المشاركة الأصلية كتبت بواسطة hazem_khidr (المشاركة 387135)

معقول ؟؟
غريبه اوي دي
لان علي حد معلوماتي سنسور المطراول ما نزل كان في البرافا و البرافو 95
بس تمام يا رب يشتغل
كان نفسي بدل ما تعمل التابلوه جلد و بجمله المصاريف تجيب تابلوه استعمال
كان حيفرق كتير اوي في شكل العربيه
حتحس انها رجعت زيرو من اول و جديد

المشاركة الأصلية كتبت بواسطة michohat (المشاركة 388444)

هوا حضرتك هما التجار هناك تخصص يعنى
تجار فيات بانواعه كله على بعضه
ولا تجار 128 و تجار 131
و مكانهم جنب بعض ولا فى مسافات بينهم لان فى حساباني ان شاء الله انزل العزبة
وهل العزبة فيها نوادر وبحاله كويسة

المشاركة الأصلية كتبت بواسطة NicEgypt (المشاركة 388679)

فية هناك تجار بتوع كلة ... دول خردة ابعد عنهم
وفية تجار بتوع فيات بس .. وفية رينو بس .. طيب تعرفهم ازاي ؟
هتلاقى علامة الرينو على محلات الرينو .. علامة المرسيدس على محل كبير مخصص للمرسيدس
كذلك فيات ... وهكذا
اما بتوع الخردة تلاقيهم قاعدين ف الشارع ع الارض بدون محلات بيبيعو اي خردة
وانت داخل الوكالة او العزبة هتلاقى سمسرة ابعد عنهم .. تعرفهم ازاي ؟ هقول لحضرتك
وانت داخل الوكالة مثلا هتلاقى شباب بتقولك " ايوة يا باشا اامر ؟ رايح فين يا باشا قولي اوصلك
الناس دى تجاهلها تماما علشان بياخد فلوس سمسرة من صاحب المحل على حساب حضرتك انت !
لما تدخل وتلف هتلاقى العلامات على المحلات .. لو حصل وموصلتش للفيات تعمل اية ؟ هقولك
تروح مثلا للمحل اللى علية علامة الرينو .. تقول للراجل اللى جوة " لو سمحت بتوع الفيات فين ؟ "
هيوصف لك .. اوعى تمشى لسة .. قولة " هو اسم المحل اية او اسم صاحبة " لو راجل جدع وكويس
هيقولك ودة غالباَ .. لو راجل مش تمام هيقولك معرفش .. لما توصل للمحل قولة هو دة محل فلان
هيقولك ايوة .. ابدء بعرض اسئلتك وطلبك .. دة كلة علشان توصل للمحل بنفسك بدون السمسار
هتلاقى تمن الحاجة بتاعتك فرقت لصالحك .. السمسار هناك بياخد ع الزبون وعلى حسابك طبعا
يعنى جاب زبون بياخد .. مجبش ملوش . نقطة اخيرة .. لو طلبت حاجة وصاحب المحل قالك
هروح اجبها من المخزن قولة شكراَ .. المحلات اللى هناك معندهمش مخازن .. مكانة هو مخزنة
لما حضرتك بتطلب حاجة مش عندة .. بيروح يجبها من محل زية " زى مول الكمبيوتر كدة نفس الحركة بتحصل هناك " طبعا المحل التانى بيعطى لة بتمن الزبون واحيانا اعلى .. وحضرتة بيزود 100 ج
على الاقل عمولة لنفسة .. ويفهمك انة جبها من المخزن وانة اتأخر علشان المخزن فية حاجات كتير
الموضوع دة حصل معايا مرتين وشربتة .. وكنت بسأل ع الحاجة برة لقيتها ارخص 100 ج من ما جبتها وشفت الواد وهو راجع لهم بحاجة مكسرة مرضتش اخدها خرجت وراة شفتة وهو بيرجعها لهم علشان ااكد لنفسى احساسى .. ربنا يوفقك بأذن الله

المشاركة الأصلية كتبت بواسطة NicEgypt (المشاركة 384759)

السلام عليكم ورحمة الله

للتذكرة للاعضاء وللاكتمال سلسلسة الريجاتا .. كنت عملت موضوع قديم للاسعار قطع الغيار الميكانيكية والكهربائية فى الريجاتا .. والموضوع شمل اغلب الاجزاء .. الرابط هنا فى حالة احتياجة
http://www.masrmotors.com/vb/showpos...25&postcount=5

وهنا رابط تعديلات للاضاءة الريجاتا والصالون وخلافة للمراجعة
http://www.masrmotors.com/vb/showthread.php?p=324477

وهنا رابط لعمل مساحة واحدة بدل مساحتين اماميين
http://www.masrmotors.com/vb/showthread.php?t=43585

احب انبة حضراتكم اولا . ان التجار كلهم سواء فى الوكالة او عزبة شلبي عندهم نقطة استغلال .. بيبدء معاك من سعر هلامى وينزل معاك .. مثلا 400 ج لقطعة ما .. وتنزل معة لحد 300 ج ويمسك على كدة .. اخنقة فى الفصال لحد ما تجيب اخرة وقولة انا لقيت عند فلان بكذا .. يعنى كنت بروح اقولة فلان عندة بكذا .. وفلان اساسا معندوش ! هههههه بعيشة ف الوهم شوية واسيبة وامشى واجيب حاجات من مكان تانى وارجع لة .. واقولة هة فكرت ؟ :grin28:
يقولي هو مش انت كنت هنا من شوية وانا قلت 300 وسبتنى ومشيت ؟ قلت لة هاخدها ب كذا هة اية رأيك ؟ طبعا دة شغل غلاسة .. اختصار الكلام فاصل بكل شدة وبكل ما اوتيت من قوة وهينزل معاك ف السعر لانة بيبدء من سعر هلامى وينزل لمبلغ عبيط للاختبار الزبون ولا تـتـسرع ف الشراء .. واعمل عبيط وارجع لة تانى بعدها بشوية وقولة هاة هاخدها بكذا قلت اية هههههه ؟ ال يعنى كنت سايبو يشاور علقة ههههه ... لو حدفك بحاجة انا مش مسؤل :grin28: .
انهاردة هنتكلم فى اسعار اجزاء الريجاتا هما متوفرين بأذن الله كل قطعها تقريبا موجودة نبدء بأسم الله :

اربع ابواب ريجاتا نوفا 1000 ج كاملين بعد فصال شديد من اصل 1600 ج ..
عدد 3 ابواب كاملين بدون اي مشاكل او خدش وباب واحد بس فية بارومة من تحت عند مسمار المفصلة سهل اصلاحة خلى بالك هتلاقي بارومة فى بعض الابواب لو محتاج تاخد منها طبلة مثلا او تستخدم منها اجزاء . ولو عيزهم نضاف لازم تفحص الحاجة كويس جدا جدا جدا

اربع ابواب ريجاتا نوفا نضاف بدون اي بارومة كاملين بالفرش وكلة 1200 ج بعد الفصال
اربع ابواب ريجاتا نوفا فاضيين خالص = 800 ج
اربع ابواب ريجاتا العادية فاضيين خالص = 500 ج بدون فصال .. يعنى تقدر تنزل معة ف سعرهم كمان
باب واحد ريجاتا نوفا او عادى = 100 ج بعد فصال شديد كان بيتكلم فى 200ج او 250 للباب الواحد
باب واحد ريجاتا كامل = 200 ج
تابلوة ريجاتا نضيف جدا جدا بدون خدش = 2000 ج بالعدادات .. سعر هلامى خرافي .. بعد الفصال 1750 ج
تابلوة ريجاتا بدون عدادات فية بعض الخدوش ومحتاج يترش اسود علشان ينطق = 700 ج بعد الفصال
فوانيس خلفية ايـــطالى ريجاتا وخلى بالك من ايطالي دى : 350 ج بدون فصال فوانيس نوفا وعادية الاتنين نفس السعر والاتنين يركبو مكان بعض للعلم.. هنزل بكرة اشتري النوفا لانهم حتة واحدة مش اتنين .. للمعلومية فقط .
سعر اوشاش فوانيس خلفية ف الوكالة : 40 ج للواحد ايطالى = 80 ج الجوز
سعر الكرتيرات الامامية الاتنين بـ : 100 ج .. الواحدة 50 ج ... عارفين اول سعر طلع من بوقة كام ؟ 300 ج ! يفرحتى .. اخدتهم ب 100 الاتنين بعد فيلم افرنجى هندى عربي
اوكرة النوفا : 500 ج الواحدة !! وللاسف مش موجودة او انادرة شوية لكن هتلاقيها بعد بحث يعنى دور عليها شوية ولا تيأس ! .. كل واحد يخلي بالة من كالونة .
اوكرة الريجاتا العادية : 200 ج وزى الرز والسعر قبل الفصال
سعر 2 رفرف اماميين = 400 الاتنين مع بعض .. بعد الفصال بالمسامير كلها كاملة بتاعة الرفارف
" خلي بالك من البارومة مكان المسامير دور على حاجة نضيفة لانى لقيت بلاوى واليوم طار ف البحث على حاجات نضيفة "
اكصدام امامى = 250 ج
نص خلفي كامل = 1800 ج
العتب كامل للاربع ابواب = 100 ج بعد الفصال وقلت لة مش عيزهم لانى فعلا مش محتاجهم سألت علشان المنتدي

سعر 2 فوانيس امامية بالنيكل استيراد من عزبة شلبي بـ : 600 ج فى عزبة شلبي
اكصدام خلفي سليم بدون اي خدوش : 350 ج ولازم تفاصل معة ماشى ؟ بدء معايا من 450 ج !! تجاهلة واعمل عبيط زيي وقولة هما 200 ج مفيش غيرهم .. بص هو شوية وهيطلعك برة الوكالة بسببى هههههه .. خليك ورايا وانت تكسب ::angelwings:
اكصدام خلفي متصلح قبل كدة بس تصليح نضيف : 200 ج
سعر الشبكة الامامية " الشنب " فى الوكالة ايطالى مفهاش ولا خربوش = 200 ج بعد فصال شديد من اصل 300 واخدتها وسط شوية حاجات واتلككت بيها .. يأ اخدها بـ 200 ج وسط الحاجة يبلاش مش واخد حاجة " شغل عيال "

علماَ انها احسن من الجديدة .. الجديدة تركي بـ 140 ج .. وفية ناس غريبة بتبيع امو 50 ج بـ 180 ج !!!
هقولك الفرق بين الاتنين حـتى لا تقع فـريسة .. الرخيصة فية مسافات بين الريش وبعضها .. تقدر تشوف الريداتير من برة العربية .. التانية خامة احسن وريش ضيقة قوي .. والنيكل مدمج فى الشنب .. الرخيصة النيكل ملزوق بسيلكون ف الشنب
سعر كونصولة اللى حوالين الدريكسيون " اللى فيها زرار الانتظار والسخان والشبورة وخلافة " = 300 ج بعد فصال من اصل مبلغ 500 ج !!! كان نفسى اخبطة بالرفرف اللى ف ايدي نزلت معة لحد 300 ج بعد معاناة وجبت لة شاي وشندوشات وظبط الزبون واديت لة 300 ج وقلت لة انا ماشى عايز حاجة ؟ وجريت

اسعار حاجات جديدة فى شارع فيصل والتوفيقية :
سعر فوانيس ريجاتا نوفا جديدة زيرو تركي : 200 ج للفانوس الواحد .. يعنى الاتنين 400 بعد فصال شديد شديد
سعر فوانيس ريجاتا نوفا جديدة تايواني : 250 ج .. وفية ناس عندها بـ 225 باردو بعد فصال
سعر اوشاش فوانيس ريجاتا خلفية : الواحد بـ 50 ج التايوانى بعد فصال من اصل 65 ج
سعر اوشاش فوانيس ريجاتا خلفية فى التوفيقية : 40 ج للواحد
سعر فوانيس امامية جديدة فى التوفيقية نوفا بدون نيكل : 500 ج
سعر الشبكة الامامية الواسعة التركي : 50 ج فى التوفيقية وهى الوحيدة الموجودة هناك " ولا انصح بها ابداَ ابداَ " خامة وحشة + مسافات كبيرة بين الريش
سعر الشبكة الامامية الضيقة موجودة فى فيصل : 140 ج

انا سألت على حاجات كتير والله علشان اكتبها لحضراتكم وللاسف دماغي مقلوبة ودة اللى فكرو لحد دلوقت .. لذا سيتم تحديث الموضوع تباعاَ .. يعنى تابع الموضوع كل فترة هتلاقي جديد مكتوب بأذن الله .. ولو عند اي عضو سؤال عن قطع غيار او جزء يسأل وانا فى الخدمة بمشيئة الله .. وان شاء الله لما اخلص العربية هعمل موضوع عن رموز زجاج السيارات اللى بتبقى
مكتوبة وازاي تعرف اسم المصنع وبلد الصنع ... الخ .. الموضوع مشابة للارقام المكتوبة على فردة الكاوتش