مصر موتورز مجتمع السيارات - ارشيف الاستراحة 2011

فى البداية وقبل ما أبدأ انى أحاول (وأنا قاصد كلمة أحاول لأن مش كل اللى راح يمكن تعويضه ) أعيد كتابة المواضيع والمشاركات اللى ضاعت وخصوصا انى كنت فى الفتره اللى ضاع منها المواضيع والمشاركات كانت من أكثر الاوقات اللى كنت متواجد فيها على المنتدى وكتبت فيها اكثر من 10 مواضيع جديده وحوالى 400 مشاركه.
أنا حابب انى أقول لكل مشرفى وأعضاء مصر موتورز وطبعا أولنا صاحب المنتدى أبو نورا أنى بعتبر ان اللى حصل اول امبارح للموقع دا عامل زى اللى حصل فى الاسكندريه ليلة رأس السنه
لأنه كان هجوم عدوانى باطل صاحبه أجبن من انه يعلن عن نفسه لأنه مش صاحب قضيه بس قصده الخراب وخلاص
أنا مش عايز أتكهن وأقول هو مين علشان ماكونش رميت حد بالباطل بس أيأ كان مين هو فهو ضيع حاجات كتير منها تعب الاعضاء لانه أخد كتير من تفكيرهم فى تجهيز موضوع شيق وماده جيده يستفيد منها باقى الاعضاء دون أن يكونوا قاصدين أى حاجه تانيه غير الاستفاده المعنويه وكمان وقتهم اللى ضاع واللى كان ممكن يستفيدوا منه فى انهم يقعدوا فيه مع حد بيحبوه او عزيز عليهم.
دا غير سعادتهم باللى قدروا انهم يحققوه فى فتره وجيزه جدا واللى من خلالها قدر الموقع انه ينمى نفسه ويبقى من اكبر مواقع السيارات وغير السيارات فى اقل وقت ممكن.

انا عارف كمان ان أ/ وائل كان من ضمن المصدومين من اللى حصل ان ماكنش اكثرهم على الاطلاق مش لانه مجرد صاحب المنتدى بس لان منتدانا يتعلق بحاجات تانيه كتير تجاريه زى الاعلانات واللى هدفها انها تصرف على المنتدى علشان يطلع بالشكل اللائق دا
غير المنتديات التانيه اللى كانت على نفس السيرفر اللى اتضرب
دا غير ان كان بنعتبر مصر موتورز بيتنا فالمنتدى بالنسبه لوائل هو ابنه اللى كبر ادامه يوم بعد التانى واعتقد ان اى حد فينا لو حد قرب من ابنه هيبقى عايز يعمل فيه ايه

وائل ... اكيد احنا مش هنسيب منتدانا يقع وهنحاول بكل عزمنا اننا نعوض اللى راح وان كان راح من المنتدى 342 موضوع و 4450 مشاركه عن فتره 9 ايام فاحنا ان شاء الله هنقدر اننا نعمل ضعف المواضيع والمشاركات دى فى نفس الوقت ان ماكنش اقل وبنفس الجوده فى المواد المقدمه

بس انا بطلب من حضرتك انك تحاول تعمل كل جهدك فى انك تعمل كل سبل الحمايه المتاحه وغير المتاحه فى سبيل صد اى هجوم تانى بعد كده ..
وانك تتابع موضوع الحرب على مصر موتورز فى انك تكتبلنا ولو يوميا ارتفاع معدلات مصر موتورز عن اليوم اللى قبله واعتقد ان دا هيدينا دفعه كويسه اننا نعوض اللى راح

وبطلب من جميع الاعضاء التفاعل الجاد فى الفتره اللى جايه علشان نقدر نعوض اللى راح مننا ونبطل موضوع الفرجه فقط اللى بيعانى منه اكثر من نص اعضاء المنتدى لما بيحطوا مواضيع تستحق المشاركه والشكر والتقييم الجد وبيلاقوا نفسهم كانهم وقعوا فى صحرا او بينحتوا فى الصخر ..وبندا بالمشاركات الايجابية ولو حتى بكلمة شكر اعتقد انها هتدى دفعه للى بيعملوا المواضيع انهم يكملوا اللى بدأوه

ارجوا من أ/ وائل وجميع المشرفين والاضاء انهم يتعهدوا جوه الموضوع دا باللى مكتوب فوق ان كان يناسبكم ونبدا من دلوقتى

رسالتى انتهت ولكن مواضيعى ومشاركاتى لن تنهى وتذكروا قول الله ( ان الله لا يضع اجر من احسن عملا ) صدق الله العظيم

وشكرا