المشاركة الأصلية كتبت بواسطة dr_legend (المشاركة 283022)

موقف كده حصلى بس مش بعربية

واحد صاحبى بس كبير عنى ييجى 14 سنة كده كان عنده موتوسيكل وخدنى معاه مشوار فالمهم واحنا راجعين قالى تعالى سوق شوية على ما اشرب سيجارة قلتله ماشى

المهم قالى بالراحة كده فانا اول ما طلعت جبت 80 وزودت جامد اوى لدرجة اكلت مطب على سرعة 100 بس ولا فى دماغى فهو طول الطريق مكلمنيش بس لما نزلت ووقفت الموتوسيكل

قالى ياجدع دا انت اوسخ من الحاج شعبان على الطلاق لابيع الماكينة

وفعلا باعها ولحد دلوقتى مش بيرضى يركب معايا اى حاجة حتى العجلة مش بيرضى يركبها معايا

المشاركة الأصلية كتبت بواسطة Eng . Mano (المشاركة 283233)

جميل اوى الموضوع ده يا استاذ باسم ، بس انا اطرف حاجة حصلت معايا مش اول ما اتعلمت السواقة ، بالعكس انا كان بقالى حوالى 9 سنين باسوق .
من حوالى 5 سنين كده واحد صاحبى كان لسة جايب عربيته الجديدة دايو لانوس ، و دى كانت اول مرة حد اعرفه يجيب العربية دى .
المهم فى يوم احتجتها منه و طبعا بحكم الصداقة القوية سابلى العربية اخلص بيها مشوارى ،
الحمد لله اخدت العربية و رحت مشوارى ، المهم كنت رايح مقر شركة فى شارع فى هليوبوليس و طبعا اكيد عارفين الشوارع الجانبية هناك ضيقة ازاى . فدخلت الشارع اللى فيه مقر الشركة دى و طبعا كانت اوى مرة ليا اروح هناك فالعنوان مش عارفه اوى ، المهم عديت العمارة اللى فيها المقر بحوالى 100 متر او 150 . فقولت ارجع الحتة دى مش حيجرى حاجة ، طبعا انا جبت المارشدير و بارجع لقيت العربية بتطلع لقدام ، الموضوع ده عملته مرة و 2 و 3 و العربية راسها و الف سيف ماترجع ، لغاية مابصيت على رسمة النقلات اللى على عصاية الفتيس لقيت المرشدير لقدام ، فجبت الفتيس لقدام العربية مصممة برده تتطلع لقدام ، المهم قعدت حوالى تلت ساعة اجرب مانفعش خالص ( للعلم كانت اول مرة فى حياتى اسوق لانوس ) . حاتقولولى طيب ماتطلع قدام و لف من اى لفة ، بس للاسف كان اقرب لفة هى عن طريق ميدان تريومف و ده كان يومها واقف تماما و برده كنت حاجيب مارشدير لما اركن العربية و اطلع بيها تانى .
بعد تفكير عميييييييييق لقيت ان الحل الوحيد هو انى ازق العربية ال 150 متر دول و ارجع بيها تانى للشركة اللى انا رايحلها و اركنها هناك صف تانى ، لان الحتة اللى كنت واقف فيها ماكنش فيها اماكن و كمان انا كنت قلقان على العربية اسيبها فى حتة بعيدة . الحمد لله بعد مازقيت و ركنت العربية ، بعد ماخلصت المصلحة بتاعتى نزلت و سبحان الله ، لقيت واحد بيدور عربيته لانوس برده و ماشى بيها فروحتله جرى و سألته انت ازاى بتجيب مارشيدير ، الراجل مشكور قالى انه سوستة و اجيبه لقدام زى الاول . طبعا انا كنت حاتشل لانه طلع هايف جدا و لانى جربت كل اوضاع الفتيس ماعدا الوضع ده ، و من ساعتها و انا حالف انى ما اسوق العربية دى لانها فعلا بهدلتنى و البيه صاحبى نسى تماما انه يقولى حاجة زى دى . و الحمد لله عدت على خير ..
مرة تانية شكرا استاذ باسم و موضوع فعلا جميل ، و معلش اذا كنت طولت عليك بس دى اطرف حاجة فعلا اتعرضتلها و انا باسوق و الحمد لله ان مافيش حاجة تانية ؛؛