|
رد: عايز أركن قصاد بيتي
بسم الله الرحمن الرحيم
بشكر كل اللي ساهم بوجهة نظره في الموضوع ، واما الذين خرجوا عن آداب الحوار معي فأنا مسامحهم ، لأن ثقافة الحوار نعمه ، وثقافة الاختلاف نعمه ، واللي صدره فيه متسع للآخرين يبقى أحسن عند الله وسأرد مبدئياً انا كتبت الموضوع وهو سخن ، وانا بعترف اني كنت متضايق جدا من اسلوب الراجل الاستفزازي ، وهو طالع بعربيته فوق الرصيف اللي قصادي بيتي ، ودايما البلاط بيهبط وطبعا محدش من الساده انصار الحقوق الدستوريه هو اللي بيدفع تمن الصيانه دي ، ولا حد بيحاسب البواب اللي بيسقى الشجر اللي حضراتهم بيجوا يركنوا تحته وانا اولع انا وعربيات سكان البيت. ممكن اكون خرجت عن شعوري بعض الشيء ، ولكني لم اخرج عن اللباقة والأدب ، ولم اتطاول على أحد بما فيهم الرجل نفسه اللي كانت المشكله معاه ، وعلى أي حال اللي ايده في الميه مش زي اللي ايده في النار القضيه دلوقت ح تبتدي تتفرع لشقين ان فيه ناس عبرت عن رأيها ، واعتبرت ان شخصي هو اختزال لكل اللي فسوا لهم العجل على مدار السنين الماضيه ، وبدأت تكيل لي الاتهامات وكأني بتكلم عن حقي اني اركن قصاد بيت الأمه وفي ناس عبرت عن رأيها ، وفي نفس الوقت احترمت مساحة الاختلاف ، ودول انا بشكرهم وبقدرهم بجد ، ولا أملك - وان اختلفنا في وجهات النظر - غير اني أحترم تماماً حضراتهم ، ومش معني اني مستخبي ورا كيبورد وشاشه واسم حركي أني انسى اخلاقي وادميتي واحترامي لذاتي أولا وللآخرين. انا مازلت عند وجهة نظري التي لا أطالب احدا بالتعصب لها وهو انه من حقي تماماً ان اركن سيارتي امام منزلي ، لأني لا أسكن في حي تجاري ، ولا يوجد في الحي الذي اسكن فيه مولات تجاريه او مصالح حكوميه او حتي مكاتب !! المنطقه سكنيه تماماً ، واللي مش لاقي مكان قصاد عمارته ميجيش يضايق جيرانه لأن الأماكن اصلا محدوده ، وده الذوق والأدب والأخلاق اللي اعرفهم زي ما اعرف كويس اني لما اكون راكن قصاد بيت حد ، ويطلب مني اصحاب البيت اني افضي المكان عشان هم عايزين يركنوا ، بتحرك من مكاني بمنتهي الذوق ، لأن البيوت لها حمي وحرمه ، والجار له حق ، واحترامي لحق الغير مش معناه اني نكره او ضعيف او متهاون او مفرط في حقوق الدستوريه ، لأن ده معناها اني انسان محترم ، بحترم نفسي كضيف منتظر شخص أو منتظر مصلحه بقضيها ، ولا أضايق اهل المنطقه او العقار ، من باب حتي احترام الجار. وأقول لمن ينادون بأن الشارع ملكيه عامه طيب مدام هو ملكي وملكك يبقى مين اولى بالركن ؟ انا ولا انت ؟؟؟ الضيف ولا صاحب البيت ؟؟ ولا نطبق قاعدة البوز بيز ؟ ونمشي كل واحد فينا يخبط في بوز اللي قصاده ؟ بيرو انت بتقول فيها ، الواحد فعلا ساعات بيحس انه عايز يسلك سلوك عدواني غير عادي يظهر ان الواحد فعلا عنده potential terorrist عايش وكامن جواه !! koshary حل وجيه والله ، بس هي البوابه بتاعتنا غلبانه ، وكبرت في السن ، والله يكون في عونها bambak فعلا ده حل سهل جداً ، لأن واضح ان فيه ناس كتير شايفه ان المكان اللي قصاد بيتي فيه ميزه غير عاديه !!! وبالمناسبه ، جاري محدش بيهوب ناحيته ، لأن اخر حد عمل كده ، كسرله عربيته وبهدلها تماماً ، وسلملي ع القانون والدستور. بالمناسبه اي حد شايف انه يقدر يفرض القانون والدستور ، انصحه يجرب يجي يركن قصاد جاري ، ولا هو أسد علي أنا بس؟ :) samram معاك حق بس يعني هو الرصيف ده لما جم يرصفوه ، انا ظبطت الناس اللي بترصف عشان يوطوه شويه ، عشان اعرف اركن عربيتي انا وجيراني الأفاضل ، فدلوقت احنا بقينا ضيوف عليه ، رغم انه لما بلاطه بيهبط بفعل سيارات الساده الضيوف ، محدش منهم بيفكر حتي يطلع على مهله عشان ميخدش بقية البلاط معاه في السكه !!! oldman وهو انت متخيل ان الدكتور ده مش انسان يعني ؟؟ هو انا عشان دكتور يعني ، يبقى ح انكمش واتمدد زي الحديد مثلا ؟؟ عادي والله ، بشر وبناكل وبنشرب وبنفرح وبنزعل وبنغلط وبنتخانق وكل حاجه وبعدين حضرتك لو كنت مكاني جايز كان رد فعلك يكون اسوأ مني اللي شاف مش زي اللي سمع أبو نورا المشكله ان الناس بتخاف بس ، انما صعب تحاسب على بعضها يعني انا واثق تاما إن محدش من الشجعان اصحاب المبادئ ممكن يخاطر ويركن عربيته قصاد حد مؤذي من اللي فاضي للأقسام والنيابات ، لأنه عارف كويس انه مش ح ياخد معاه حق ولا باطل طب تصدق بالله اكثر من مره ، انزل بالليل عشان في حاله استدعاء ، الاقي احد البهوات المحترمين قافل علي !!! وبضطر اخد عربيه اخويا ولا والدي عشان الحق اطلع ، لأن مفيش وقت اطلب النجده والونش والحركات دي MORE83 انا متفق معاك على مسأله ثقافة الزحام دي فعلا انا بعترف ان الزحام ، والتكدس بيدي احساس ان الواحد عايز ينفجر انا بفكر جدياً في الانتقال للعيش في التجمع الخامس ، او الانتقال كلية خارج قاهرة المعز ، لأن الواحد اتخنق زحمه وحر وقلة انضباط ، وكمان اجي عند بيتي الاقي الناس ماشاء الله عارفه حقوقها قوي !!! طيب وريني حقوقهم دي قصاد بيوت المسئولين ولا بيوت حتي الشرسين اللي بيكسروا الفوانيس ويفسوا العجل !!! ولا حقوق ولا حاجه ، القصه كلها ان كل واحد بيبص لمصلحته فقط لاغير ، ومن بعده الطوفان وانا برضه لا استثني نفسي من هذه الدائره سيف الدين المشكله يا سيدي إن احنا في منطقة كثرت فيها سرقة السيارات ، ده غير انك وارد جدا كل كام اسبوع تنزل تلاقي حد ترك قبلاته على العربيه ، يمكن عربيه الزباله ، يمكن شاب سكران ، الله اعلم فموضوع ركن السياره في اماكن نائيه حفاظا على حقوق الشعب في الركنه قصاد بيتي ، مسأله غير مأمونه العواقب ، هي لو كانت مأمونه كنت اتكلمت اصلا ؟ ما انا كل يوم بركن بعيد عن شغلي مسافه لا تقل بأي حال عن 40 متر ، حفاظا على حقوق الساده الجيران انهم يركنوا تحت بيوتهم ، مش عشان انا انبسط اقرف غيري شريف حضرتك شايف ان الضروره تبيح انك تاخد مكان غيرك وتركن قصاد بيته بس الضروره دي لا تعني انها اصبحت قاعده وع العموم لو دي قناعتك فانت حر فيها تماما ، وارجو انك تمارس حقوقك الدستوريه امام بيوت الساده المسؤولين ، وامام الحراسات ، وشوف كده هل العرف يسمح بكده ولا لأ ويا ريت تقولي هل من حقك تفسيه عجل الناس اللي قافلين عليك ؟؟ وهل ده بيعتبر سلوك غير عدواني ؟؟ ولا سلوك عدواني بيكرس ثقافة الزحام اللي بنعيشها ؟ والصح اللي انا اعرفه اني مركنش قصاد بيوت الناس ، وادور على كراج ، او مكان جنب جنينه مثلا ، انما مضايقش خلق الله بالمناسبه يا ريت بلاش الرد يكون شخصي ، وخلينا نتكلم بشكل عام ، لأن أنا شخصيا مش داخل الموقع ده عشان اتخانق معاك او مع غيرك medo1970 انا بقى بخاف اعمل زيك لأن وارد العربيه تكون لازم تتحرك بسرعه عشان فيه حد مريض او الراجل نازل بمراته وعياله ولايص بيهم بس هو برضه حل moh kelany عمري ما ركنت قصاد عماره الا اشغل الانتظار واحط كارت برقم تليفوني ع الشباك ، ونادرا ما بعمل كده دايما بدور على كراج ، او مكان عام ، بكره الاعتداء على حقوق الغير aif لما تروح مطعم في عماره سكنيه ابقى اركن بعيد عنه شويه ، لأنك كده كده جاي تتفسح ، مجتش ع الخطوتين دول ، مش لازم تفسح سكان العماره كلهم يا سيدي الفاضل انا لا استحي ان اطلب ما تعارف الناس عليه والعرف هو ان الواحد يركن قصاد بيته cupo الموضوع اخد ابعاد كبيره قوي انا مكنتش اعرف ان دي قضيه امن قومي ahmed anwar عشان انت راجل محترم وذوق وانا معاك تماماً ان الزحام بيخلينا احيانا نضطر نركن في اماكن غلط بس نتصرف بشكل محترم زي حضرتك كده ولما حد محترم يطلب مني بشكل محترم اني اترك المكان اللي قصاد بيته عشان هو عايز يركن ، أفضيله مكاني ، مش احسسه اني اشتريت الشارع !!! بالمناسبه الراجل اللي بحكيلكم عنه ده ، قاعد في العربيه !!!! منتظر حد يعني نظام شكل للبيع وعلى اي حال رأيي خطأ يحتمل الصواب ورأي غيري صواب يحتمل الخطأ وتقبلوا تحياتي |
رد: عايز أركن قصاد بيتي
اقتباس:
اولا انا هابتدى من اخر نقطه فى كلامك ...... سامحنى و اعذرنى لو حسيت ان ردى رد شخصى و انا اسف ليك و عموما مافيش خناق وللا كلام من ده و بكرر اعتذارى لك لو كان فيه حاجه ضايقتك من اسلوبى ..... و ارجو منك قبول اعتراضى على رأيك بقلب رحب . ثانيا , الساده المسؤلين دول ليهم وضع خاص من حمايه و امن و بعضهم يكون مستهدف للأغتيالات و التصفيه الجسديه و اعتقد انه لا انا و لا انت و لا اى عضو معانا هنا فى المنتدى مستهدف للدرجه دى و اخرها بنبقى مستهدفين من زوجاتنا او اهالينا هههههه ثالثا , موضوع تفسيه الكاوتش ده بيبقى ليه ظروفه اللى هى انك واقف فى جراجك الخاص و مش عارف تدخل وللا تخرج و فيه يافطه كبيره تسد عين الشمس بتقول ان ده جراج خاص و الجراج الخاص هو امتلاكك لقطعه للركن فيها من حر مالك و مدفوع مقابل هذه القطعه و بالتالى فأن لم يكن عندك جراج سوف تقوم بالركن فى الشارع و سوف تأخذ هذا المكان من الشارع و لكن بأمتلاكى للجراج و قد قمت بشراءه فبالتالى اصبح من حقى قانونا القطعه التى امام الجراج للخروج و الدخول و ذلك بدلا من الركن فى الشارع و قد تم حجز مكانى الذى فى الشارع بالجراج المدفوع حقه ........ و اى عربيه تقف امام الجراج يحق لى ازاحتها من مكانها بأى طريقه ان كانت لأنه واقف فى ملكى الغير مسموح لأحد غيرى بأستغلاله ...... و من وقف امام جراجى فهو من بدأ بالسلوك العدوانى على حرمتى و بيتى و جراجى فلذلك من حقى ان ادافع عن نفسى و عن حقى و حرمتى بأى طريقه ان كانت حتى و لو بالقتل و كذلك ينطبق على مدخل العماره حيث انه للمدخل حرمه و لا يصح ان يمنعك احد من خروجك او دخولك الى بيتك و انما المحاط بالمكان الخاص بك هو ملكيه عامه لجميع الأشخاص سواء من ساكنى العماره او من خارجها او حتى من مدينه اخرى ..... و اؤكد لك انه لو تم زراعه العواميد مثلا فى المكان الذى تريد الركن فيه فسوف تشيلها الأزاله من الحى او البلديه و ده معناه انه قانونا زرعك للعواميد دى غلط و لا يحق لك الأنتفاع بهذا المكان ..... و بكررها تانى مع اسفى الشديد :- انت غلطان |
رد: عايز أركن قصاد بيتي
احنا اكبر مشكله في بلدنا ضياع الحقوق و الواجبات ...
احنا للأسف مش عارفين اللي لينا و اللي علينا .... حتى الاعراف والتقاليد مش قادرين نعرفهم .. و الذوق و المجاملات تااااااهوووو في الزحمه ... يعني مثلا لو انا جيت ركنت في حته واسعه و فاضيه وفيها اماكن كتير .. وجه حد طلب مني اركن في حته تانيه علشان ده بيته ... حسيب له المكان .. لأن في غيره .. و دي حاجه ذوقيه مش لأنه قدام بيته ... لكن لأني شويه و حمشي ... لكن هو ممكن يبيت او تعبان وعايز يطلع يستريح ومش نازل تاني ... لكن لو الدنيا زحمه و لقيت المكان بالعافيه ... عمري ما حسيبلوه المكان ... دا انا ما صدقت ركنت .... الا اذا كان مدخل جراج او محل خصوصا محلات تصليح الكاوتش وخلافه ... لكن علشان سعادته عايز يركن تحت البلكونه فده موضوع تاني ... وبعدين لو عماره كبيره 10 - 15 دور .. من غير جراج ... يبقى الشارع عمره ما حيكفي سكان العماره نفسهم ... يبقى مين يركن و مين لأ ؟؟!!!! وبعدين حضرتك بتقول انك راكن فوق الرصيف ... طب هو ده مكان انتظار اساسا ؟؟!!!!! بصراحه حضرتك و اي حد يركن مكانك غلطانين ... لأن الرصيف للمشااااااه .... ولو اي حد جه و ركن عربيته وقفل عليك يبقى مش غلطان لأنه ركن في المكان الطبيعي .. في الشارع جنب الرصيف ... وده المكان اللي المفروض اي حد يركن فيه ... مش فوق الرصيف ... حضرتك بنفسك اعترفت انك ظبطت الناس يوطو الرصيف لمصلحه شخصيه (مكان انتظار غير رسمي ) ... و هما استجابو لمصلحه شخصيه ( التظبيط ) ... وطبيعي ادي البيضه و ادي اللي شراها و ادي اللي قال هات حته !!!! يعني الموضوع من اوله لأخره مش مظبوط .... انما ... هي دي بلدنا ... و كل واحد بيشوف انه صح و على حق ... طالما بيدور على مصلحته الخاصه ... لكن تعارض احتياجاته مع متطلبات الاخرين ... متخصهوش !!!!! |
رد: عايز أركن قصاد بيتي
اقتباس:
الأصل أيضا في الدول المتقدمة أن تكون المناطق السكنية للسكن و التجارية للمحلات و لكن عندنا بظراميطة فقد تحولت مناطق عديدة كان اصلها سكنيا الى مناطق تجارية فعاني الدكتور و كل من في مثل حالته من هذا العذاب و هو محق في أن يعود ليجد مكانا يركن فيه سيارته و لكن ايضا ليس من حقه طرد مواطن من مكان هو دافع ضريبة له المشكلة عزيزي تكمن في الفوضى و الفساد الإداري الذي نحن جميعا ضحاياه بشكل أو بآخر و أحمد الله انني اسكن في حلوان و لهذا أعتقد أن ما يسمى بقانون المرور الجديد ما هو إلا أكذوبة للمنظرة الإعلامية و الجباية فعشان تعمل قانون مرور صح تحاسبني عليه لازم تزيل أسباب العشوائية من كل طرق مصر (و هذا يحدث فقط لو دخل إبليس الجنة) و بعد كدة تحاسبني على قواعد المرور و ازاي احط المثلث المزعوم لو عريتي عطلت و كمان لازم تمنع ما لا يقل عن 80% من الناس أن يقودوا سيارات الا أن يتم اعادة تأهيلهم و تهذيبهم |
رد: عايز أركن قصاد بيتي
اقتباس:
أكيد اي مكان ح تركن فيه ح يكون قام بيت او قدام محل او قدام اي مكان .... وسكان هذا المكان عاوزين يركنو قدام بيوتهم بنفس المنطق اللي حضرتك عاوزه .... يعني اي مكان ح تروحه ح تلاقي حد بيقولك ماتركنش هنا لو سمحت .... انا عاوز اركن قدام بيتي .... مش معقول ح تروح مكان صحراء عشان تركن .....ومش معقول برضه ح تسيب عربيتك وتتحرك بتاكسي او مواصلات .... يبقى العربية مالهاش لازمة انت في القاهرة يا عزيزي واماكن الركن لا تكفي لجميع السيارات في اي مكان في مصر المحروسة يا راجل ده النكر بتاعة العربيات خلصت وبقت مش كفاية وعملو النمر الجديدة ام حروف وارقام عشان يكفو العربيات .... ما بالك باماكن الركن وبعدين الناس اللي من خارج القاهرة ...... يركنو فين لو واحد جاي من منية شنتنا عياش ... او كفر الشلشلامون... او الدلجمون مثلا ... وجاي يعمل اي مصلحة في قاهرة المعز..... او يزور ناس قرايبة .... او يشتري بسبوسة من عند العبد مثلا ..... بالشكل اللي حضرتك عاوزه ..... كل الاماكن في القاهرة قدامها بيوت ...... يبقى يعمل اية ؟؟؟؟ طلب حضرتك ده انا باعتبره ....... حلم ..... امنية ....... لكن واقع.... لا أعتقد مع خالص تحياتي |
| الساعة الآن 12:49 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017