريق يعنى لو انت مركب 3 ورا اوزنهم عاليه بالبلدى كده هتشتغل حك فى المطباط الله ينور
العيب التانى انها بتحتاج تغير كبالن كتير يعنى متوسط الفترة مبين كوبلن واخوه من 9 شهور لسنه _ طبعا ده فمصر بس _ لان الحفر و و و و و و طبعا مش هكملك
العيب التالت اكصدامتها يعنى الاكصدام الامامى او الخلفى كل واحد فيهم عباره عن جزئين منفصلين عن بعض وطبعا اى خبطه فيهم بتلاقيها تقوم فتحه بقها علطول واى صنيعى يقول بالفاظهم - مبتستحملش بوسه ( خبطه او تريحه ) - ، المشكله دى انا عالجتها بانى اشتريت اكصدامات رياضيه تنفع للسويفت - موجوده فى التوفقية -
طبعا لو ركبتلها جناح بلاستيك وكربنته مش هقولك على شكلها ويفضل الجناح العالى
جنوط اسبور المانى سعرها 1600 جنيه وده لانها بتنور اول مالعجل يتحرك من على الارض
فوانيس كليسر موديل تمانينات بيتعدل ويركبلها
تجيب هوايه مقاس كبير وتحطها ع الكبوت بين بخاخات المياه بتاعت الزجاج من مول السعد فى التوفقيه ب 50 جنيه وتروح تثبتها بمسامير شك من عند السمكرى ب 15 جنية
تجيب سنسورز مسافات خلفية و تخلى اللى هيركبهالك يخلع قلب عداده ويحطلك شاشه الارقام بتاعته جنب علامه فرامل اليد فى عداد عربيتك
ستاره ضوئيه اسفل باطن السياره و مساعدين اسبور ب 1200
مرايات كهربا وطقم مكن كهربا وطقم مخادع كلهم ب 1500 جنيه
كل الحاجات اللى فاتت ب 5700 جنيه والسياره تمنها اول كلمه من تاجر سوق السيارات - هاخدها على 37 الف
اعمل اللى قلتلك عليه ولو عديت جنبك عربيه بى ام بجلاله قدرها الناس هتعجب بعربيتك انت
طبعا الصالون ده زوقك انت وياسلام لو جلد طبيعى عليه فرش امريكى
اتمنى انى اكون وصلتلك اللى انت عاوز تعرفه بس بجد دى سيارة تحفه لو كانت كفاءتها على الاقل 90 % اقل من كده متجبهاش وحرام تصرف عليها قرش واحد بمعنى ادق لو مش هتقدر تسافر مرسى مطروح وترجع سليمه يبقى دور على غيرها
اخر حاجه يفضل موديل 93 عن 94 وده لان كل مصر متاكده انه موديل يبانى 100% يعنى جاى شحن اما 94 فى يقولك متجمع فمصر واللى يقولك لا جايه شحن فانت خليك بعيد عن كده
والسلام عليكم ورحمه الله وبركاته