رد: هل شراء سيارة كسر زيرو مخاطرة؟؟
 

طبعا بتكون مخاطرة لو اللى بيشترى من النوع اللى مش بيبص على الاساسيات و القوائم و يروح يكشف عليها عند واحد محترم سواء ميكانيكى او سمكرى . لان بصراحة تكنولوجيا شد الشاسيهات و تعديل العربيات و الاجهزة اللى بملايين و الانصاص ( امامى او خلفى ) اللى بتيجى استيراد ، و السمكرية اللى اصبحوا كلهم فن و مهارة ( و معروفين بالاسم ) فى شد العربيات و جعلها كالزيرو ، اصبحت تخلى اى واحد من النوع اللى مش بيهمه حالة العربية لانها تعتبر زيرو - على حد قوله - يلبس احلى مقلب فى حياته
للاسف واحد صاحبى لبس المقلب ده ، اشترى مازدا 3 2009 ماشية 7 الاف كيلو ، بعد شهر من المشى بيها حس برجة فى الكابينة و رجرجة جامدة فى الكبوت ، فراح كشف على حالة البودى و العربية فى الحرفيين و حطها على جهاز حديث بيكش اى لحامات او وصلات ، و كانت اكبر صدمة له فى حياته : العربية النص الامامى و الكابينة بالكامل متغيرين ، و طبعا باعها بخسارة 30 الف جنيه عن السعر اللى جابها بيه ، و هو الحمد لله معاه دلوقتى سيراتو هاى لاين . و دى اخرة اللى يجيب كسر زيرو من غير ما يكشف على العربية او ما يكونش حد يثق فيه.
نصيحة اخوية : الاحسن تخليك فى المضمون و ممكن بتمنها تجيب حاجة زيرو بس اقل شوية ، لان انا لا اشجع كسر الزيرو الا اذا كان عن طريق حد معرفة .

رد: هل شراء سيارة كسر زيرو مخاطرة؟؟
 

دايما العربيه الزيرو لما تتباع بتقل كتير بتبقى الفرصه ان الخسارة الاولانيه اللى هى اكبر خسارة تبقى مش عليك انت وانت تخسر بعد كده الاستخدام العادى مش فك كلمة زيرو وانا لو مكنتش جيبت عربيتى تقسيط كنت اشتريت على طول كسر الزيرو بس انا ناوى ااقسط والناس اللى بتقسط كسر زيرو بياخدوا فوائد جامده قوى الجنيه بجنيه فى بعض الاحيان و 25% فى السنه فى اوقات تانيه تلاقى فى الاخر ان ممكن تقسط كسر زيرو بسعر اغلى من الزيرو وده علشان فرق الفائده لو بقى فيه بنوك بتقسط كسر الزيرو بتبقى لقطه طبعا واكيد انت ها تبص على الحاله ومش شرط ان الراجل بيبعها علشان معيوبه وممكن قوى علشان معجبتهوش انا ليه اصحاب كتير جابوا زيرو وباعوه كسر زيرو وهو زى الفل بس هو ما ارتاحش مع العربيه يعنه واحد واخد دايما على انه يركب عربيه فيها ABS واشترى واحده مفيهاش فباعها علشان ما ارتاحش فيها لكن انا كنت ها اشتريها زيرو ومش ها ادور على الميزة ديه مثلا فمش شرط انها علشان ما عجبتش حد غيرى يبقى مش ها تعجبنى

رد: هل شراء سيارة كسر زيرو مخاطرة؟؟
 

سيدي الفاضل.. طبعاً نظام الـCertified preowned cars بيوفر فرص رائعة...
لكن ده لو في توكيل محترم وعنده برنامج دقيق للكشف ... في الحالة دي السيارة كأنها زيرو بضمان الصانع..
لكن طبعاً عندنا في كوكب مصر غير اللي عندكم في كوكب كندا... عندنا -بلا فخر- التوكيل بيعجز عن اصلاح العيوب بشكل محترم فضلاً عن تشخيصها أو اكتشافها..
لو ذهبت بالسيارة للتوكيل سيأخذ منك مبلغ خرافي ولن تضمن دقة الكشف لأن نظام الـCertified preowned بيكون فيه check list معدة مسبقاً لضمان الكشف عن أي عيب.. لكن ليس أي توكيل والسلام ممكن يكشف بدقة ويغطي كل الاحتمالات لمجرد انه اسمه "التوكيل" ...
في النهاية اللي حيكشف على عربيتك الواد سيد بعلوكة الصنايعي اللي أخد دورة تدريبية لمدة 3ساعات والباقي متروك لفهلوته و شطارته... وكل سنة وانت طيب

رد: هل شراء سيارة كسر زيرو مخاطرة؟؟
 

كسر الزيرو فرصة طبعا بس المشكلة عندنا انك بتخاف وتقلق من كل حاجة لأننا جميعا بنضحك على بعض وكل واحد ونصيبة يعنى اللة اشترى زيروا برضة بيحصله حاجات كتير زى كده

رد: هل شراء سيارة كسر زيرو مخاطرة؟؟
 

انا استفدت كتير من الموضوع رغم ان المعلومات كلها تساؤلات
بس تقليب المواضيع بيفتح معاك زوايا كتير
كنت اتمني ان يكون في المنتدي تلت اربع خبراء يجيبو عن تلك التساؤلات المحيرة دي
ايجابات علمية