اسكن في مدينة نصر التي كانت يوماً ما محترمه
ودلوقت بصراحه لمت شامي على مغربي وبقت لبن سمك تمر هندي
المهم
انا في حي سكني تماماً ، ورغم ذلك أجد صعوبه رهيبه في ركن سيارتي كل يوم وانا راجع من عملي ، بل حتي لو خرجت في مشوار صغير ، برجع الاقي مكاني متاخد ، وطبعا عبثاً كل مره احط ورقه عليها (من فضلك المكان خاص بسكان العماره) ولا الدموع
حاجه بجد تحرق الدم ، انا شكلي ح انسي اني دكتور وح ابتدي امارس سلطاتي بدراعي ، واللي ح يركن مكاني بعد كده ح افسيله الأربع عجلات

اخر المواقف الكوميديه
النهارده راجع بإبني من التطعيم (4شهور) ، وعايز اركن قصاد البيت ، لقيت واحد تبت راكن مكاني وقاعد في العربيه يستمتع بالشجر اللي انا زارعه !!!
فقلتله بمنتهي الذوق " بعد اذنك عايز اركن "
نزلي من العربيه واداني محاضره سخيفه زي وشه العكر عن حقوقه كمواطن بيدفع الضريبه في إنه يركن في الشارع ، وان انا مشتريتش الشارع اللي قصاد بيتي الخ الخ الخ
كان ناقص يحملني مسئولية صفر المونديل ، وفي الآخر تدخل احد العابرين للشارع ، وانتهي الموقف بإن الراجل طلع وسابلي مكاني اركن
وبصراحه لولا ان الواحد بيخاف ربنا ، كنت دخلت ابني البيت ونزل رنيت امه حتة علقه ، وكسرتله عربيته اللي فرحان بيها وبإنه بيدفع ضريبتها
بس انا اكتفيت بإني مشيت اللي في دماغي

السؤال
ليه مفيش قانون للمناطق السكنيه ، اسمه حق الجار ، ولا حق البني ادم ، يعني ايه المعني في ان القانون ميدينش الحق اني اركن قصاد بيتي ، امال اركن فين ؟ قصاد بيت وزير الداخليه ؟
يرضى وزير الداخليه اركن مكانه ؟؟؟ ولا أي حد من اعضاء مجلس الشعب ؟؟

يا ريت حد يقوللي الواحد مفروض يعمل ايه
لأن انا مره جبت النجده الساعه 3 الفجر لواحد راكن مكاني ، والظابط اقسملي انه ميقدرش يعمل له حاجه ، واقصي حاجه انه ح يعمله مخالفه ركن فوق الرصيف !!!!

افيدوني افادكم الله