مصر موتورز مجتمع السيارات - ماهى مكونات العفشة بالتفصيل مع توضيح معنى المصطلحات

ايه الفرق بين العفشة العادية والعفشة الرياضية ( الاسبور ) ؟ لقيت اجابه سهلة ولذيذه العفشة الاسبور بتديك ثبات اكتر بس راحه اقل لان المساعدين ناشفه والسوست بتاعتها اقصر وبتخليك تاخد الملفات على سرعة اكبر انما العفشة العادية بتديك راحة اكبر وثبات اقل ... وبعدين قولت ابحث وافحص وامحص .. لقيت معلومتين ع الماشي قلت ندردش فيهم
قالك العفشة الاسبور دي اتعملت علشان عربيات السباق لان التراكات بيبقى فيها ملفات حاده جدا وبيبقى السائق مضطر انه ياخدها على سرعه ... طيب ايه اللي بيحصل للعربية وهيا بتاخد ملف على سرعه ؟ قالك بتبقى العربية عاوزة تتقلب عكس اتجاه الدوران يعني لو ملف ناحية اليمين بتبقى العربية عاوزه تتقلب الناحية الشمال ... ليييه ؟ علشان حاجه اسمها القوة الطارده المركزية ودي بتنشا نتيجة دوران اي جسم له كتلة حوالين مركز معين ... وفي حالة العربية وهيا بتلف الملف بتبقى كأنها بتدور في جزء من دايرة وهمية كبيرة مركزها ممكن تتخيلة لو اتخيلت بنظرك دايرة كبيرة تكمل بيها الملف .... زي الصورة كده
http://ec.europa.eu/transport/road_s...d_image010.gif
المهم : قالك كل ماتبقى العربية تقيله كل ما الطاردة المركزية تزيد بس كل ماتبقى السرعة اكبر كل ما الطارده المركزية تزيد اوي اوي ...طيب القوة دي بتأثر فين في العربية وهيا بتلف ؟ قالك في نقطه اسمها مركز الثقل ... وده نقطه تخيلية برده في مكان قريب من منتصف جسم العربية حسب تصميمها وحسب توزيع الاوزان فيها وغالبا بيكون في العربيات الملاكي مش في النص بالظبط لان تركيز اوزان العربية بيكون قدام بسبب وجود الموتور والفتيس والعفشة الامامية ... واللذيذ بقى ان مركز الثقل ده مش نقطه ثابته يعني لو انت راكب في العربية لوحدك ممكن يكون مركز الثقل ده مثلا نقطه فوق عصاية الفتيس .. كويس ؟ ولو ركب معاك تلاته مليانين شوية في الكرسي اللي ورا هيشدوا معاهم مركز الثقل ورا شوية ... ولو العربية عالية عن الارض هيبقى مركز الثقل ده عالي شوية عن العربيات اللي مش عالية ... المهم ايه علاقة القوة الطاردة المركزية ومركز الثقل والملف اللي على سرعة والكلام ده كله بالعفشة الاسبور ؟
اقولك : دلوقتي عربية بتاخد ملف على سرعة .. الهيكل بتاعها بيميل عكس الملف ... مين بيشده لتحت علشان يمنعه من انه يتقلب ؟ المساعدين ...يبقى نجيب مساعدين استجابتها للفرد او للفتح تقيله علشان تقاوم الفتح لفوق ( اللي عاوز يتخيل يرجع للمشاركة رقم 27 ) علشان كده العفشة الاسبور بتبقى ناشفه لان المساعدين بتبقى ناشفه بتتحرك لفوق ولتحت بمرونه اقل من المساعدين العادية ...
حاجه كمان نخلي ارتفاع العربيات الاسبور عن الارض اقل ما يمكن ونخلي السوست بتاعت المساعدين الاسبور والسوست الخلفية اقصر من سوست العربيات اللي عفشتها عادية علشان نخلي مركز الثقل قريب للارض قدر الامكان تقوم الطاردة المركزية لما تيجي تأثر على العربية هتاثر فيها من نقطه منخفضة .... شوف الصورتين دول كده
http://clackhi.nclack.k12.or.us/phys...%20C./sci1.gif
دي بتبين ان مركز ثقل العربية العالية بيبقى اعلى من العربية المنخفضه وكمان بتدي تخيل ازاي مركز ثقل العربية العالية بيبقى مؤثر عليها لو جسم العربية مال وبيبقى تأثيره اكبر من العربية اللي مش عالية
والصورة دي بتدي فكرة عن مكان مركز الثقل عموما للعربية
http://thecartech.com/Autopedia/how/...s/image001.jpg
فيه مثال صغير يقرب الفكرة بتاعت المساعدين الناشفه والعاديه لو انت بتشد حبل وقصادك واحد فتوة انت هتشد وهوا بيقاوم الشد ... ولو قصادك شاب سيس انت هتشده هييجي معاك علطول ... اهوا ده الفرق بين المساعدين الناشفه والمساعدين العاديه ومقاومتهم للقوة الطارده المركزية
مثال تاني يبين ليه العربيات الواطيه بتبقى اثبت على الطريق من العربيات العالية .. لو قدامك انبوبة بوتجاز جرب تزقها من النص بايدك بقوة معينه هتلاقيها هتتقلب الناحية التانيه ... جرب بقى بنفس القوة تزقها من تحت مش هتتقلب اقصى نتيجه انها هتزحف شوية .. شوفت بقى كل ما نخلي مركز الثقل قريب من الارض تكون العربية اثبت في الملفات وعلى الطريق عموما ...