مصر موتورز مجتمع السيارات - ملاحظات هامه بخصوص الكيا ريو الجديده

اقتباس:

المشاركة الأصلية كتبت بواسطة yahiaashraf (المشاركة 747671)

بسم الله الرحمن الرحيم
************************* ****
نظرا لكثرة الجدال بين السياره كيا ريو الجديده معانا
فدى شوية حاجات مهمه عن السياره منقوووووووله
*********************
ببساطة شديده البنزين استهلاكها عادي جداً زي اي عربية يعني مش هتحس انها 1400 بل انك هتشوف ان الاستهلاك اعلى وده مش رأيي بس ده رأي الكل ان استهلاك العربية عليها عالي

السحب انا من رأيي ممتاز مع التكيف وفي المطالع يعني كل شئ تمام

منصحكش بالخليجي في العربية دي لانها جديدة وعلشان يكون كل شئ من صياناتك في التوكيل بلاش خليجي علشان متحصلش مشاكل ويرفض التوكيل عملها وده حقه طبعاً

انا الحكاية اللي هقولها لك دي لو راجعت مشاركاتي هتلاقيني كتبتها حوالي 4 مرات لاهميتها وانا بشتري الريو من التوكيل لقيت واحد خارب الدنيا هناك لان عربيته خليجي والتوكيل كشف عليها وقال له التغيير بـ44 الف وهو خارب الدنيا هناك ولكن مكنش معاه الحق طبعاً ومكنش عارف يقول لهم ايه لان ده اختياره

ببساطة برضه الخليجي بطيخة مقفوله وانت وحظك لان ده عامل زي السوق كل يوم بحاجة شكل خصوصاً في الكاسيت ونظام الصوت بيخلعوا الاصليين وبيركبوا حاجة سيئة جداً

انما التوكيل بيديلك "نظام صوت اساسي في اعلى فئة الهاي لاين" ممتاز جداً صوته نظام صوت بجد

************************* ******
انا بصراحة مش قادر اسكت وكنت هعمل موضوع لانى متعكنن من امبارح . بس لقيت موضوعك قلت اشاركك فيه.
امبارح ركبت حوالى اربع عربيات دة يوم كان عجيب خصوصا ان صاحبى شغال ماشاء الله فى ايجار السيارات
- عدى عليا واحد زميلى معاه كارنز بسم الله ماشاء الله حاجة تفرح لونها اسود بس وعاليه عن مطبات والبلاعات المصرية الجميلة لكن انا طول عمرى من يوم ماشوفت الماتركس واى حاجة شبها بقول عليها مكروباص نص نقل ديما الجملة دى معلقة فى دماغى اوى (مع احترامى لملاكها هى والكارينز) وبصراحة حسيت بادائها فعلا وصاحبى سايق لخبرتى فى السواقة وودانى اللى بتكون مع اى موتور عربية.
-بعدها ركبنا كيا سيفيا عربية محترمة ومعقولة وتكيفها معقول
-بعدها ركبنا النترا 2009 كاملة فتحة سقف لونها نبيتى راكبلها جنط 16 عربية داخله دماغى مش زى ال2012 مش مقتنع بيها.
طولت عليكم نروح للمهم اوى بقة
-صاحبى راح لواحد بياجر بردوا عنده الالنترا اللى قولت عليها وعندة ( كيا ريو 2013 ) اصحى معايا بقة
سألته ايه رايك فى عربياتك قالى الالنترا موفرة اوى فى البنزين . وسألت واحد صاحبى كان اجر الالنترا دى منه وقالى موفرة بهبل .
المهم قلت للراجل يعنى الريو بتاكل قالى اة بتاكل بنزين.
اصحى معايا بقة لحاجة مهمة لقيته بيقولى الريو فيها حاجة قلتله هااااااااااااااااا.
قالى دواسة البنزين تيجى تدوس مرة واحدة عشان تسحب زى اى عربية فى الحياة.لا دى تاخد وقت على ماتفتكر انك كبست بنزين . قلتله ايه الحل قالى واحدة واحدة نونة نونة قلتله ازاى قالى تحسس على الدواسة سنة سنة وهى هتشد معاك . قلتله ياحلاوة ياولاد ايه الشلل دة . قلتله ايه السبب قالى الاسبراتير بتاعها كهرباء.
المفاجأة واحد معرفه صاحبى جه واتفق انه يأجر العربية دى(كيا ريو2013) تمام. وركبنا معاه علشان يوصلنا.
انا اول مرة اركبها صراحة ركبت فى الكنبة الخلفية وصحابى جمب بعض فى الامام.
العربية واسعة صراحة فى الكنبة الخلفية روحت سائل صاحبى انت مرتاح (الكرسى اللى جمب السواق) قالى اة زى الفل قلتله ياراجل . قالى انت طويل صحيح قلتله لا زى الفل العربية واسعة . شوية ولقيت اول جملة من صاحبنا اللى سايق العربية بتكن وبتخنق ياجدعان . قلت فى سرى اهلن بنيحة الحبايب دة صاحب العربية كلامه صح اهو . فى اية ياعم فهمنا قال بكبس مافيش بتاخد وقت . روحنا مجربين وعدينا لها الوقت طبعا الفتيس ع الاتوماتك بالظبط خبطتلها 5 ثوانى عقبال ما الغبية فهمت انه دايس كبس وعاوز يشد. روحنا ناقلين مانيوال وجربنا كانت عادى بردوا.
من الاخر انا صدعتكم
اللى عاوز يشد بيها مايفكرش.
وانا زعلت جدا يعنى اية . طب لو فيه عربية كابسة وراك ولا حصل اى موقف وعاوز تاخد غرزة ولا زى اى عربية بتشد عليها . 5 ثوانى تكون روحت عند ربك بقة يعنى ولا ايه.يمكن اكون بتكلم فى نقطة مش فاهم فيها بس دة اللى حاصل ادامى واللى اشتكى منه صاحبى واللى حسيت بيه.لانه ركب فيرنا والنترا واسبرنزا وانواع كتير.
العربية شكل ومنظر بس اللى حصل دة فصلنى منها اوى وزعلت على جمالها والاوبشن اللى فيها.
************************* ************************* ****

خلوا بالكم
-----------------
-----------------
-------------------
المشاكل اللى مكتوبه فى الكلام اللى فات فى الاصدار الاول فقط 2012
وتم معالجت هذه المشاكل فى موديلات 2013 الاصدار التانى
************************* *
المشاكل اللي بتحكي عليها دي 2012 اول اصدار

انا عندي 2012 ثاني اصدار ومتعالج فيها المشاكل دي بتحديث سوفت ECU ودي اختصار لـEngine Control Unit فيبقى ازاي العربية دي 2013 ؟

اكيد خليجي والخليجي صدقني خبرتهم في العربيات هناك زي علاقتنا بصيانة الطائرات يعني العربية 2013 هتلاقي عليها سوفت من ايام الفراعنة

اسأل صاحبك العربية دي خليجي ؟ ده اولاً ثانياً العربية توكيل ؟ التوكيل لسه هينزل الريو بشكل رسمي 2013 مع اضافة 1000 جنية زيادة وهي هي مواصفات الـ2012 فيبقي دي اكيد 100% مش توكيل لانها لسه منزلتش انا كنت عند التوكيل من يومين كنت هحجز البكانتو ولكن لقيت المواصفات قلت جداً في 2013 عن 2012 فقلت اعيد نظر الاول مفيش عندهم 2013 الا حاجة واحده بس وهي السيراتو :) , ثالثاً وده الاهم العربية دي من اللي بتحكي عليه دي 2012 الاصدار الاول للريو في مصر

ده بأيجاز عن المشكلة لان كل ده اتحل في الفرز التاني اللي نزل من كوريا لمصر نزلت متحدثه وجاهزه وانا كنت في مركز الصيانة وناس فاهمين جداً واول ما قلت لهم بصوا على العربية قالوا لي دي الاصدار الثاني معالجة من كوريا نفسها

لو صاحبك راح التوكيل ويقول لهم على المشكلة دي ويطلب تحديث ECU او هم هيحدثوه له من غير ما يقول هيلاقي الموضوع فرق جداً معاه

انا العربية من ناحية السحب انت عارف جوه البلد مصر شكل شوارعها ايه فتقريباً بمشي على 10 او 8 يوم ما اعلى جوه البلد امشي 15 فلما بطلع على الطريق وادوس بنزين اسند رجلي بس بلاقى نفسي اذا مش رابط الحزام بتسحب لورا ولعلمك انا عربيتي عامله بس حوالي 350 كيلو يعني المفروض السحب يكون افضل من كده برضه بعد اول 1000 الي 5000 كيلو

ياريت اكون قدمت اي معلومات
************************* *************

مشكلة الdelay اللى بيحصل فى دواسة البنزين و الاستهلاك العالى فى البنزين دى حلها الsoftware الجديد و اتعملت هنا كتير و أعرف اللى بيعملها شخصيا فى التوكيل ده حوار سهل جدا
بالنسبة للخليجى و الضمان , لو لا قدر الله ظهر عيب صناعة فى العربية بيشلوك بس محتاج تكون موريلهم العين الحمرا من الأول عشان ميستهبلوش فيها
************************* *********
متخفوش 2012 الاصدار الاول خلص من زمان :)
الموجود دلوقتي الاصدار التاني متخفش لو اشتريتها من التوكيل هتلاقيها الدفعة التاني اللي متحدث فيها السوفت ECU

نصيحة ليك متستناش 2013 علشان هتغلى الف جنية في التوكيل والعربية هي هي مفيهاش مسمار متغير ومغليين السعر مش عارف ليه حتى موظف التوكيل سألته ليه غليت وهي نفس المواصفات لقيته ضحك فعلشان كده اوفر لك الـ1000 دي ترخص لك العربية 3 سنين فحرام انك تدفع الالف الزيادة دي وانت ممكن تشتريها هي هي وهتوفر الالف دي ترخص العربية بيها 3 سنين

بس هي فيها حاجة واحده بس البنزين شديد فيها على عربية 1400 هو ايوه الموتور عمره ما هيحسسك بأنه 1400 لانها دي التكنولوجيا الجديدة في المحركات دي حاجة

الحاجة التانية انت مش شايف كبوت العربية ودي مشكلة ومعظم الناس بتعمل نفسها سواقين وبيقول هتكفيني ومش عارف ايه وهو لازم يتعود على العربية ومقاسها يعني تسوق العربية فتره في الليل كده والناس قليله تنزل تتعود على العربية وتسوقها فتره تعرف المقاسات علشان متخبطهاش من اول يوم

دي الملاحظات على العربية بعد كده ما شاء الله تبارك الله لو اشتريت الهاي لاين هتلاقي نظام صوت مع virtual sound وفرامل ABS و EBD و 2 ايرباج هتعيش وانت في العربية بجد وهتكون مطمن وانت في العربية
***********************

ماهو الخليجى هتروح التوكيل على طول و أشترى ضمان من أى شركة من اللى بتضمن الخليجى و من حقك تعمل صياناتك فى التوكيل و لو ظهر عيب صناعة صلحه فى التوكيل و هما اللى يدفعوا و لو رفضوا حط صباعك فى عينهم يعنى الوكيل بيقول فى عيب صناعة و هما ميرضوش يشيلوا !!!!!
انا حصل معايا نفس الموقف و عملته فى التوكيل و شركة الضمان شالت الليلة و كان رقم على فكرة كان فى حدود ال 7 الاف جنية
************************* ****

ودلوقتى توضيح بخصوص المشاركه 2 من فوق
************************* ********
العربية طلعت 2012 خليجى فرز اول
قلتله انا كتبت عن المشكلة اللى فى عربيتك فى المنتدى
قالى انا وديت العربية الوكيل البارحة وظبطوا القصة دية من نفسهم وفكوا العجل ومش عارف عملوا ايه وظبطوا شوية حجات فى المكنة وغيروا زيت 10000 كيلو وشافوا تيل الفرامل تقريبا
وخبطوه 680 جوندى
قالى الكنة بتاعة السحب دى والخنقة دى كانت بتخلى العربية تاكل بنزين كتير . وقال انه راح التوكيل وكام مكان كدة ورجع مسافة حوالى 100 كيلو على شرطة واحدة .
وقالى مكنتش بعرف اطلع مطب بسبب خنقة العربية انما بعد الظبط فرق شاسع.
مبروك مقدما للى بيفكر يشتريها. يارب اكون قدرت افيد نوعا ما.
************************* ***
انا معايا الهاى لاين الخليجى الاردنى موديل 2013
الحقيقة انا متفق فى مشكلة عدم روية الكبوت فقط بس خلاص انا اتعودت على الموضوع ده مبقاش مشكلة
مواصفات العربية للى بيسال

جنوط 17 مع كاوتش كونتيننتال المانى 205/45/17
فرش جلد + بيبان جلد +تابوه جلد
تكييف تاتش
مرايات ضم
سينسور لايت
سينسور مطر
سينسور بارك
abs+epd+esp
2 ايرباج
فتحة سقف
فوانيس ليدات جامدة جدى ودى اكتر حاجة عجبانى فى العربية
فيمية زجاج
سوند سيستم
كمبيوتر رحلات
بلوتوث
مثبت سرعة
ده الى انا فاكرة دلوقتى
ومشكلة السحب واستهلاك البنزين دى مش موجودة وانا كنت عملت مواضيع عن الكلام ده
بس هى العربية حساسة اوى للبنزين يعنى لو البنزين فيه مشكلة بتلاقى العربية بتهييس

كنت شاريها ب 128000 والضمان من شركة ميدل ايست سنة ب 1100
************************* ******

************************* ***
كده الموضوع خلص
ويارب اكون نقلتلكم حاجه مفيده

خلاصة الامر
الفرز الاول هو اللى كان عليه الكلام
والفرز التانى اللى هو فى موديلات 2013
اتحلت المشاكل

تحياااااااااتى

والله وفيت و كفيت وما قصرت