|
للنقاش:تصاميم تويوتا
انا كنت عايز اعرف راي الاعضاء في الموضوع ده. هل اعتمادية و كفائة سيارات تيوتا ممكن تغني عن التصاميم بتعتها. عندكو مثلا الكرولا, اللاند كروزر, ال ف جي و حتي اللكزس ال ار اكس الجديدة الكل اجمع ان الاشكال القديمة احسن من الجديدة. باين ان جمي كلاركسون كان عندو حق لما قال ان تصاميم تيوتا مملة.
مستني رايكم |
رد: للنقاش:تصاميم تيوتا
جيرمي معاه حق ،، و ده اللي انا بقوله من زمان كل عشاق تويوتا مش في مصر بس علي مستوي العالم معندهمشي غير لبانتين في بقهم الاعتمادية و اسم تويوتا ( اعادة البيع ) كأن اللي هيشتري اي عربية من ماركة تانية هيشتري معها عفريته زرقا و عدة ميكانيكا لكن فيه ناس كتيرر جدا علي مستوي العالم ،، بقوا يهاجموا تويوتا ،، و شكرا علي فكرة النقاس الهايلة دي لانها مبقتشي منافسه سواء علي مستوي السعر او الجاذبية |
رد: للنقاش:تصاميم تيوتا
انا عمري ما حبيت شكل الكورولا ...
وحتى الكامري اللي شكلها كورولا كبيره شويه ... الافنسيس .... الياريس اول ما نزلت كان شكلها فضائي ( على رأي الوكيل ) وبعد شويه حسيت ان شكلها ارنوب ( يارب حازم خضر ميشوفش الموضوع ده ) بالعكس .. دايما بحس ان الكورولا القديمه في وقتها احلا من الجديده في وقتها ( مقارنه بباقي العربيات) يعني من سيئ لأسواء لكن مننكرش ان في ناس بتموت في حاجه اسمها تويوتا واعرف ناس تنزل من تويوتا علشان تركب موديل جديد من تويوتا ربنا يوفقهم ptmnlo123per172 |
رد: للنقاش:تصاميم تيوتا
بصراحه انا مختلف معاكوم عن تجربه صحيح موديلات تويوتا الجديده ممله والقديم افضل لكن بجد تويوتا كاستخدام اثبتت وجودها فعلا وانا مع الموديلات القديمه وخصوصا الكورولا يعنى قبل 2000 وخصوصا من 1993 لحد 2000 موديلات جميله وثابته وبتعجبنى شخصيا دا رأيى وشكرا عى النقاش
|
رد: للنقاش:تصاميم تيوتا
اقتباس:
براحتك يا باشا قول اللي تقوله انا عن نفسي لما بشوف الياريس من قدام بحس اني واقف قدام واحد احول هههههههههه و لما بشوف ياريس بيضه في المرايه بحس ان واحد اهبل مطلع لسانه و جاي يجري ورايا بس بلا شك الياريس احلي تصميم تويوتا عملته علي الاطلاق هو و الكورولا ال 93(افضل كورولا حتي الان) اللي عاجبني في الكورولا ال93 انها شبه الزلموكه ;) خلفيه قريبه منها و الواجهه الاماميه برضه و تابلوه مايل شويه زي البي ام بس بنكهه يابانيه بايخه ما علينا بس اهو مايل شويه و خلاص و صالونها ممتع فعلا انما معظم التصميمات سواء لكزس او تويوتا مقتبسه و من الامريكي عموما مش حنني لكزس جي اي 300 موديل تسعينات اللي هيا المرسيدس عيون بالضبط و لا الكورولا ال 98 اللي واخده فوانيس النيون و الهاتش باك واخد فانوس الفيات برافو القديمه و الليفت باك واخد ضهر البونتو بفوانيسه المميزه المثبته في القائم. يدوب حاليا لسه بيحاولوا يعملوا شكل لنفسهم اينعم فيه شويه اقتباس من اودي بس مش باينه اوي اما من ناحسه الاعتماديه ما اقدرش انكر انها فعلا بتستحمل و مش بتعطل بس انا ماشي 23 الف كيلو حاليا لسه ما شوفتش حاجه منها و اي عربيه من ماركه اخري العمر دا ما يسمحلهاش انها تعمل دقات نقص عارف اللي حبيته في الياريس او التويوتا عموما ايه؟؟ الدقه في التقفيل و بس لا تلاقي كبود مفارق و لا باب بيرزع و لا بويه بتطقطق فعلا الكواليتي كنترول عندهم صارم فعلا و يمكن دا اللي مخلي عربياتهم بتعيش فتره طويله بدون صيانات كتير |
رد: للنقاش:تصاميم تويوتا
انا كان قلبي حاسس ...
قلت اكيد حازم باشا حيلقط الموضوع بس الحمد لله ان رأيك طلع كده ... فعلا الياريس من احلا تصميمات تويوتا ... على الاقل في محموعه عربياتها اللي موجوده عندنا واول ما طلعت كانت صورتها في الجرنال تهبل ... فاكرها كويس اوي و اللون الفضي كأنها عربيه فضائيه فعلا.. لكن على الطبيعه فعلا وشها ارنوب خالص ... التصميم حلو ... لكن النسب هربت منهم شويه .. كانو يقدرو يظبطوه اكتر من كده و كانت تبقى تحفه لكن هي دي تويوتا ... شكل العربيه النهائي حاجه ثانويه ... المهم الشكل يتباع و خلاص !!!!! صور حلوه لكن على الطبيعه تظهر العيوب خصوصا بروز الشبكه عن الفوانيس ( بوز الارنب ) و رجوع الفانوس لورا اوي لحد الباب ... هي مع واحد صاحبي وسوقتها .... ما شاء الله ناااااعمه و وعمليه و اقتصاديه و قعدتها تحفه ... تابلوه بسيط وجميل لكن لدرجه اني بحس ان قدامي جاون ... كل ما اقعد جنب صاحبي احس اني حشيل الطاره من قدامه اركبها قدامي و اسوق انا ..... ههههه انا كنت حشتريها على فكره لحسن تفتكر بتريق عليها ... لكن كانت الاوتوماتيك فول اوبشن ساعتها ب 100 الف و الماتريكس ب 84 الف ..... يعني اسباب اقتصاديه مش اكتر ... وبرغم فرق الهورس باور و كدب التوكيل عن قوتها الحقيقيه .... لكن الياباني ياباني ... بس بصراحه لما قعدت جواها وانا بدور على عربيه ساعه الشرا ... كنت مستريح فيها جدا ويمكن دي اكتر حاجه بتشد الناس للياباني .... عربيه عمليه جدا و ناعمه جدا .. مريحه ... جوده و اعتماديه ... وكفاءه تضنيع ... و انتشار فعلا احسن ناس تصنع عربيات هما اليابانينن .... و الا مكنتش تويوتا تبقى نمره واحد على العالم في المبيعات اكتر كورولا عجبتي الجيل السابع اللي كانت في منتصف التسعينات و اسواء كورولا الجيل اللي بعدها على طول ... الفانوس المدور .... بشعه ... مفيهاش اي جمال ... مستفزه معرفش كانو بيفكرو في ايه لما صمموها ... الظاهر كانو بيفكرو في الجيل اللي بعدها ... ومفيش جيل له علاقه باللي قبله .. يمكن السابع واخد من السادس .. والباقي كله على هواه ... تصميم جديد و مفيش اي خطوط تربط الجديد بالقديم هي دي تويوتا بالرغم ان جيمي كلاركسون بيهاجم دايما الياباني ... وواضح ميوله الاوروبيه الا ان وصفه لتصميمات تويوتا بالملل عنده حق فيه لكن عربيه ممله و تريحين احسن 100 مره من عربيه حلوه تطلع عيني |
| الساعة الآن 02:35 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017