رد: تعليم صيانة السيارات
 

شوف بس قصة البطاريه الأول

ومينفعش نطلع عماره من غير مانمر على الدور الأول

والدور الأول فى عمارة السيارات

هى البطاريه

ومتسمعش كلام إللى بيقولك

البطاريات بتتصلح والكلام ده

وحنقلك ربع بدل الربع التالف وأشغلك بطاريتك

للأسف

إللى تلاقيه بيقول الكلام ده

هو إللى عنده ربع تالف ( مش البطاريه )

وقولتلك

هاتلك واحده جافه

من أنتاج AC DELCO أو فارتا

رد: تعليم صيانة السيارات
 

كلام حضرتك مظبوط
باذن الله هسال ع النوعين دول واقول لحضرتك عليهم
هل الجافة تصلح للفتيس الاتوماتيك والافضل 70 امبير
بالنسبة لتغيير الزيت الميكانيكي نصحنى بالغيار كل 1000كم وبلاش كل 3000 كم او اكتر حفاظا ع الماتور ونصحنى باسو الرصاصي بدل من بترومين اللى انا بستعمله حاليا وناس اصحابي بيقولولى شل الاصفر على كل 3000كم افضل
سحب العربيه بطيئ لحد سرعة 40 كم الميكانيكي مصمم انه من الفتيس الاتوماتيك لازم يتكشف عليه ؟؟ ولا ممكن له ظبطه اخرى من المكنه (( مثلا زى صوت عن عن عن عن والعربيه بتتحرك ( تهدير بنزين برده ) خنقه فى الطلعه هى قلت على فكره لما ظبط الهوا من الكربراتير لكن العزم مازال بطيئ وحجة الصنايعية ان الاتوماتيك كده وهل صوت المارش فى الاتوماتيك بيكون خشن شوية او اعلى من المانيوال
مستنى افادتكم الكريمةGIFT4U
ولكم جزيل الشكر وبارك الله فيكم ولكم

رد: تعليم صيانة السيارات
 

البطاريه ملهاش دخل بالفتيس

أنت مجرد مابدور

إللى بيشيل الأحمال الكهربيه المتنوعه بالسياره هو الدينامو

والبطاريه برضه واقفه أحتياطى

والله الدينامو خسع فى عمل الواجب عليه

بتخش البطاريه تساعد معاه أو تقوم بدوره

إلى أن يحدث تفريغ كامل لشحنتها الكهربيه

وهب ............وقفت المكنه والعربيه

عموما

تحديد أمبير البطاريه بيتوقف على الأحمال المطلوبه للسياره

ومدى قدرة الدينامو

وبما أننا مش عارفين الدينامو عندك قدرته كام أمبير

فمش حقدر أأقولك

ركب 70 أمبير ...........والدينامو أقل من تلك القدره الكهربيه

فيفضل بالنسبه لك

الألتزام بنفس أمبير البطاريه الحالى

فلو هى 55 أمبير

يبقى من باب الأمان ( أشترى 55 أمبير )

على فكره فى سيارتى النوبيرا .........البطاريه إللى نازله معاها 55 أمبير

وناوى لتغييرها ب70 أمبير ( على فكره مفيش 70 هى حاجه وستون )

لأننى عارف الدينامو عندى يشيل لحد 80 أمبير

الحقيقه موضوع الزيوت ده متعب ومقلق فعلا

أنا كنت بأستعمل فيسكو 2000 ( وقعد عال العال لحد 3500 كم )

وبعد كده بدأت ألاحظ نقصان مستواه على المقاس

فغيرت لفيسكو 3000 ( أماراتى وحشوف نظامه أيه ده كمان )

بس بكل أمانه أنا كنت مجرب موبيل XHP من قبل

وعمره مانقص معايا

هو أو موبيل 1 التخليقى

وبالنسبه لشيل فيه إللى شكر فيه وفيه إللى أشتكى منه برضه

وأنصح دايما بأستعمال الزيت الذى يستقر معه آداء محرك سيارتك

ومش مهم بأه هو تابع لمين

فيسكو أو موبيل أو شيل أو توتال أو أو

الفتيس

لازم تتابع غيار الزيت والفلتر وبرضه تكون حرارة زيت الفتيس كويسه

طبعا ده من خلال نظافتك المستمره للردياتير ( سواء الخاص بالمكنه أو الفتيس )

والكربوراتير والفلاتر ( هواء + بنزين ) يكونوا تمام

ونفس الشىء بالنسبه للبوجيهات

وبعد كده

أترك الأمر على الله

وبشكل عام الأوتو .........تقيل شويه فى السحب عن المانيوال

والسبب معروف

النقل منظم فى الأوتو عن المانيوال

برضه لتحسين كفاءة السحب بشكل عام

1- تكون مطمن لفرامل السياره ( مفيش جنط بيسخن عن التانى ) لنفس المحور ...أمامى أو خلفى

2- شكمان العربيه يكون سالك وتمام ........ومتسيبش علبه وحشه فى منظومة الشكمان

3- حافظ دايما على ضغط أطارات مناسب ومواصفات مناسبه للأطارات

4- تكون مطمن لكفاءة بلى عجل السياره

5- تكون مطمن لزوايا السياره

بهذا الشكل

فا أنت عملت إللى عليك

والتوفيق من عند الله

رد: تعليم صيانة السيارات
 

الف الف شكر ليك يا بشمهندس سمير
واكثر الله من امثالكم وربنا يكرمك

رد: تعليم صيانة السيارات
 

الله يخليك

وبالتوفيق

وتحت أمرك فى أى استكمال بعد هذا

رد: تعليم صيانة السيارات
 

معلش كرم افادتك يا بشمهندس خلانى اطمع فى مزيد من الاستفسارات ربنا يعزك
عربيتي اكسيل 1500 اوتوماتيك ( لو شغلت التكييف هلة هيهبط العربيه اكتر مع الاوتوماتيك ولا عادى حيث انه 1500 سيسي )
1- بالنسبة للبطارية الجافه صاحب محل قالى ان لو الدينامو باظ او قطع بيبوظ البطارية الجافه هل ده حقيقي ؟؟؟
2- انضف الريداتير ازاى وهل الفتيس له ريداتير اخر بخلاف الريداتير اللى فى صدر العربيه الواصل بالقربه وهل للفتيس الاتوماتيك فلتر منفرد يتم تغييره وكل اد ايه
3-واطمن ع الفرامل ازاى ( من خلال الزيت ولا من خلال العفشجي واقوله ايه )
4- نظافة الشكمان يعنى اروح لبتاع شكمانات اقوله يعمل ايه مثلا ارجو التوضيح ( اوقات بشم عادم فى التسخين )
مش عارف اقولك ايه ربنا يكرمك

رد: تعليم صيانة السيارات
 

شغل ياباشا التكييف وخد راحتك

مادام نازل مع العربيه كتصميم ملحق على حمل المكنه

والمكنه حملها مظبوط

فماهو الضرر من تحميل التكييف على المكنه

دا حتى

ترك التكييف بدون تشغيل خطأ فنيا

بيؤثر على كفاءة دورة التكييف سواء ككمبروسور أو مروحة تكييف أو مكونات أخرى بدايرة التكييف

الحقيقه الكلام ده مش سليم

وبرضه أسأله

قوله أيه السبب ....يمكن معاه حجه فنيه ...........!!!!!!!!!!!!!!

بمتابعة تغيير مية التبريد بصفه دوريه وبالذات لو كنت بتستعمل ماء عادى من الحنفيه

لو بصيت على ردياتير السياره

حتلاقى عليه أربع خراطيم

2 بقطر كبير .............خاصيين بالمكنه ( 1 شمال علوى + 1 يمين سفلى )

2 بقطر صغير ..............خاصين بدخول وخروج زيت الفتيس ( أسمها خراطيم هيدروليك )

بالنسبه للخرطومين الصغيرين

واحد بيودى زيت فتيس ساخن لتبريد جوه سربنتينه صغيره على اليمين بتاع رادياتير المكنه

والتانى بيرجع الزيت بعد ماتم تبريده بواسطة سربنتينة زيت الفتيس

( الأثنين مصممين داخل أطار واحد ولكنهما فى الحقيقه سربنتين واحده لتبريد مية المكنه والأخرى لتبريد زيت الفتيس )

أى فتيس أوتو بيكون فى داخله طلمبه زيت لزوم تشغيل الفتيس

على مدخل الطلمبه

لابد من وجود وسيله لتنقية الزيت من الرواسب قبل دفع الزيت للفلف بودى ( بيسموه الخريطه فى السوق )

ممكن بأه تلاقى وسيلة تنقية الزيت عندك عباره عن فلتر على جنب الفتيس من أسفل

وممكن تكون وسيلة الترشيح عباره عن مصفة ترشيح ( شبه الأسفنجه ) وموجوده من الداخل ومش باينه قدامك

أذا

مكان وسيلة تنقية زيت الفتيس من الشوائب قبل ضخه بالطلمبه بتعتمد

على نوع الفتيس وطريقة تصميمه

وبشكل عام وبصفه تقريبيه

لو عاوز آداء صح من الفتيس الأوتو

غير زيته وفلتره ( كل 60 ألف تقريبا )

أنا أقصد ضمان جودة الآداء الفرملى

بمعنى

ميكونش فيه فرده فراملها محمله عن التانيه

ده بتعرفه أزاى

ممكن مع رفع السياره بيتم أختبار مدى سهولة حركة العجل ( للأطمئنان على الفرامل )

وفى نفس الوقت بتطمن على جودة آداء بلى العجل لدوره الموكل إليه

كل ده لتجنيب أى عوامل تعرقل سحب السياره

أحسن وسيله لترويق الشكمان

هو الأعتياد على السفر ( ولو مره شهريا ) بمشوار لايقل عن 400 كم ( رايح جاى )

فعدم الحركه بالسياره وتحجيم مشاويريها بيجعل الشكمان يعج بالملوثات الكربونيه

والتى بدورها تعوق سريان العادم

وبالتالى تعوق سحب السياره