|
رد: دهان فالتوكيل،،إثبات انها مش حادثة؟
شكرا يا بشمهندس وائل فهمت حاجات كتير فعلا
بس معني الكلام اني غالبا لازم اعمل سمكرة واضطر اشيل الفابريقة من بعض الاماكن عشان كدة بسأل لو فالتوكيل اعتقد هيشوفو انها خبطات بسيطة ولكنها مش حادثة ويثبت دة فسجل العربية عندهم عشان لو بعتها بعد كدة ميتقالش عليها عاملة حادثة ؟ ولا زي راي الباشمهندس احمد ان بالعكس معني اني اعمل الكلام دة في التوكيل يشكك الي هيشتريها بعدي اني عملتها فالتوكيل لان الموضوع كان كبير وممكن تكون حادثة كبيرة ؟ شكرا مقدما :) |
رد: دهان فالتوكيل،،إثبات انها مش حادثة؟
اقتباس:
|
رد: دهان فالتوكيل،،إثبات انها مش حادثة؟
اقتباس:
1 - اللى بيتسجل فى ملف العربيه بوضوح هو اوامر الاصلاح يعنى سمكرة على البارد للرفرف الامامى يمين او سمكرة على السخن باب خلفى شمال كدة حتى الرسم الكروكى اللى بيتعمل غالباً بيتدشت مش بيتحفظ فى ملف العربيه على الكمبيوتر فالخلاصة انا كمشترى لما اروح اشوف الملف بتاعها هلاقيها اتسمكرت واترشت وبس كان السبب ايه وخطورته ايه معرفش 2- اغلب العربيات اللى بتتعمل سمكرة فى التوكيل بيبقى السيناريو بتاعها انها مؤمن عليها والحادثة كبيرة ( تكلفتها 5 الاف فيما فوق) فصاحب العربيه يعملها فى التوكيل علشان ميدفعش حاجة وشركة التامين والتوكيل يكش يولعو فى بعض هو ملوش دعوة يعنى زى ما قال استاذنا برضو احمد انها شبهه اكتر منها ضمانه 3- اغلب التجار او المشترين الشطار لما يلعبو على حته انها مرشوشة ((بره تحديداً )) بيبقى الهدف ينزل من سعرها وان شاء الله تكون مدهونة فى معامل ناسا للفضاء برضو هينزل من تمنها ويفاصل فيها 4-الفيصل فى تحديد اذا ماكنت العربيه اترشت نظافة لخرابيش او حكات وخبطات بسيطة او كونها سمكرة ودهان ناتجة عن حادثة كبيرة هو الاتى 4-1- الكشف على الدواخل ( مثلا ) الرفرف القدامانى يتبص عليه من الحوض لو فيه اثار (بنط لحام او لاء) لو فيه يبقى الرفرف كان معجون (مخبوط جامد) واترد على السخن الرفرف الامامى مثلا سهل شوية يتفك وترش جوة وبره لكن الرفرف الخلفى مثلاً مش بتفك ولو واخد حموات هيبان من ناحية الشنطة الخلفية بعد ما يتشاال الفرش بتاعها وكذلك الابواب 4-2- اذا كانت السمكرة مش تمام وسوك (زوايا) الصاج مش مظبوطة بعد السمكرة والدهان 4-3- اذا كان الدهان تحتيه طبقة معجون كبيرة 4-4 اذا كان فيه اثار (زراجين فى الشاسية والقوائم) والزارجين ديه عبارة عن عملية استعدال قاسية شوية لما يكون الصاج متطبق جامد بتتعمل بابسط صورها بان مثلا القائم بتاع الباب يتربط بجنزير حديد ويتربط فى شجرة ولا حاجة ويتشد كده واحدة واحدة لحد ما الصاج يرجع مكانة وده طبعاً بيسيب اثار فى مكان شد الزرجينة يعرفها المتخصصين 4-5 فيه حاجات فى تفقيل صاج الفابريكا مميزة زى (البرشام) لحامات الصاج بواسطة مكن الفابريكا وال(فليتو) وديه فينش للحامات بتاعة الفابريكا غالباً (بتتفور) تتشال لما السمكرى يفك الصاج من بعضة دلوقتى ممكن الفليتو والبرشام يتقلدو برضو على فكرة لو سمكرى ((صايع)) حبتين باختصار احسن ان العربيه تتعمل فى مكان نظيف وبنفينش نظيف وبس وساعة البيع ربنا يكفيكى شر المبخسين والمتفزلكين غير كدة انا شخصياً بقالى سنين مبشتريش غير مستعمل ومبشتريش غير عربيات رشة بره واتاكد من ان الرش كان نظافه او لخبطات فى الجنبين بسيطة مش ماثرة على قوائم ولا اساسيات لان انا برضو هخبطها وببيعها برضو وهى راشة نظافة وده حال معظم الشعب المصرى عادى خالص مش فيها اى حاجة تعيب العربيه انها راشة نظافة طالما مرشوشة صح والفينش سليم |
رد: دهان فالتوكيل،،إثبات انها مش حادثة؟
وطبعاً لو نتعبك معانا يا دكتورة وتصوريلنا الخبطات وترفعيها ممكن نقولك بالظبط اسلم طريقة للاصلاح بدون اهانة العربيه سواء فى التوكيل او بره التوكيل
كمان ممكن حضرتك تنسقى مع مركز اوتوبينت كعضوة فى مصرموتورز ممكن حضرتك تروحى تعاينى العربيه بواسطة متخصصين هناك مجاناً ونشوف رايهم ايه قبل ما ناخد قرار نهائى عروض مركز اتو بينت لتجديد السيارات والتعامل مع شركات التامين - مصر موتورز مجتمع وسوق السيارات العربى |
رد: دهان فالتوكيل،،إثبات انها مش حادثة؟
والله ما عارفة اقولك اية
بجد ربنا يكرمك ويجعله في ميزان حسناتك التوضيح دة اما بقي حكاية اني اصورها انا مكسوفة جدا الصراحة من الخبطات ولو صورتها هيتكشف كل حاجة بس والله معظمها الا قليل ببقي راكناها ارجع الاقيها مخبوطة واجمل شئ ان حد تقريبا عاجبه الرفرف الشمال الخلفي وبيخبطهولي في نفس المكان مرتين ورا بعض :) عموما هصورها واحط الصور لانها بقت صعبانة عليه جدا ونفسي ترجع زي ما جبتها |
رد: دهان فالتوكيل،،إثبات انها مش حادثة؟
بعد كل ما قيل
لا يوجد اى إضافه لكن يجب ان تعرفى يا دكتورة اى سيارة بعد اى مدة من الاستخدام وقدم الموديل بيقل من تمنها بعد ذلك حضرتك ممكن تعملى كل المطلوب فيها عند صانعيى ثقه ثم تقومى بإستخدمها عادى جداً او بعرضها فى المنتدى فى قسم البيع |
| الساعة الآن 03:46 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017