المشاركة الأصلية كتبت بواسطة hazem_khidr (المشاركة 65030)

الف الف مبروك علي العربيه يا بسام و ربنا يكفيك شرها
ال126 من العربيات اللذيذه جدا و سهله الصيانه و افضل من السيات 133
هو زي ما فادي قالك السيات 133 طلعت بعدها و كانت بتعتبر خليط من ال126 و ال127
الميزه فيها ان تبريد الموتور هوا مش ردياتير زي السيات و دا بيخليها ما تسخنش ابدا.
بالنسبه للصيانه
تغيير سير الدينامو و اعتقد ان الكاتينه بتاعتها جنزير مش بتحتاج تتغير غير كل فين و فين
تغير جميع الفلاتر (زيت و بنزين و هوا) و تغير زيت موتور و اي نوع مش مشكله مش حيفرق
العربيه بتمشي ببنزين 80 عادي جدا وموفره في البنزين التانك بتاعه متهيالي 25 لتر

مافيش اي عيوب مشهوره للعربيه بالعكس من السيارات المعمره اللي قليل لما البارومه تسرح فيها
وربنا يباركلك فيها يا رب:)

المشاركة الأصلية كتبت بواسطة moh taia (المشاركة 65086)

بالنسبه لنقطة بستحمل المشاوير ولا لأ

أنا كان معايا واحده كانت موديل 90 وحالتها كانت ممتازه
كنت بروح بيها من طنطا لإسكندريه من مره لمرتين اسبوعيا (رايح جاى فى يوم واحد ) بدون أى مشاكل
مشكلتها الوحيده معايا كان الجوان الى واصل بين الموتور والشكمان كانت ساعات الحراره بتبوظه
لكن للأمانه أيضا أنا كنت بغيره دايما بواحد عموله مش أصلى يعنى يمكن ده السبب انه كان ما بيستحملش كتير

- قطع غيارها أغلى شويه من ال 128 و ال 127 لأنها مش منتشره زيهم

ده الى أنا فاكره دلوقتى وألف مبروك على العربيه الجديده :)

المشاركة الأصلية كتبت بواسطة hazem_khidr (المشاركة 65217)

ولا يهمك يا عم بسام انت بس اسأل و احنا نجاوبك و بكره تتعلم و لما حد جديد يسأل انت اللي حتجاوب عليه:)

الدينامو هو اللي بيشحن البطاريه و بيلف زي دينامو العجله كده
طب هو حيلف ازاي؟؟
فيه طنبوره طالعه من الموتور و متركب فيها سير علي الدينامو لما العربيه بتدور الطنبوره بتلف
و بالتالي السير بيلف يقوم يخلي الدينامو يلف هو كمان و الدينامو بيحول الطاقه الحركيه
الي طاقه كهربائيه و يشحن البطاريه باستمرار
لو السير دا اتقطع يبقي مافيش شحن حيوصل للبطاريه من الدينامو.


سير الكاتينه دا معقد شويه
المهم ان برضه الموتور طالع منه طنبور بيبقي راكب فيها سير الكاتينه دا علشان برضه يخلي عمود الكامه يلف و يحرك صبابات دخول البنزين و صبابات خروج العادم
لما بيبقي جنزير مابيحصلش منه حاجه و مش بيتغير غير كل فين و فين و الجنزير دا عامل زي جنزير العجله برضه:)
لو كاوتش دا بيتغير كل 30000 او 40000 الف كيلو بس اعتقد ان اللي عندك جنزير مش كاوتش
دا شرح مبسط جدا ولو عندك وقت ابقي اصدع دماغك بالتفاصيل:HAPPY_~211:
البارومه هيا الصدأ لما بيصيب جسم العربيه
و الصدأ دا من كتر ما بيتكون بياكل الصاج و بيبهدله
علشان تحافظ علي العربيه ما تغسلهاش كتير و لما تغسلها تنشفها كويس
و في الشتا تغسلها بعد ما الدنيا تمطر دايما
علشان الطين بيتراكم تحت الرفارف و الفجاوي
الطين من بره بينشف و يفضل فيه ميه من جوه تقوم تاكل الصاج بتاع العربيه.