رد: الى كبير الابيزاوية
 

بداية كده بعد هبوط الاسعار 30-35 ممكن يجيبلوك ابيزا موديل 99 1400 كمان مش 1000 بس 1400 قليل شوية و تكون حالتها فوق الممتاز

الابيزا 99 نفس شكل 94 مع اختلافات (الاكصدامات و الشبكه و اكر الابواب الداخلية و اختلاف شكل العدادت و طريقة حساب الكيلوات (99 بتحسبها ديجيتال)(94 بكر)

الموتور ال 1000 موتور اقتصادي لازم تكشف عليه كويس و تقيس كبسه قبل ما تشتريه لانه محرك صغير الحجم و بيتبهدل بسرعة لكن ممتاز في استهلاك البنزين 350 كيلو في الصفيحة و فيه عربيات سجلت استهلاك احسن من كده وصل ل 380 كيلو في الصفيحة
موتور بيتحمل الشغل العادي لكن متفرمش فيه جامد شد و حرق و كده يعني لو حالته كويسه هيستحملك و يعد معاك شوية

لا انصح بتركيب تكييف عليه بالمره الموتور هيموت

اما ال 1400 استهلاك البنزين 250 كيلو في الصفيحة محرك قوي تجميع سريع يتحمل التكييف و اعتمادية عاليه و فيه ناس كتير بتشتري الابيزا 99 1000 و موتورها بيبقي نص نص و يسقطو ال 1400 بيسقط علي نفس الضفيرة و الفتيس و العفشه و القواعد و القنطره بتوع ال 1000

ال 99 صيانتها سهله جدا و موتورها مفهوش اي تعقيد عايز واحد بيفهم بس يشتغل فيه و دول موجودين كتير

الابيزا 94 1300 كربراتير استهلاك بنزين اكتر من 99 و العربية معايا و حافظها و سجلت معايا 200 كيلو في الصفيحة و الموتور في اسوأ حالاته(كربراتير محتاج تنضيف-بوجيهات و فلاتر محتاجة تغيير) موتور قوي جدا اقوي من ال 99 بكتير (بلوك حديد بعكس ال 99 بلوك المونيوم) بيستحمل البهدله و الشغل فيه ناس ركبت عليه تكييف و كان ماشي حلو جدا انا عن نفسي جربت الموتور ده و هو عليه تكييف التكييف كان ممتاز و سحب العربية كان حلو ! بس فيه عربيات تانيه التكييف موت موتورها و ده يرجع لحاجتين يا اما الموتور حالته كانت وحشه اساسا يا اما التكييف اللي ركب مش بتاعها بالتالي بهدل الموتور

قطع الغيار متوفره للعربيتين سواء جديد او استيراد التوفيقية مليانة تجار قطع غيار فولكس و سيات مصر الجديدة فيها شارع مليان تجار قطع فولكس و سيات شارع فيصل فيه الجيزه فيها عين شمس فيها حاجتها موجوده في كل حته

العيوب:في نظري انا عيب في الابيزا هو الصاج ! العربية صاجها عادي رغم انها شقيقة الجولف 2 لكن الجولف تتفوق عليها في قوة الصاج بنسبة كبيرة هي صاجها مش ورق لكن في نفس الوقت مش شديد يعني متوسط

-في ناس بتقول ان العربية تبقي واطيه ده عيب انا مش شايفه عيب لانه مدعم ثبات العربية جدا جدا جدا و اذا كان علي المطبات تتاخد بالراحة و خلاص و العيب الحقيقي في الشوارع مش في العربية

مش عارف اجيبلك عيوب تانيه لان فعلا اكتر من كده مشفتش من العربية 16 سنة شغل 414 الف كيلو و العربية عمرها ما قلت بينا الحمد لله

اي سؤال عن اسعار قطع الغيار اسأل بس قولي حاجات محدده عايز تعرف اسعارها و هقولك علي طول ان شاء الله

رد: الى كبير الابيزاوية
 

أنا بس عاوز أعرف أكتر عنها لأنى بقارن بينها هي و جولف2 و اوبل كورسا
بس انا ميال اكتر للابيزا بس عاوز اعرف اكتر عشان لما اشترى اجيب اللى يناسبنى
مع العلم انى بسافر كل اسبوع او اتنين
و ياترى بقى فى منها اوتوماتيك؟(او من الأنواع التانيه)
انا من الأسكندرية
ومش عارف هلاقيها في اسواق فين هنا

رد: الى كبير الابيزاوية
 

الله عليك با محمد نورت المنتدي ايه الكلام الجامد ده ايه يا بني ده المنتدي من غيرك كان فيه اهتزازات شديدة جدا الحمد لله علي سلامتك... ربنا يخليك لينا يارب ويوفقك في امورك كلها آمين :THE_PR~18:

رد: الى كبير الابيزاوية
 

طب قولي عايز تعرف ايه تحديدا و انا اقولك

الكورسا حاجتها اغلي من الابيزا و مش بتعيش زي الابيزا و موتورها اضعف من الابيزا

الجولف 2 ال 1300 هي هي الابيزا 94 مع اختلافات بسيطة بغض النظر عن الشكل

مفيش اوتو من الابيزا ال 94 ولا 99 ولا 2001 حتي طبعا في مصر برا مصر فيه اوتو عايز اوتو في مصر يبقي عليك و علي الابيزا 2006

رد: الى كبير الابيزاوية
 

مشكور محمد ابيزا علي الافلدة العظيمة
هخلينى فى الابيزا و الجولف
انا شوفت امبارح ابيزا بتتباع مو 94 على 28,500
حالتها من برة عاوزة نضافة بس بيقول ممكن يمزل السعر شويه
بس انا عاوز عربيه موديل أحدث بس موتورها كويس
و قالى حاجة بقى ان مافيش حاجة اسمها ابيزا موتورها 1000cc لكن اقل حاجة 1100cc
انا لقيت 2 ابيزا تانيين عاوزين نضافة برضه
و لقيت واحده جولف نظيفة جدا جدا من بره (عروسة)
بس ما سألتش علي دول عشان فلوسي مش جاهزة دلوقت على أول الشهر يعنى

رد: الى كبير الابيزاوية
 

اقولك عاوز اعرف ايه عنها
انا زى ما قلتلك انى بسافر مره في الاسبوع رايح جاى
فهى هتستحمل سفر ولا ايه؟ وخصوصا بقى ال 99 ال1000
و يهمنى موضوع التكييف والزجاج والمرايات الكهرباء(مع انى ممكن اركبهم بعدين)
انصحنى بقى بالنسبة للتكييف لو ملقيتش فيها اعمل ايه (في موديلا الابيزا كلها ال100وال1300وال1400)
و بانسبة للباور برده ايه نظامه في الموديلات
و ممكن اركبه ولا لأ
و ياريت أسعار الحاجات اللى فاتت و امكانية تركيبها
و في حاجة تانيه بقى
العربية اللى هشتريها ازاى اعرف ان دا موتورها
يعنى مش متسقطلها
خايف يكون اللى قبلى مسقطلها موتور مش متوافق مع الجير بوكس

رد: الى كبير الابيزاوية
 

http://www.cars-club.com/up/8-2-1/carsclub_17975439.JPG

للي بيقول ان مفيش حاجة اسمها ابيزا 1.0 سي سي و انها 1100

قوله مظنش انك هتعرف اكتر من ويكيبيديا :) هتلاقيني عاملك دواير بالاحمر علي موديل 99 و موديل 2001 اللي نزل منهم 1000 سي سي و مفيش حاجة اسمها ابيزا 1100 سي سي

و تستحمل السفر عادي

في نسخ من ال 99 نزلت بباور و تكييف و مرايات كهربا و فيه بتبقي فاضيه

لو ملقتش تكييف هتنزل علي الحرفيين تشتري تكييف سربنتينه و كباس و كويل و التوصيلات بتاعتهم و هكذا تكييف كامل بتاعها و تركبه و سعره في حدود 2500-3000

94 مفهاش باور 99 في نسخ نزلت باور و فيه لا 2001 كلها باور

يفضل انك تسقط مكنة بباورها مش تركبه

اي ميكانيكي هيقدر يعرفلك اذا كان موتورها ولا متسقط من الضفيره و ليهم طرق كتير و لازم يكون واحد فاهم العربيات دي