مصر موتورز مجتمع السيارات - يوميات سيترونتى........ الـ AX

اقتباس:

المشاركة الأصلية كتبت بواسطة misry (المشاركة 451793)

...

أنا السيترولين اصلا داخلة دماغي بس كل ما اقرأ عنها يقولوا قطع غيارها قليلة وغالية
ومفيش صنايعية بيفهموا فيها وخصوصا اني انا من طنطا مش من القاهرة ... فايه رأيك
في الكلام ده ...
شكرا ...:)

حبيب قلبى يا مصرى
بمناسبة طنطا والناس والحلوين اللى فيها..
فى واحد محترم زى حضرتك كده كلمنى اكتر من مره عشان يسألنى على تقدير(تثمين) حاله ستروين فى طنطا برضه وبما يرضى الله قولتله على كل المفيد ونبهته ان يعاين كويس عشان يعمل حسابه لو هايصرف ولا حاجه .....
انا بس افتكرت عشان الراجل ده كان من طنطا واسمه محمد تقريبا (اوعى يكون انت؟؟؟ هههههه)
بص يا برنس الخلاصة ستروين AX للى غاويها وعايزها وعايز يستمتع بيها وما بيفكرش يبيعا
نحسبها مع بعض؟؟؟ (الكلام ده ده كله رأى مش تحيز اوك يا مان؟؟؟؟)

انا (عن نفسى يعنى) قولت عايز عربية فل اوبشن-تكييف (او مجهزة للتكييف)-سنتر فابريقة(يعنى فيها اصلا مش يتعملها)-زجاج كهرباء-موديل تسعينات(غير مستهلكة اوى)-صغيرة هاتش باك(على قد احتياجى)-سعر معقول (لا يتجاوز 20 الف)
دى المعطيات... تمام!!!؟؟؟؟
كان قدامى بيجو 205 وابتديت ادور فيها بس فقدت بند موديل تسعينات لان المعظم موديل تمانينات وتجاوزت ودورت برضه واللى شوفته ماعجبنيش بس 205 اخت AX مع زياده توافر قطع الغيار وسهولة الصيانة
صديق لفت نظرى لـ AX لانها كانت معاه وشكر لى فيها جدا وقالى عيبها (غلو قطع الغيار-ومش اى حد بيشتغل فيها) لما لاقيت ان فيها كل اللى محتاجه وخصوصا السعر ابتديت ادور على تجار قطع الغيار والفنيين اللى بيشتغلوا فيها
لقيت اكتر من صنايعى وناس متخصصة ...غير بقى كهربائى حبيبى (بتاع كله) بس بيصبر ويدور ع العيب ويشتغل .......غير عفشجى كويس برضه بيشتغل......... غير... وغير.... وغير............
يعنى الصيانة دى تخضع لنقطتين:
1- صنايعى متخصص ستروين (زى اللى بتعامل معاه فى الميكانيكا والعفشة+قطع الغيار عنده برضه)
2- صنايعى غير متخصص بس عايز يشتغل ويشتغل صح
بالنسبة لى الصنايعية(الصيانة متوفرة)

نيجى لقطع الغيار (هى مش غالية مقارنة بالعمر الافتراضى) بمعنى وبحسبة بسيطة كده:
قطعة فى يستروين بـ 100 ج تقعد معاك 12 شهر مثلا
نفس القطعة فى عربية تانية بـ 35 ج تقعد معاك 4 شهور هاتغيرها فى السنة 3 مرت بـ 100 ج برضه مثلا.
اذن القطعة فى الفرنساوى(او الغالى)=3 قطع فى غير الفرنساوى(او الرخيص)
مع احتمالية ان القطعة الاصلية فى الفرنساوى سواء جديد او استيراد ممكن تركبها وتنساها
وبصفة عامة:
مع الستروين هاتصرف وفى غيرها هاتصرف (لان المستعمل بيتصرف عليه) الا لو تابعت واهتميت اول بأول هاتصرف فى البداية بس

الفرق بقى فى المصاريف كالاتى:
مع الستروين هاتصرف فى الاول (او فى مره الصيانة مبلغ مش قليل) لكن مش هايتكرر غير كل فين وفين واحتمال مايتكررش (حسب اهتمامك)
مع غير الستروين هاتصرف فى الاول برضه(او فى مره الصيانة مبلغ قليل ) لكن هايتكرر من وقت للتانى
انا قولت اريح دماغى واجيب حاجه اصرف عليها فى مره واحده =اللى هاصرفة على غيرها فى 3 او مرات وصلت نقطة الصيامة وقطع الغيار....؟؟؟؟
نيجى بقى للاداء والاستمتاع
العربية لو تمام من كله هتاخد تسارع ماحصلش وهواء بارد فى عز الحر وزجاج كهرباء وسنتر وكماليات اصلية فى العربية
(الفرنساوى فرنساوى برضه وده له تمن).........
موتور 1400 على عربية وزنها 650 الى 750 كجم شوف انت بقى من اقل عزم العربية تهجم ع الطريق ازاى....
بنزين 80 شغال مايقولش لأه وهى اصلا بتصميمها (ككل الفرنساوى) موفره فى البنزين 220كم/20 لتر ده متوسط......
يعيبها فقط
1- صغر المساحة وخصوصا فى وجود عائلة(محترمة)
2-عدم الثبات فى المنحنيات (مابخدش الملف على سرعة عالية عشان بحس ان العربية هاتتقلب على جنبها)

الحمد لله جت من عند ربنا واتغلبت على العيبين دول بأن اسرتى صغننه على قد العربية 3 افراد فقط
وكده كده انا مابحبش اجرى بالعربية وطبعا باخد الملفات ع الحنين
(الهدوء طبع فيا من عند ربنا)

والحمد لله لغاية دلوقتى العربية ماوقفتش منى فى مره وانا ماشى وماخذلتنيش فى اى موقف احتاجتها فيها (عملت معايا بتمنها واكتر-بنت اصول صحيح)

ومانكرش انى صرف ما يقارب 12000 خلال اقل من سنة لانى ماباسيبش مسمار مش فى مكانه (دايما ايدى فيها وبغير اللى ممكن يتصلح وبجيب حاجه سليمة من بابها)
وبالطبع اللى غيرته ماغيرتوش تانى ومن ضمن المصاريف ككل التجديد بقى بصفة عامة والاضافات اللى عملتها والدهان والكماليات و...و.... ,....

والنتيجة زى ماحضرتك شوفت فى الصور كده

بس عندى ناقصها التكييف وتبقى ولا موديلات 2012 ههههههههه طبعا من كتر مابحبها القرد فى عين امه غزال (وان شاء الله هاركبة) - التكييف مش القرد هههههههههههههههههه

وفى النهاية اقولك لو هاتحتفظ بيها وتقدرها(تعرف قيمتها!!!)... توكل على الله وهاتها وظبطها على كيفك
ولو فى نيتك تبيع يبقى هات حاجه سوقها ماشى لان الستروين برضة ليها زبونها اللى بيدور عليها بس ده قليل عن باقى العربيات

اتمنى اكون وضحتلك الصورة(حسب رؤيتى الخاصة وتجربتى)
وتحت امرك فى سؤال او اى حاجه عايز تعرفها
وشكرا لمشاركتك الايجابيةROSE4U