رد: حكايتى مع السيارات-حكايه 10 سنوات
 

بجد بجد الموضوع ده كان تايه عنى ازاى الف الف شكرا على الموضوع الكوميدى الجامد ده يا دكتور

بس دى سيره رائعه عامله زى سيره الهلالى بالظبط هههههههههههههههه

ربنا يوفقك يادكتور

رد: حكايتى مع السيارات-حكايه 10 سنوات
 

-9-
فى أول طلعه لى على شريط السكه الحديد 00مزلقان مرتفع جدا كالجبل كنت خائف بعض الشىء لان سيارات كثيره تفصل بالتحديد عليه مع الزحام الهائل00كانت أمامى عربه كارو يجرها حمار غبى يقوده من هو أغبى منه يمشى خطوة ويتراجع اثنتين والكلاكسات من خلفى لا تهدأ وكأنى السبب مما زاد من توترى00 السيارة التى خلفى يقودها رجل أحمق 00 قليل الذوق00 قال باستفزاز:
-خلص يا عم
واستغللت فرصه خلو الحاره التى بجانبى فانحرفت بها وأخذ هو مكانى حتى أخلص من كلاكسه المزعج الذى يربكنى وانا مش ناقص
وما لبث ان أصبح خلف الكارو حتى حدث أطرف موقف شاهدته فى حياتى!
الحمار أخذ كرباجين من قائده الغبى فرمح00
عندها تراجعت الحموله للخلف فارتفعت العربه من الامام والحمار متشعلقا فيها فى الهواء00أما الحموله_من الخردة_ فانزلقت لتستقر بسياره صاحبنا 00 والعربجى طار واستقر على الزجاج الامامى له فهشمه تماما00 ولانه هم يضحك فقد ضحكت وصاحبنا المتعجل ينزل من السياره وهو يضرب كفا بكف على تلفيات سيارته الزيرو
انطلقت من المكان بسرعه وكأنى الجانى قبل ان يقف الطريق ولا أدرى ما حدث بعدها!
وصلت الى عملى00 وكان فى انتظارى حاله00سررت ان ابدأ يومى بالعمل ولم انس ان اعين عامل لحراسه السياره حتى لا يحدث ما حدث بالامس
اتجهت للمريضه وسألتها:
- ياحاجه مالك ؟
ألف سلامه
-ألحقنى يابنى
-خير
-فيه حاجات بتمشى فى جسمى
ماهذه السيده المجنونه؟صباح فل من أولها
اتبعت قائله:
-شوف ايه اللى بيمشى فى جسمى00ده زى ما يكون عفريت
كشفت عليها وكانت سليمه تماما ماعدا تعب بسيط فى الصدر
-انت سليمه ياحاجه ماعدا صدرك تعبان00 شويه برد
-ايوه عندى كحه ومن ساعه رحت الصيدليه وجبت قزازه دوا والصيدلى ادانى حقنه ومن ساعتها وانا حاسه بحاجات بتمشى00 انت لازم تشوف دمى اكيد فيه براغيت
وكتمت ضحكى فلا يحق لى ان اسخر من مريض ولكنها البدايات
قلت:
-فين الحقنه اللى خدتيها
-مش معايا
وفطنت بالتأكيد حقنه كورتيزون 00ساعات مع الستات بتعمل احساس مشابه لكن هذه السيده تبالغ
-قلت ده من الحقنه اللى خدتيها ياحاجه00وده بيحصل وعادى كلها شويه وتبقى تمام
-والنبى تسلم
طب ودى خطره يا أستاذ
زى بعضه أستاذ أستاذ00قلت :
-يا ست ما فيهاش حاجه اطمنى
-طب مش توصفلى حقنه تتنيس
-قصدك تيتانوس
-آه00 ليكون جسمى اتسمم
-لا ياست 00 مش مستهلها هى حقنه من الشارع ولا خابور
-انت شايف كده
-أيوه
-تصدق البتاع راح
-الحمد لله
-شكرا يا استاذ
-مع السلامه يابركه
اصطباحه عجب وأيام سوده جايه
مساء الفل يا دكاتره00 البدايه طين وآخرتها انتوا عارفين
(تتبع باذن الله)

رد: حكايتى مع السيارات-حكايه 10 سنوات
 

طيب و البتاع اللى بيمشى لسه بيمشى و لا خلاص


تحف ولله الناس دى

رد: حكايتى مع السيارات-حكايه 10 سنوات
 

ههههههههههههههههههههههههه ههه
كمل كمل الحكاية حلوة جداجدا واسلوبك فوق الممتاز
بصراحة انا اول مرة اشوف الموضوع وكنت قاعد متضايق ptmnlo123per144
بس بعد ماقرات الحكاية كلها موت على نفسى من الضحكptmnlo123per145 كمل كمل

رد: حكايتى مع السيارات-حكايه 10 سنوات
 

يا دكتور بجد انت مش معقول ...... انت لازم نفتحلك منتدى لوحدك خالص و تكتب و احنا نقرا و نسيبنا بقى من العربيات و ال cc و الشد و الأوبشنس و الكلام ده كله ...... ده انت بجد منتدى لوحدك ههههههههه
بجد انا نفسى اتشرف بمقابله شخصيه للعبقرى الدكتور تامر ...... ياريت بجد و الله انا حبيتك كده لله فى لله ......... و بالذات بعد المغامرات بتاعتك دى ههههههه ربنا يكون فى عونك

رد: حكايتى مع السيارات-حكايه 10 سنوات
 

-10-
مرت الايام جميله وانا سعيد مع سيارتى الجديده00الى ان فوجئت بان الزجاج توقف 00 الموتور بيلف على الفاضى00 ذهبت للكهربائى قالى البكره البلاستك اتكسري تجيب واحده جديده
وبدأت رحله البحث00 دون جدوى 00 الكل قال تجيب موتور جديد ولن تجده يمكن تلاقى عند فلان بالزقازيق00 ولم أكذب خبرا اخذت صديقى البركه وانطلقنا00 وقبل ان اخرج من مدينتنا00 استوقفنا زميل دراسه على الطريق00
-مبروك العربيه يا عم اللى على على
-الله يبارك فيك
وفى سرى"قل أعوذ برب الفلق"
فزميلنا هذا مكشوف عنه الحجاب وعينه لا تخيب ابدا00 والله مجرب بصلاحيه مدى الحياة
-على فين؟
قلت:
-رايح الزقازيق فى مصلحه
-والله انت ابن حلال 00 خدنى معاك
ولم أعلق 00كمات وربنا يستر
انطلقت وانا أقرأ كل ما أحفظ
وماهى الا دقائق معدوده ومع السرعه فوجئت بمطب محترم ومتكلف00
وطارت السياره قبل ان تنزل كالجثه!
ركنت على جانب الطريق ونز لت استطلع ماحدث
بدت السياره سليمه لكن هناك احتكاك قوى فى باطن السياره تحسسته بيدى فاذا باصبعى ينزف
00قلت بسيطه تجىء فى المهم نقف عن هذا الحد!
سرت بالسياره وانا فى شده الغضب مما حدث والالم من أصبعى!
ولم تمرلحظات حتى بلغنا سياره نصف نقل تحمل أقفاصا من الفاكهه
فاذ به يقول :
-شفت العربيه محمله فاكهه قد ايه00
كل دى حموله
وفى لحظتها اذ بالسياره تسقط فى حفرة صغيره تهتز لها بعنف وتسقط مجموعه من الاقفاص على جانب الطريق!
قال :
-شفت المغفل ماشى سرحان ومش رابط الاقفاص
قال يعنى كل دى ثقه
ولم أعلق00
تحدثت مع صديقى وحاولت ان اعتبر الآخر غير موجود00قبل ان يقول:
-بس العربيه جامده 00 وسحبتها ناعمه
كدت ساعتها ان أقفز عليه اخنقه لارتاح
قال صديقى:
-دى عربيه وحشه جدا وضعيفه جدا وانضحك عليه فيها
حبيبى يابركه 00فهو يعرف زميلنا وقد عمل الازم
وعند بلوغ مطب عالى00تنبهت وصعدت عليه بمنتهى البطء
بينما هو يشير باصبعه ويقول:
-شوف الراجل 00ههههههه
كان فلاحا يجلس عاليا فوق حزمه هائله من البرسيم فوق حماره
-والنبى حمار جامد
ولم نكد نتخطاه حتى تعثر الحمار وطار الرجل فى قناه مياه مجاوره ولا حول ولا قوة الا بالله!
وصلنا بالسلامه وبدون خسائر فادحه
-انت ح ترجع الساعه كام00عشان ارجع معاك
-انا ح أبات هنا
-طيب00مع السلامه
قال صديقى:
-غور جتك داهيه
وانطلقنا للبحث عن القطعه ولم نجدها وفى النهايه اشتريت موتور جديد

رد: حكايتى مع السيارات-حكايه 10 سنوات
 

ليا صديق بركبه برضو

كان لينا صديق جايب كاوتش جديد و طبعاالبركه قاله مبروك يعم و اللى علىعلى و سبحان الله مافيش تانى يوم بصحبى ماشى بالعربيه و الكاوتش انفجر